fota - Andrej Lankievič
Kreatyŭnaść u čałavieka ŭ kryvi, talent abo jość, abo, na žal, niama, ale dziela spraviedlivaści varta dadać, što navat siamu-tamu zvyštalenavitamu pačatkoŭcu jość čamu pavučycca ŭ prafiesijanałaŭ. Uładalniki tvorčych prafiesijaŭ: kinascenarysty, aktory, televiadoŭcy, litaratary i rekłamniki, padaduć na našym sajcie svaje 10 załatych praviłaŭ, jakich jany trymajucca i jakimi kirujucca ŭ svaim ramiastvie. Pieršym zaprašaje zazirnuć pa toj bok rampy dramaturh i kinascenaryst Andrej Kurejčyk.
1. Pa‑pieršaje, scenaryst pavinny adkazać sabie na hałoŭnaje pytańnie: čym dramaturhija adroźnivajecca ad usich astatnich vidaŭ litaratury. Tolki ŭśviadomiŭšy admietnuju pryrodu dramaturhii, možna prystupacca da napisańnia scenaru abo pjesy.
2. Nikoli nie spyniacca ŭ daskanaleńni svajho scenaru. Scenar nikoli nie byvaje dastatkova dobry. U kino jość niaźmiennaje praviła: «Kino nielha źniać lepiej za sam scenar». A voś horš — lohka…
3. Scenaryst pavinny być hatovym da supolnaje pracy. Najpierš, z režysioram i pradusaram. Da taho ž, rol scenarysta ŭ kamandzie — nie lidera, a intelektualnaha centru.
4. Być ciarplivym. Cykł kinavytvorčaści nadta doŭhi: ad hodu da piaci. U hetych umovach scenarystu ŭvieś čas davodzicca pracavać nad tym samym scenarom.
5. Daskanała viedać technałohiju stvareńnia kino. Scenar — nie tolki tvor mastactva, ale techzadańnie dla ŭsich cechaŭ: mastakoŭ, apierataraŭ, aśviatlalnikaŭ, kaściumieraŭ, adździełu markietynhu i h.d.
6. Być naziralnym. U adroźnieńni ad teatru, kino nie tryvaje ŭmoŭnaściaŭ. U scenary ŭsio pavinna mieć poviaź z realnym žyćciom.
7. Kino — žanravaje mastactva. Adno razumiejučy pryrodu kinažanraŭ, možna dasiahnuć pośpiechu.
8. Być hatovym da rasčaravańniaŭ: adno krychotny pracent scenaroŭ dachodzić da realizacyi. Da taho ž, čaściakom, dachodzić zusim nie ŭ tym vyhladzie, u jaki jaho napisali.
9. Vučycca. Suśvietny kiniematohraf daje nievyčerpnyja mahčymaści da paznańnia hetaha mastactva. Hladzieć i analizavać kino — častka prafiesii scenarysta.
10. Kožny tvoj nastupny scenar musić być lepšy za papiaredni. Adna paraza — i ciabie bolš niama ŭ hetaj prafiesii.
Andrej Kurejčyk — dramaturh, kinascenaryst i aktor. Aŭtar pjesaŭ «Pjemoncki źvier» i «Poncij Piłat», što byli pastaŭlenyja ŭ Teatry biełaruskaj dramaturhii i Kupałaŭskim teatry. Scenar da kamiedyi «Luboščy‑miłoščy» («Lubov‑morkov») z Hošam Kucenkam i Kryścinaj Arbakajte, prynios Kurejčyku łaŭry adnaha z samych paśpiachovych scenarystaŭ rasiejskaha kino za 2008 hod.
