Inviestar i dabračynca Džordž Soras vydzielić dadatkovyja 100 młn dalaraŭ Centralnaj i Ŭschodniaj Jeŭropie. Hetyja srodki pojduć na źmiakčeńnie nastupstvaŭ haspadarčaha kryzisu dla biednych, dobraachvotnych tavarystvaŭ i niaŭradavych arhanizacyj. Pra heta piša piatničnaje vydańnie haziety «Financial Times».
Soras zaklikaje Jeŭrasajuz taksama vydzielić bolš srodkaŭ nie tolki krainam hetaha rehijonu, što ŭžo ŭstupili ŭ ES, ale i Ŭkrainie. Miljardera niepakojać tendencyi ŭmacavańnia krajnie levych i pravych, šavinistyčnych siłaŭ u Vuhorščynie, Rumynii, Baŭharyi, Słavaččynie.
Soras za svajo žyćcio achviaravaŭ užo kala troch miljardaŭ dalaraŭ na dabračynnyja mety. Jon, uradženiec Vuhorščyny, jaki cudam uniknuŭ hibieli ad hitlercaŭ, paśla ad savietaŭ, ličyŭ svaim abaviazkam spryjać pabudovie demakratyčnaha ładu i padtrymcy kaštoŭnaściaŭ adkrytaha hramadstva ŭ byłoj zonie savieckaha panavańnia. U Biełarusi Fond Sorasa dziejničaŭ da 1997 hodu, paśla čaho byŭ zakryty Łukašenkam. Ułady mierkavali, što Fond pracuje na źmienu ładu ŭ krainie.
