Ledź tolki Rasija prytarmaziła kredytnuju tranšu na paŭmiljarda dołaraŭ, jak MVF paabiacaŭ Minsku ceły miljard źvierchu.
Moža, tak supała. Ale atrymałasia efiektna. Pamiatajecie, paśla skandału na majskim «sajuznym saŭminie», kali rasijski ministr Kudryn skazaŭ, što jaho ŭrad prytrymaje tranšu, Łukašenka zahadaŭ svaim čynoŭnikam nie kłaniacca Rasii i šukać ščaścia ŭ inšaj častcy płaniety.
I tut ža misija MVF rekamienduje radzie dyrektaraŭ hetaj pavažanaj arhanizacyi pavialičyć kredytnuju padtrymku Biełarusi na miljard dołaraŭ.
U pryvatnaści, vielmi čakanaja Minskam druhaja tranša ŭžo adkrytaha kredytu stend-baj moža skłaści nie 425, a ažno 675 miljonaŭ dołaraŭ. Dadamo: MVF daje ŭ pazyku na bolš miakkich, čym Rasija, umovach: LIBOR + 0,75% (apošni rasijski kredyt idzie pad LIBOR + 3%).
Viadoma, biaspłatny syr byvaje tolki ŭ pastcy. Łukašenka vydaŭ tajamnicu: za hetuju tranšu Kreml chacieŭ pryznańnia Abchazii i Paŭdniovaj Asiecii. Prymaŭka pra syr całkam dapasujecca i da hrošaj MVF.
«Peŭnyja siły na Zachadzie ličać, što kali pierachapić u Rasii prava kredytavać Biełaruś, to heta dapamoža viarnuć našu krainu na kurs reformaŭ. Sumnieŭny tezis», — zajaviŭ libieralny minski ekanamist Jarasłaŭ Ramančuk. Pavodle jaho mierkavańnia, MVF zadumaŭ «dosyć niebiaśpiečnuju hulniu ź biełaruskimi ŭładami. Hulniu, što pahražaje Biełarusi vialikimi abaviazańniami, jakija buduć pieranosicca na nastupnyja pakaleńni».
Tak ci inačaj, ale paciapleńnie adnosin ź Jeŭrasajuzam, Zachadam uvohule pašyraje dla biełaruskaha kiraŭnictva mahčymaści bałansavać pamiž hieapalityčnymi centrami. Maskva pačynaje niervavacca — i spačatku pałochaje, a potym pałochajecca sama. I prapłačvaje łajalnaść.
I voś užo rasijski pasoł Surykaŭ na pres-kanfierencyi ŭ Minsku 11 červienia musić ŭłahodžvać situacyju: maŭlaŭ, nas nie tak zrazumieli, nichto vam hetyja 500 miljonaŭ nie admaŭlaŭsia davać i nichto rublami brać nie prymušaŭ! Tym samym jon dezavujuje Kudryna, jaki narakaŭ biełarusam, što viernuć nos ad valuty z dvuchhałovym arłom.
Surykaŭ u pryncypie maje racyju, kali havoryć, što choć Biełaruś i ŭvajšła va «Uschodniaje partniorstva» Jeŭrasajuza, ale «ab źmienie viektaru zamiežnaj palityki havorka nie idzie».
Minsk prosta hulaje hetymi viektarami. Varta Łukašenku namiaknuć, što ŭ vypadku hieapalityčnaj pieraaryjentacyi, pierachodu pad kryło ES i ZŠA, rakiety NATO buduć pad Smalenskam, — jak maskoŭskich stratehaŭ zaklinoŭvaje. Nibyta i raskusili daŭno hetuju niachitruju hulniu, ale tradycyjnyja fobii spracoŭvajuć.
Tak što i małočnuju vajnu prytušać (na što ŭžo daŭ admašku Pucin), i haz buduć pradavać pa litasnaj siaredniehadavoj canie (pra heta zajaviŭ Surykaŭ), i 500 miljonaŭ daduć, nikudy nie dzienucca, i ŭzbrajeńnia padkinuć tannaha.
Skazaŭ ža Łukašenka rasijcam, što dziesiacimiljonny žyvy ščyt (a heta ŭsio nasielnictva Biełarusi, uklučna ź niemaŭlatami) «nie maje cany».
Karaciej, pa vialikim rachunku vy, panovie rasijcy, u nieapłatnym daŭhu. Ale chalera z vami, davajcie kolki možacie! :)
