16 červienia 2009 hodu ŭ sudzie Savieckaha rajonu Minska adbyŭsia sudovy praces pavodle pazovu Haliny Jubko da redakcyi haziety «Sovietskaja Biełoruśsija» i jaje aŭtara Viktara Panamarova.
Nahodaj staŭ artykuł V. Panamarova «Nia vieru» ŭ «SB» za 18 lutaha 2009 h., u jakim jon piša pra hrupu žančynaŭ — svajačak asudžanych, a taksama niazhodnych z rašeńniami sudoŭ.Halina Jubko, jak udzielnica hrupy žančynaŭ, paličyła, što aŭtar artykułu nanios škodu jaje honaru i hodnaści. Pavodle jaje słovaŭ, žurnalist adnabakova apisaŭ prablemu, zajaviŭšy, što bolšaść žančynaŭ usimi praŭdami i niapraŭdami namahajucca palehčyć los svajakoŭ, asudžanych pieravažna za ciažkija złačynstvy — zabojstvy, zhvałtavańni, rabavańni.
Voś niekalki cytataŭ z artykułu.
«U apošni čas u nas sfarmavałasia dosyć vialikaja i dynamičnaja hrupa žančyn, jakija, skardziačysia na niespraviadlivyja, na ich dumku, prysudy, faktyčna sami vynosiać vierdykty, apraŭdvajuć i navat «sudziać»... ułasna pravasudździe. Žorstka, nie strymlivajučysia ŭ acenkach. Heta žonki, maci i babuli asudžanych (mužoŭ, synoŭ, unukaŭ...) — za ciažkija, jak praviła, złačynstvy».«Siońnia žančyny, jakich abjadnała hora i jakija abjadnalisia ŭ «pošukach praŭdy», z usioj utrapionaściu cisnuć na sudy i śledstva, pryvodziać ułasnyja «viersii», strasajuć atmaśfieru jurydyčnymi terminami i, nie abmiažoŭvajučysia ciskam na miascovaje pravasudździe, zasypajuć listami mižnarodnyja pravaachoŭnyja arhanizacyi».
Tym časam, hrupa žančyn, da jakoj naležyć i Jubko, abjadnała ludziej z samymi roznymi historyjami, siarod jaje ŭdzielnikaŭ jość i tyja, chto baronić svaje ŭłasnyja pravy — ad majomasnych pytańniaŭ, da vykryćcia faktaŭ karupcyi. Sama Halina Pachomaŭna ad 2004 hodu namahajecca vyśvietlić akaličnaści śmierci rodnaj siastry.
Sudovaje pasiedžańnie ciahnułasia amal da 6-j viečara. Padtrymać Halinu Jubko pryjšło kala troch dziesiatkaŭ čałaviek — nabiłasia poŭnaja zała. Pavodle słovaŭ jurysta Tamary Siarhiej, sud pryniaŭ rašeńnie admović u zadavalnieńni pazovu Haliny Pachomaŭny da redakcyi haziety «Sovietskaja Biełoruśsija» i jaje aŭtara Viktara Panamarova. Pryčyna — žančyna «nie dakazała fakt raspaŭsiudu infarmacyi, jakaja niasie škodu jaje honaru i hodnaści». «Heta pry tym, što u sud H. Jubko pryniesła piśmovy adkaz ad redaktara «SB» Paŭła Jakuboviča, u jakim jon pryznaŭ, što apisanaja ŭ artykule hrupa žančyn mienavita taja, da jakoj naležyć Jubko» – patłumačyła T. Siarhiej. Jašče adnym dokazam byŭ list z Administracyi prezidenta, kudy źviartałasia žančyna (u artykule Panamarova havaryłasia, što Łukašenka daŭ zahad jašče raz hruntoŭna pravieryć skarhi hrupy). Tam taksama paćvierdzili, što adpaviedny zahad byŭ zrobleny i što na ŭvazie majecca mienavita hetaja hrupa žančynaŭ. Tamara Siarhiej dadała, što na hetym jany nie spyniacca i praciahnuć źviartacca ŭ sud.
Halina Jubko. Fota Andreja Lankieviča.
