Pra heta BiełaPAN paviedamili ŭ pres‑słužbie mytni.
«Nijakich novych dakumientaŭ z Rasspažyŭnahlada my pakul nie atrymlivali, ale my ich čakajem. Pryjduć novyja dakumienty — budziem pracavać zhodna ź imi, a pakul pracujem jak i raniej», — adznačyŭ supracoŭnik Smalenskaj mytni. Pavodle jaho słoŭ, biełaruskaja małočnaja pradukcyja pa‑raniejšamu častkova nie prapuskajecca ŭ Rasiju.
Jak paviedamlałasia raniej, Rasspažyŭnahlad patrabuje ad biełaruskich vytvorcaŭ małočnych praduktaŭ zachavańnia techničnaha rehłamientu.
Nahadajem, 5 červienia Rasija i Biełaruś adkarektavali prahnozny bałans pastavak biełaruskaj małočnaj pradukcyi ŭ RF u 2009 hodzie. Była dasiahnuta damoŭlenaść ab skaračeńni abjomaŭ pastavak suchoha małaka sa 110 da 70 tys. ton i ab pavieličeńni pastavak biełaruskaha syru i tvarahu sa 100 da 132 tys. ton.
6 červienia Rasspažyŭnahlad zabaraniŭ uvoz u Rasiju amal 500 vidaŭ biełaruskaj małočnaj pradukcyi ŭ suviazi z tym, što biełaruskija vytvorcy nie pieraaformili dazvolnuju dakumientacyju ŭ adpaviednaści z patrabavańniami techrehłamientu, jaki nabyŭ moc u śniežni 2008 hoda.
8 červienia byŭ zabaronieny ŭvoz u Rasiju jašče 593 najmieńniaŭ biełaruskaj małočnaj pradukcyi.
9 červienia ŭ efiry telekanała «Viesti 24» kiraŭnik Rasspažyŭnahlada Hienadź Aniščanka zajaviŭ, što na terytoryju Rasii zabaronieny ŭvoz praktyčna ŭsioj biełaruskaj małočnaj pradukcyi — zabarona raspaŭsiudžvajecca na pradukcyju bolš jak tysiačy najmieńniaŭ, «za vyklučeńniem 50‑60 pazicyj».
11 červienia na pieramovach ź biełaruskaj delehacyjaj u Maskvie Aniščanka abaznačyŭ umovy skasavańnia časovaj zabarony na ŭvoz biełaruskaj pradukcyi. «My vykłali tyja ŭmovy, na jakich małočnaja pradukcyja ź Biełarusi moža viarnucca ŭ Rasiju, na rasijski rynak. Hetyja ŭmovy stroha vynikajuć ź fiederalnaha zakona ad 13 červienia 2008 hoda «Techničny rehłamient na małako i małočnuju pradukcyju», — skazaŭ čynoŭnik.
17 červienia Biełaruś uviała ŭzmocnieny režym kantrolu za pieramiaščeńniem hruzaŭ na asnoŭnych rasijska‑biełaruskich mahistralach.
Jak zajaviŭ dziaržsakratar Savieta biaśpieki Biełarusi Juryj Žadobin, rašeńnie biełaruskich uładaŭ źjaŭlajecca «simietryčnym adkazam» na dziejańni rasijskaha boku. «Hetyja zachady buduć całkam anałahičnyja tym dziejańniam, jakija ŭžo na praciahu mnohich hadoŭ praktykuje rasijski bok u asobie orhanaŭ Fiederalnaj mytnaj słužby», — skazaŭ kiraŭnik Savieta biaśpieki.
U Fiederalnaj mytnaj słužbie Rasii dziejańni biełaruskaha boku kamientavać admovilisia.
