Biełaruskaja delehacyja admoviłasia lacieć na samit ADKB. Łukašenka, jak zajaviła jaho pres-słužba, «nie bačyć sensu». Pryčyna — małočnaja vajna.
Zajavy i paviedamleńni biełaruskaha boku nahadvajuć stylistykaj zvodki Saŭinfarmbiuro. Łukašenkava pres-słužba ŭpieršyniu naŭprost kaža pra handlovyja vojny, pra namier Maskvy pastavić biełarusaŭ na kaleni (nu voś, bačycie, i na samym viersie biez ekivokaŭ zanialisia vychavańniem nacyjanalnaj samaśviadomaści :).
Lejtmatyŭ: jakija mohuć być tary-bary pra kalektyŭnuju biaśpieku, kali naniesieny taki ŭdar pa ekanamičnaj biaśpiecy našaj krainy?
Sapraŭdy, jak zaznačaje analityk Valer Karbalevič, «małako — zbroja palityčnaja». Heta 14% našaha ekspartu ŭ Rasiju, miljard dołaraŭ za hod.
Učora Minsk abvieściŭ, što Łukašenka zatrymlivaje vylet. Vidać, była nadzieja, što Kreml dy ichny Bieły dom (ta ža zaraz duumvirat, i Pucin ci nie najmacniej zakusiŭ hubu) daduć zadni chod. Usio ž
bajkot samitu ADKB stratehičnym chaŭruśnikam — vypadak biesprecedentny. Dy i pahroza biełaruskaha načalstva pastavić na ŭschodniaj miažy pahrancoŭ z mytnikami — heta vam nie žartački. Usia zaduma «WTO na traich» (Rasija, Kazachstan, Biełaruś u adnym fłakonie) moža lasnucca.
Ale kasa natrapiła na kamień. Rasijskija viarchi taksama vyrašyli nie davać słabiny, pajšli na pryncyp. Siońnia ichni hałoŭny sanitarny doktar Aniščanka tak i skazaŭ: nijakich pasłableńniaŭ pa małaku, pakul biełarusy nie aformiać usie naležnyja papiery!
«U situacyi, što skłałasia, Biełaruś, jakaja čakała da apošniaha momantu skasavańnia dyskryminacyjnaj zabarony i ŭrehulavańnia pytańnia va ŭstanoŭlenym dziejnymi mižnarodnymi pahadnieńniami paradku, była vymušana pryniać rašeńnie pra admienu svajho ŭdziełu ŭ siesii Rady kalektyŭnaj biaśpieki ADKB 14 červienia 2009 hoda ŭ Maskvie», — zajaviŭ siońnia pres-sakratar MZS Andrej Papoŭ.
Niama licha biez dabra. I ciapier u Minska zručnaja nahoda adkinuć padalej cełaje biaremia niepryjemnych pytańniaŭ. I KSAR, i jašče toje-sioje... Tak, staršynia mižnarodnaj kamisii pałaty pradstaŭnikoŭ Maskievič (niahledziačy na niadzielu, biełaruskija parłamientary družna robiać zajavy — kali hetkaje było?) daje zrazumieć, što z takoj palitykaj Maskva naŭrad ci chutka dačakajecca pryznańnia Abchazii z Paŭdniovaj Asiecijaj. Jašče bolej, u pałacie pradrakajuć rost palityčnaj napružanaści miž Minskam i Maskvoj. Śmiełyja ŭ nas stali deputaty! :)
Adrazu naprošvajucca dźvie vysnovy.
Pieršaja:
reč nie tolki ŭ małace. Vidać, apošnim časam Maskva, adčuŭšy ciažkaje finansavaje stanovišča Biełarusi, zapatrabavała ad jaje kiraŭnictva zašmat. Nie zastavałasia inšaha vyjścia, jak pajści na abvastreńnie.
Druhi momant: biełaruskaje kiraŭnictva, musić, spadziajecca na padtrymku Zachadu. Mahčyma, na hety kont jość peŭnyja damoŭlenaści. Va ŭsiakim razie, jak tolki Maskva zatarmaziła $500 młn., MVF paabiacaŭ dadatkovy miljad. Prylacieli emisary Suśvietnaha banku, JEBRR. Supadzieńnie?
Pryčym dla biełaruskaha kiraŭnictva pavyšajucca šancy praciskać na Zachadzie svoj «prahmatyčny padychod» da narmalizacyi adnosin. Maŭlaŭ, ci čas taŭčy pra demakratyju, kali niezaležnaść pad pahrozaj? Davajcie svaje miachi z dołarami, i chutčej!
Ułada atrymlivaje vyjhryš i va ŭnutranaj palitycy. Pa-pieršaje, nacyja kansalidujecca pierad impierskaj pahrozaj (dziaržaŭnyja ŚMI ŭžo ŭpeŭniena apierujuć takoj terminałohijaj). Pa-druhoje, zaraz značna lahčej tłumačyć elektaratu, jakija złyja siły niasuć adkaznaść za kryzis, devalvacyju, prasiadańnie ŭzroŭniu žyćcia. Vonkavy vorah — dla tutejšaj prapahandy prosta padarunak.
Tearetyčna małočnaja vajna daje mahčymaść pabić uvieś posud na kuchni sajuznaj dziaržavy. Ale naŭrad ci baki pojduć na heta. Zanadta vialikaja ŭzajemnaja zaležnaść. U značnaj stupieni heta zaležnaść — psichałahičnaja. Asabliva z boku Rasii. Kreml musić adhulać nazad i vyjdzie z hetaha kanfliktu ź imidžavymi stratami.
«Kančatkovaha razryvu miž ciapierašnim biełaruskim kiraŭnictvam i Maskvoj u pryncypie nie moža być, — miarkuje analityk Valer Karbalevič. — Rasijskaja elita nie moža dazvolić sabie stracić Biełaruś, a jana, u svaju čarhu, zanadta zaležnaja ad rasijskaj padtrymki. Tak što abodva baki zacikaŭleny ŭrehulavać kanflikt».
Tym časam Maskva sprabuje zrabić dobruju minu. Ministr Łaŭroŭ zajaviŭ, što adsutnaść biełarusaŭ nie pieraškodzić padpisać na samicie ADKB zapłanavanyja papiery. Biełarusy tym bolej nie stanuć pieražyvać, što Kalektyŭnyja siły apieratyŭnaha reahavańnia pakul abyducca bieź ich :)
Kaniečnie ž, niejkaje zamireńnie budzie. Adnak dystancyja miž farmalnymi chaŭruśnikami peŭna pavialičycca.
Niekali Łukašenka skazaŭ: našy stasunki z Rasijaj nazaŭždy atručany hazam. Ciapier jany jašče i padmočany małakom.
ZY. Tym časam našy pahrancy rapartujuć pra hatoŭnaść zakryć miažu. Niekali Łukašenka vykopvaŭ tam słup na paru z Čarnamyrdzinym. Chacieli jak lepiej... Ci pajeduć zaraz ukopvać nazad?
