Fota ź sajtu Jeŭraradyjo
Adzin z hałoŭnych pretendentaŭ na ŭdzieł ad Biełarusi ŭ «Dziciačaj Eŭravizii» Jury Dziemidovič pieraśpiavaje svaju pieśniu «Vołšiebnyj krolik» pa‑biełarusku. Maładomu śpievaku vielmi spadabałasia ideja zrabić biełaruskamoŭny varyjant svajho tvoru, jaki ŭsiaho za niekalki dzion staŭ sapraŭdnym internet‑hitom.
Jura Dziemidovič zaśpiavaŭ užo ŭ try hady. Jon dobra pamiataje svaju pieršuju pieśniu, jakuju vykanaŭ na publicy — heta byŭ ramans «Bielejet parus odinokij».
U dzieviać hod jon trapiŭ u «Kapełu chłopčykaŭ» — chor pry Respublikanskim muzyčnym kaledžy. Kapeła maje ŭžo 50‑hadovuju historyju. Adsiul vyjšli salisty biełaruskaj Opery, kamernaha arkiestru, charavoj kapeli, choru «Unija» dy hrupy «Kamerata». Kiraŭnik choru Ŭładzimier Hłušakoŭ ličyć, što i ŭ Jury Dziemidoviča — vialikaja budučynia.
Chłopiec ciapieraka — viadučy salist choru. Niekali jon navat śpiavaŭ na śviatočnym kancercie z nahody vizytu maskoŭskaha patryjarcha Aleksija II.Samyja ŭdałyja jaho numary — «Santa Łučyja», «O sole mio», a ź biełaruskich — «Radzima, maja darahaja». Jura nazyvaje siarod svaich ulubionych vykanaŭcaŭ Pavaroci, Karuza dy Łareci.
Pieśnia «Vołšiebnyj krolik» zusim nietypovaja, jak dla repertuaru Kapeli, dzie śpiavaje Dziemidovič. Słovy i muzyku vykanaŭca napisaŭ da jaje sam pad upłyvam tvoru «Alisa ŭ krainie cudaŭ». Adrazu paśla vykanańnia tvoru na poŭfinale adboru na «Dziciačuju Eŭraviziju» 1 červienia, jon zajmieŭ ašałamlalny pośpiech. Ciapier kolkaść prahladaŭ videa na hetu pieśniu na youtube.com nabližajecca da 290 000.U sacyjalnych sietkach arhanizavalisia fen‑kluby Jury, źjavilisia roznastajnyja interpretacyi śpievu, prapanujucca majki z vyjavami «trusika» i šyrycca dyskusija nakont patajemnych sensaŭ hetaj pieśni. Sam Jura z svaim kiraŭnikom Uładzimieram Hłušakovym staviacca da hetaha spakojna: «Hałoŭnaje, što ŭ našaj pieśni šmat słuchačoŭ!», — zajaŭlajuć jany.
Jura z zadavalnieńniem pahadziŭsia zrabić z «krolika» — «trusika» i pachvaliŭsia, što biełaruskuju movu vučyć staranna. Maje pa hetym pradmiecie ŭ škole vaśmiorku, a pa biełaruskaj litaratury — dyk naohuł dzieviatku. Chłopčyk razam z svaim nastaŭnikam pryniali prapanovu «Tuzina Hitoŭ» uziać pierakład litaratara Siarhieja Bałachonava.
Praca nad «Čaroŭnym trusikam» pačniecca ŭžo na nastupnym tydni.
***
U prajekcie «Tuzin. Pierazahruzka» internet‑partału «Tuzin Hitoŭ» i hramadzkaj kampanii «Budźma biełarusami» biaruć udzieł 12 samych cikavych ajčynnych niebiełaruskamoŭnych vykanaŭcaŭ roznych stylaŭ, jakich łučyć aryhinalnaść materyjału, prafesyjnaść u muzyčnym padychodzie i žadańnie ekśpierymentavać. Kožny ź ich pierazapiša adzin z svaich hitoŭ u biełaruskamoŭnym varyjancie, vykananym prafesyjnym pierakładčykam. Usie pieśni buduć prezentavanyja na staronkach Tuzin Hitoŭ i Budźma
