Valutny kalidor pavialičany da 10%. Ułady parušyli słova, dadzienaje zusim niadaŭna, u studzieni, i pačali novuju devalvacyju. Piša Jahor Marcinovič.
31 śniežnia 2008 hoda. Navahodni zvarot prezidenta Biełarusi A.Łukašenki: «Ułada nie dapuścić abvału i chaosu, nie zdradzić vašamu davieru. My nikoli nie zdradzim svajmu pryncypu – kłopatu ab čałavieku!»
Praź dzień ułada zajaviła pra adnamomantavuju 20%‑uju devalvacyju biełaruskaha rubla. U adzin momant nasielnictva zhubiła kala miljarda dalaraŭ. Tady ž było pryniata rašeńnie: za hod utvorany valutny košyk moža źmienšycca ci pavialičycca na 5%. Čynoŭniki kazali, maŭlaŭ, na 5% rubiel devalvavacca moža. Ale nie chvalujciesia: ni kropli bolš. Ustalavanaja miaža stała simvałam ćviordaści kursa, abranaha Nacbankam. Ułada nieadnarazova chvaliłasia svaim umieńniem trymać rubiel – na niekatory čas valutny košyk navat apuskaŭsia da nižniaj miažy…
5 traŭnia 2009 hoda. Kiraŭnik Nacbanku P.Prakapovič: «Adstupleńniaŭ nie budzie, pierahladu kalidora ŭ toj ci inšy bok nie płanujecca. Dla nas nieprymalnyja parady pra pašyreńnia kalidora da 15% ci praviadzieńnie jašče adnoj devalvacyi».
Siońnia Nacyjanalny bank raptam pieradumaŭ.
Z 22 červienia 2009 hoda miežy valutnaha kalidora pašyranyja na 48 rubloŭ u abodva baki, da 1056 rubloŭ.Rašeńnie, ahučanaje hałoŭnym bankiram krainy, nie stała šakujučym, jano i nie pryniesła imhniennych vynikaŭ, takich, jak, naprykład, abvał rubla. Sapraŭdy, usio łahična išło da pašyreńnia kalidora. Heta pradkazvali niezaležnyja ekanamisty, hetaha z naściarohaj čakała i nasielnictva. Ale kali ciabie padmanvajuć – usio adno niepryjemna. A dziaržava znoŭ padmanuła svaich hramadzian.
Jak aceńvać dziejańnie Nacbanku?
Plusy
Hałoŭny plus rašeńnia – stvareńnie mahčymaściaŭ dla manioŭraŭ pry farmiravańni kursaŭ valut.Raniej Nacbank pavinny byŭ vykručvacca, kab nie vyjści za ŭstalavany kalidor, bo, kali ros jeŭra, prychodziłasia štučna apuskać dalar, i naadvarot. Ciapier bankiry mohuć adčuć siabie bolš volna, kursy valut buduć bližejšymi da rynkavych, a nie padahnanymi pad pakazalnik.
Pašyreńnie kalidoru – vykanańnie prośbaŭ Mižnarodnaha valutnaha fondu,jaki ŭžo paśpieŭ uchvalić dziejańni biełaruskaha boku. Značycca, kraina moža raźličvać na dadatkovy miljard dalaraŭ kredytu ad suśvietnych valutčykaŭ.
Stanoŭčyja momanty dla ekanomiki mohuć źviazanyja z devalvacyjaj, paŭkroki dla praviadzieńnia jakoj zroblenyja. Tym nie mienš kazać pra palohki biełaruskamu ekspartu i ŭvohule ajčynnamu vytvorcu pakul rana. Dziaržava pradekłaravała svai namiery, ale kankretnych zachadaŭ nie ažyćciaviła.
Minusy
Davier finansavaj palitycy dziaržavy znoŭ padarvany. Nichto nie ŭ stanie dakładna pradkazać, jak adhukniecca na navinu nasielnictva, ci nie vykliča rašeńnie Nacbanka paniku siarod układčykaŭ.
Varta ŭličvać, što, źmianiŭšy pamier valutnaha košyka za paŭhodu ahułam na 5%, bankiry pavialičyli kurs dalara na 7,43%, a jeŭra – 6,6%. Takim čynam,
jašče 5% devalvacyi rubla mohuć dać ahulny rost amierykanskaj valuty sa studzienia na 10—14%. Tady dalar dasiahnie ŭzroŭniu ŭ 3050 rubloŭ. Jeŭra ž, kali praciahnie ruchacca ŭ tempie pieršaha paŭhodździa, budzie kaštavać 4200 rubloŭ.
22 červienia 2009. Nacyjanalny bank: «Na praktycy ŭ bližejšaj pierśpiektyvie vykarystańnie pašyranaha kalidora nie płanujecca». I tut ža: «U vypadku praktyčnaha vykarystańnia źmieny kalidora buduć adbyvacca płaŭna, biez prymianieńnia značnych razavych karektyrovak».
Inšymi słovami: my nie budziem ničoha źmianiać, ni‑čo‑ha! Ale kali i budziem, to aściarožna! Paŭstaje pytańnie, dyk «budziem» ci «nie budziem»?
Piotr Prakapovič adkazvaje na pytańnie, padkreślivajučy: «Minimum miesiac situacyja z kursam rubla źmianiacca nie budzie».
Zrešty, chto‑niebudź vieryć tym, chto ŭžo schłusiŭ?..
