Rasija i Biełaruś zaviaršyli pieramovy pa «małočnaj» prablemie i zaklučyli kampramisnaje pahadnieńnie. Takuju zajavu zrabiła ŭviečary 16 červienia ministr sielskaj haspadarki RF Alena Skryńnik.
«My na pazityŭnaj nocie skončyli našy kansultacyi, pieramovy i zaklučyli pahadnieńnie, jakoje zadavalniaje abodva baki», — cytuje Skryńnik RIA Novosti.
Pavodle słoŭ Skryńnik, u vyniku sumiesnaj pracy baki «damovilisia «abnulić» uvoz suchoha małaka ź Biełarusi ŭ druhim i trecim kvartałach».
U pieryjad hetak zvanaha «vialikaha małaka» rasijskija vytvorcy dla vyrabu suchoha małaka buduć nabyvać małočnuju pradukcyju ŭ svaich sielhasvytvorcaŭ. Heta, akramia inšaha, dazvolić vyklučyć varyjant dempinhu suchoha małaka, rastłumačyła ministr.
«Adnačasova Rasija pavialičyć abjom impartu biełaruskaha tvarahu, syru i masła ŭ adpaviednaści ź nieabchodnymi patrebami našaj krainy», — skazała Skryńnik.
Jana padkreśliła, što padčas pieramoŭ rasijski i biełaruski baki «adpracavali miechanizmy kantrolu dasiahnutych damoŭlenaściaŭ, jakija buduć niaŭchilna vykonvacca».
«My razumiejem, što Rasija i Biełaruś — heta brackija krainy, jany pavinny raźvivać uzajemny handal, ale jon zaklikany mieć uzajemna vyhadny charaktar», — padkreśliła ministr.
Kamientaryj Skryńnik źjaviŭsia ŭžo paśla taho, jak biełaruskaje kiraŭnictva adklikała z Maskvy delehacyju, jakaja viała pieramovy ab pastaŭkach małočnaj pradukcyi ŭ RF. Namieśnik ministra sielskaj haspadarki i charčavańnia Biełarusi Michaś Savieljeŭ abvinavaciŭ Rasspažyŭnahlad u niežadańni vyrašać prablemu.
***
Nahadajem, aficyjny Minsk zajaviŭ ab uviadzieńni ŭzmocnienaha režymu kantrolu za pieramiaščeńniem hruzaŭ na asnoŭnych rasijska‑biełaruskich mahistralach z 9.00 17 červienia. Takoje rasparadžeńnie daŭ kiraŭnik Dziaržaŭnaha mytnaha kamiteta Alaksandr Špileŭski u suviazi z ukazańniem prezidenta.
«Za 15 dzion červienia 2009 hoda mytnymi orhanami ŭ zvyčajnym režymie pracy zatrymana kantrabandnych tavaraŭ na sumu 8 młrd. 620 młn. rubloŭ. Za 2008 hod na kalininhradskim kirunku źnikła hruzaŭ na 10 młn. dołaraŭ», — rastłumačyŭ Špileŭski.
U svaju čarhu dziaržsakratar Savieta biaśpieki Biełarusi Juryj Žadobin zajaviŭ, što rašeńnie biełaruskich uładaŭ źjaŭlajecca «simietryčnym adkazam» na dziejańni rasijskaha boku.
«Hetyja zachady buduć całkam anałahičnyja tym dziejańniam, jakija ŭžo na praciahu mnohich hadoŭ praktykuje rasijski bok u asobie orhanaŭ Fiederalnaj mytnaj słužby», — skazaŭ kiraŭnik Savieta biaśpieki.
Pavodle jaho słoŭ, biełaruski bok vymušany sa škadavańniem kanstatavać, što nijakich źmien u padychodach rasijskich partnioraŭ da supracoŭnictva apošnimi dniami tak i nie adbyłosia. «Adsutničaje ŭsialaki kanstruktyŭny padychod, naceleny na ŭzajemaprymalnaje rašeńnie. Pad nadumanymi padstavami praciahvaje nanosicca ŭron našaj ekanamičnaj biaśpiecy», — padkreśliŭ Žadobin.
