Alaksandr Łukašenka admoviŭsia ad udziełu ŭ siesii Rady kalektyŭnaj biaśpieki Arhanizacyi Damovy pra kalektyŭnuju biaśpieku ŭ Maskvie. Pryčyna — situacyja z pastaŭkami biełaruskaj małočnaj pradukcyi ŭ Rasiju.
Takoje rašeńnie było pryniataje paśla apieratyŭnaje narady pa situacyi z pastaŭkami małaka ŭ Rasiju ŭ subotu. Niahledziačy na zajavy rasijskaha boku pra ŭrehulavańnie situacyi, pieraškody na pastaŭki małaka i tvarahoŭ zastajucca. Abmiežavańni na impart majuć charaktar sanitarnych zachadaŭ, ale supali ŭ časie z asabista-palityčnym kanfliktam Łukašenki z Pucinym i Kudrynym i nakłalisia na niežadańnie biełaruskaha ŭradu pryvatyzavać małakapierapracoŭku ŭ ruki rasijskich pretendentaŭ.
«Adnym ź impieratyvaŭ majuć stać miery pa ŭmacavańni ŭzajemnaj ekanamičnaj biaśpieki členaŭ ADKB. U hetym kantekście my asabliva vitajem praryŭnyja rašeńni ŭ ramkach JeŭrAzES, u toj ža čas, na naš vialiki žal, na prastory ADKB stali javaj nadta niehatyŭnyja źjavy ŭ śfiery ekanamičnaje supracy», — zajaviŭ pres-sakratar biełaruskaha MZS Andrej Papoŭ.Ukraina, Małdova i krainy Bałtyi ŭ svoj čas adraklisia prapanovaŭ Maskvy pra ŭdzieł u ADKB, Uźbiekistan prypyniaŭ udzieł u arhanizacyi.«U ciapierašni čas my śviedkami adkrytaj ekanamičnaj dyskryminacyi z boku adnaje ź dziaržavaŭ ADKB suprać Biełarusi pa važnaj tavarnaj hrupie. Padobnyja dziejańni abjektyŭna podryvajuć ekanamičnuju biaśpieku — heta značyć asnovu asnovaŭ stabilnaści i, adpaviedna, kompleksnaj i ŭsioabdymnaj biaśpieki», — skazaŭ Papoŭ.
«U składzienaj situacyi Biełaruś ... była vymušanaja pryniać rašeńnie pra admienu svajho ŭdziełu ŭ siesii ADKB 14 červienia ŭ Maskvie», — padsumavaŭ jon.
ADKB, prarasijski anałah NATO, abjadnoŭvaje Rasiju, Biełaruś, Kazachstan, Kirhiziju, Armieniju i Tadžykistan, adnak faktyčna daminuje ŭ im Rasija.
Martynaŭ painfarmavaŭ Łaŭrova pra toje, što Biełaruś nie raździalaje pytańniaŭ vajennaje i ekanamičnaje biaśpieki.
Siońnia ž krynicy ŭ Administracyi prezidenta Biełarusi paviedamili pra namier Biełarusi ŭvieści mytny i pamiežny kantrol na miažy z Rasijaj — anałahičny tamu, što viadziecca rasijskim bokam.
Niahledziačy na toje, što Biełaruś atrymlivaje štohod šmatmiljardnyja subsidyi ad Rasii i pravodzić całkam prarasijskuju zamiežnuju palityku, a taksama adaptavała svaje mytnyja taryfy da rasijskich, miž dźviuma krainami pieryjadyčna ŭspychvajuć ekanamičnyja kanflikty. Samymi znakamitymi byli hazavaja i cukrovaja vajna, jakija pryviali da źmieny taryfaŭ i kvotaŭ na pastaŭki.
