Z 15 červienia da 6 vieraśnia budzie dziejničać novaja prahramnaja sietka na telekanale «Biełsat».
Jak paviedamiŭ BiełaPAN vykanaŭca abaviazkaŭ pres-sakratara kanała Siarhiej Pielasa, heta źviazana ź pierachodam na letni hrafik pracy.
Efir, jak i raniej, budzie pačynacca a 18-j hadzinie i doŭžycca da poŭnačy. Nie źmieniać času vychadu infarmacyjnyja prahramy. Start budzie davać karotkaje, praciahłaściu dźvie chviliny, vydańnie «Ab`iektyva» — hetak zvany fłeš, u jakim hledačy zmohuć aznajomicca z asnoŭnymi temami hałoŭnaha vypusku. Jon budzie vychodzić pa-raniejšamu ŭ 21.00, ale jaho praciahłaść pavialičycca z 15 da 20 chvilin. Paŭtor možna budzie pahladzieć ŭ 23.40.
Na karotki adpačynak u lipieni pojdzie prahrama «Hość «Biełsata». U letnija miesiacy taksama buduć adpačyvać prahramy «Paštoŭka ź Vilni», «Asabisty kapitał» (ź lipienia), «Salda», YoLife!, «Kinastužka», «Tydzień z «Radyjo Svaboda», «Maju prava» i «Kuchnia».
Adnak letniaj paroj telekanał pryhadaje najvažniejšyja temy tok-šou «Forum», najlepšyja vydańni YoLife!, «Chto jość kim», «Nieviadomaj Biełarusi», «Biez retušy», a taksama najbolš udałyja kancerty. Usie hetyja prahramy viernucca ŭ efir u vieraśni. Źniknie tolki muzyčnaja «Kružełka», jakaja źmienić farmat i nazvu.
«Razam z tym u vakacyjny pieryjad buduć praciahvacca čarhovyja prem`iery prahramaŭ, pryśviečanych aktualnym hramadskim padziejam, z udziełam znakavych postaciaŭ: «Pres-ekspres», «Hość «Biełsata», a taksama niadzielnaja prahrama «Akno ŭ Jeŭropu», jakaja stvarajecca ŭ partniorstvie ź Jeŭrapiejskaj kamisijaj. Cikaŭnaść da jeŭrapiejskaj tematyki majuć zadavalniać i novyja sieryi cykła «Jeŭrapiejski sajuz biez sakretaŭ», u jakim siarod inšaha aśviatlajecca historyja stvareńnia ES, pryncypy jaho funkcyjanavańnia, śpiecyfika krainaŭ, što ŭžo składajuć ES ci mahli b u jaho ŭvajści», — paviedamiŭ Pielasa.
Čarhovy błok poŭnamietražnych filmaŭ vyjdzie u efir pad nazvaju «Dakumientalnaja hadzina». Hety cykł skłali tvory, što atrymali vysokuju acenku na šmatlikich fiestyvalach, i niaredka «Biełsat» budzie adzinym telekanałam, jaki paznajomić biełarusaŭ z hetymi unikalnyja stužkami. «Naprykład, z pracaju łatyša Edvinsa Snore «Savieckaja historyja», u jakoj pakazvajecca, jak Saviecki Sajuz nie tolki vyniščaŭ ludziej «u pramysłovych maštabach», ale i supracoŭničaŭ z Trecim rejcham», — adznačyŭ Pielasa.
