Infarmacyjny centr Rady Jeŭropy budzie pracavać u budynku Instytuta žurnalistyki Biełdziaržuniviersiteta.
Jak paviedamili BiełaPAN u pres‑słužbie Rady Jeŭropy, udzieł u cyrymonii voźmuć kiraŭnik MZS Słavienii (staršyni RIE) Samuel Žbohar, namieśnik Hienieralnaha sakratara RIE Mod de Bur‑Bukikio, dakładčyk Parłamienckaj asamblei Rady Jeŭropy pa Biełarusi Andrea Ryhoni, ministr zamiežnych spraŭ Biełarusi Siarhiej Martynaŭ i rektar BDU Siarhiej Abłamiejka.
Hałoŭnaja funkcyja centra — infarmavać hramadzian Biełarusi pra dziejnaść Rady Jeŭropy, «być pravadnikom kaštoŭnaściaŭ i norm RIE u tym, što tyčycca pravoŭ čałavieka, demakratyi i viaršenstva prava», zaznačyli ŭ pres‑słužbie arhanizacyi.
Infarmacyjny centr taksama budzie spryjać arhanizacyi akcyj i mierapryjemstvaŭ, jakija pravodziacca pad ehidaj Rady Jeŭropy, raźvićciu supracoŭnictva hramadzianskaj supolnaści ź miascovymi i centralnymi ŭładami. Aprača taho, tut možna budzie atrymać infarmacyju pra kampanii Rady Jeŭropy pa supraćdziejańni handlu ludźmi, pa baraćbie z dyskryminacyjaj i nieciarpimaściu i za admienu śmiarotnaj kary.
Adkryćcio infacentra kiraŭnictva RIE razhladaje jak adzin z krokaŭ Minska pa ŭstupleńni Biełarusi ŭ arhanizacyju.
26 maja ŭ Paryžy, abmierkavaŭšy situacyju ŭ Biełarusi, palitkamisija RIE padtrymała prapanovu dakładčyka Ryhoni ab nadańni biełaruskamu parłamientu statusu śpiecyjalnaha zaprošanaha, jaki dazvalaje deputatam brać udzieł u pracy PASIE. Kančatkovaje rašeńnie pavinna być pryniata na čarhovaj siesii PASIE ŭ kancy červienia.
Kamientujučy rašeńnie, kiraŭnik palitkamisii Joran Lindbład zajaviŭ: «My ličym, što takim čynam my zmožam spryjać źmienam u krainie, jakaja adčuvaje niedachop demakratyi, krainie z represiŭnym uradam, krainie, u jakoj dahetul isnuje śmiarotnaja kara, a prablemy apazicyi zaklučajucca ŭ tym, što joj prosta ciažka isnavać. My spadziajemsia, što rašeńnie ab nadańni statusu śpiecyjalnaha zaprošanaha dazvolić Biełarusi «asučaśnić» hramadstva i palityčnuju sistemu. Izalacyja hetamu jaŭna nie spryjaje».
Pryniataja rezalucyja, zaznačyŭ Lindbład, utrymlivaje punkt ab tym, što ŭ pracy PASIE zmohuć brać udzieł i pradstaŭniki biełaruskaj apazicyi.
«My spadziajemsia, što heta pryviadzie da źmienaŭ, i apošniaja ź jeŭrapiejskich krain, jakaja nie źjaŭlajecca členam Rady Jeŭropy, zmoža praź niekatory čas pierajści ad statusu śpiecyjalnaha zaprošanaha da členstva», — zajaviŭ palityk.
Status śpiecyjalnaha zaprošanaha ŭ PASIE parłamient Biełarusi atrymaŭ u 1993 hodzie, adnak byŭ pazbaŭleny jaho paśla kanstytucyjnaha refierendumu, praviedzienaha ŭ listapadzie 1996 hoda, jaki pašyryŭ paŭnamoctvy prezidenta.
