U vyniku trahičnych abstavinaŭ pajšoŭ z žyćcia viadomy žurnalist Alaksandar Michalčuk. Jamu było 54 hady.
Na pačatku 1990‑ch hadoŭ Alaksandar Michalčuk pracavaŭ u Biełaruskim telehrafnym ahienctvie (BiełTA), adkul pajšoŭ u niedziaržaŭnuju žurnalistyku. Faktyčna Alaksandar Michalčuk stajaŭ la vytokaŭ lepšych niezaležnych vydańniaŭ taho času: «Biełorusskoj diełovoj haziety» i «Biełorusskoj haziety».
Palitolah Alaksandar Fiaduta zhadvaje Alaksandra Michalčuka jak lepšaha redaktara, ź jakim jamu davodziłasia pracavać:
«Išoŭ 1995 hod. Jon pracavaŭ namieśnikam redaktara «BDH», vioŭ blok palityki, ja byŭ ahladalnikam hazety.
Jon skaročvaŭ teksty znakami, nikoli nie skažaŭ aŭtarskaj dumki, a kali i što skaračaŭ, to nichto nia mieŭ da jaho pretenzij. Heta byŭ cud, heta było mastactva».
Kali žurnalist syšoŭ z «BDH», to supracoŭniki hazety pytalisia adzin u adnaho: a chto ŭ nas ciapier budzie Alaksandram Michalčukom? — zhadvaje Alaksandar Fiaduta.
Imia Alaksandra Michalčuka stała šyroka viadoma ŭ 1990‑ia hady — burlivy čas, kali ŭ Viarchoŭnym Saviecie spačatku 12‑ha, a potym 13‑ha sklikańnia išli sapraŭdnyja debaty vakoł prablem demakratyzacyi, raźvićcia rynkavaj ekanomiki, stanaŭleńnia dziaržaŭnaści Biełarusi. Deputaty zhadvajuć nadzvyčaj dakładnyja repartažy Michalčuka z parlamentu i jahony talent znachodzić samuju cikavuju temu.
Alaksandar Michalčuk skončyŭ Mienski instytut zamiežnych movaŭ, byŭ prafesijnym pierakładčykam. «Zdajecca, jon i ŭ žurnalistycy praciahvaŭ być pierakładčykam: maksymalna sprabavaŭ pieradać na staronkach hazety toje, što adbyvałasia ŭ žyćci», — zhadvaje były kaleha Michalčuka Raman Jakaŭleŭski. Palityčny ahladalnik Jakaŭleŭski adznačaje taksama hramadzianskuju pazycyju Alaksandra Michalčuka:
«Kali mierkavać pa siońniašniaj kvalifikacyi, to jaho, biezumoŭna, treba było b zaličyć u hetak zvanyja «niačesnyja žurnalisty». Ja maju na ŭvazie, što ŭžo 15 hod u nas žurnalisty padzialajucca na dziaržaŭnych — faktyčna, prapahandystaŭ — i niedziaržaŭnych, jakija sabralisia vakoł Biełaruskaj asacyjacyi žurnalistaŭ. Jon z hetych.
Nia pamiataju, kab jon kali zdradziŭ svaim hramadzianskim pryncypam, svajmu sumleńniu».
Alaksandar Michalčuk za dastatkova karotki čas paśpieŭ papracavać u šerahu niedziaržaŭnych vydańniaŭ, u tym liku ŭ internecie. Byłaja kaleha Michalčuka pa «BDH» Śviatłana Kalinkina adznačaje admietnyja rysy žurnalista:
«Pry tym, što Michalčuk byŭ takim ścipłym čałaviekam, jaki nia lez napierad, jamu ŭsio było cikava. I kali praanalizavać, dzie jon paśpieŭ papracavać, to akažacca, što heta prajekty, jakija pačynalisia z nula i byli absalutna novymi dla našaj krainy. Prykładam, mienavita Saša byŭ pieršym redaktaram sajtu open.by. Heta jahonaja takaja admietnaja rysa — cikaŭnaść da ludziej i da padziej».
U apošni čas Alaksandar Michalčuk pracavaŭ nad pierakładami, supracoŭničaŭ z šeraham zamiežnych vydańniaŭ.
Pachavańnie Alaksandra Michalčuka adbudziecca 12 červienia na Kaładziščanskich mohiłkach.