Pavodle papiaredniaj infarmacyi, Juryja Iljeva vinavaciać u pieravyšeńni słužbovych paŭnamoctvaŭ i atrymańni chabaru.
«Miarkujem, što jon znachodzicca ŭ KDB», — paviedamili «Biełorusskomu partizanu» u pryjomnaj byłoha dyrektara. Padčas telefonnaj hutarki z supracoŭnikami pradpryjemstva vyśvietliłasia, što ŭ hety čas u kabiniecie supracoŭnika, jaki na siońnia vykonvaje abaviazki dyrektara, znachodziłasia staličnaja pravierka.
U pracoŭnym pasiołku Kaściukoŭka, što znachodzicca ŭ 12 km ad Homiela, — panika. U śniežni na «Homielškle» musili zapuścić novuju liniju pa vypusku listavoha paliravanaha škła. Adnak na hetym tydni źjaviłasia infarmacyja, što dyrektara «Homielškło» Juryja Iljeva aryštavali. Ciapier pa pasiołku ŭsio aktyŭniej chodziać razmovy, što novuju liniju mohuć i nie zapuścić.
Pavodle papiaredniaj infarmacyi, dyrektaru AAT «Homielškło» pradjavili abvinavačvańnie ŭ pieravyšeńni słužbovych paŭnamoctvaŭ i atrymańni chabaru. Choć sami žychary Kaściukoŭki kažuć, što aryšt byŭ arhanizavany naŭmysna. «Pracoŭnyja dobra adnosilisia da Juryja Leanidaviča. Ludzi škadujuć, što jaho aryštavali», — raspaviała «Biełorusskomu partizanu» piensijanierka i žycharka Kaściukoŭki Nadzieja Paŭłaŭna.
Juryj Iljeŭ zajmaŭ pasadu dyrektara z 2000 hoda. Jašče miesiac tamu Juryj Iljeŭ uvachodziŭ u sotniu samych aŭtarytetnych i ŭpłyvovych pracaŭnikoŭ šklanoj pramysłovaści SND.
U kastryčniku 2008 hoda chadzili havorki pra mahčymy prodaž pakieta akcyj AAT «Homielškło» niejkamu bujnomu inviestaru. Dadzienaje rašeńnie było pryniataje na ŭzroŭni Minbudarchitektury. Całkam mahčyma, styl kiraŭnictva hiendyrektara «Homielškło» Juryja Iljeva nie ŭpisaŭsia ŭ nieprazrystyja inviestycyjnyja płany staličnych čynoŭnikaŭ.
Darečy, na «Homielškle» heta ŭžo druhoje nadzvyčajnaje zdareńnie, źviazanaje z kiraŭnikami. U 2000 hodzie dyrektara Uładzimira Zapolskaha zastrelili ŭ padjeździe ŭłasnaha doma.
