Piaty hod u Hłybockim rajonie prymajuć haściej u svajoj siadzibie Jury i Julija Buka. Dla biełaruskamoŭnych naviednikaŭ dziejničaje źnižka.
Vioska Vałodźkava, dzie mieścicca siadziba, znachodzicca ŭ 12 kiłamietrach ad Hłybokaha, da Połacku adsiul kala 70 kiłamietraŭ, a da stalicy — usie 180. Ale jeduć siudy z usioj krainy. Bolšaść naviednikaŭ vabić cišynia i spakoj — pobač les, voziera Akuniova.
A taksama zusim nievysokija, jak navat pa biełaruskich mierkach, košty — sutki pražyvańnia ŭ lepšaj z chatak, dzie jość sanvuzieł, hazavaja plita, ladoŭnia, posud i televizar, kaštuje 15 tysiač rubloŭ z čałavieka.Hety damok źmiaščaje 4-5 čałaviek. U dźviuch inšych chatkach vyhodaŭ pakul niama. U adnoj ź ich źmiaščajecca 2-4 čałavieka (cana — 10 tysiač za sutki), u druhim možna prymać vialikuju kampaniju da 15 čałaviek (cana — pa 7 tysiač z čałavieka). U apošnim damku ludzi čaściej spyniajucca pa niekalki siemjaŭ na vychodnyja. Astatnija pasłuhi — za dadatkovuju apłatu: trochrazovaje charčavańnie — 15 tysiač, katańnie na łodcy — 5, na kani (navučańnie dla navičkoŭ) — 5, łaźnia — 10-15 tysiač (u zaležnaści ad kolkaści žadajučych). Nieciažka padličyć, što samy darahi varyjant adpačynku ŭ «Rodnym kucie» budzie kaštavać dla adnaho čałavieka kala 60 tysiač za sutki.
«Našy hości kažuć, što takimi cenami my tolki klijentaŭ pałochajem — maŭlaŭ, što ž tam za siervis budzie za takija hrošy?» — śmiajecca haspadynia Julija Ludvihaŭna. I tłumačyć: «My admysłova trymajem nievysokija ceny na pasłuhi, kab pryvabić bolš ludziej da siabie, pryvučyć ich, što adpačyvać možna i ŭ našym krai».
Haspadary siadziba prapanujuć i źnižki: 20% dla biełaruskamoŭnych haściej, a taksama nievialikija źnižki dla haściej ź dziećmi, dla vialikich hrupaŭ.Zasialeńnie ŭ damki nieznajomych pamiž saboj hrupaŭ, ci siemjaŭ biez voli na toje haściej nie praktykujecca. Siadziba dziejničaje kruhły hod.
Pačałosia ŭsio z taho, što Juliju Ludvihaŭnu paprasili raźmiaścić u siabie mastakoŭ, jakija pasiarod zimy źjechalisia na Hłyboččynu na plener.Było heta piać hadoŭ tamu, aficyjna ž siadziba pracuje treci hod. «Niekali było tak, što za siezon pryjazdžała ad siły 20 čałaviek, a ciapier, jak dzień nichto nie pryjedzie, to pieražyvaju». Hod tamu ŭ Vałodźkavie sustrakali śvitanak miascovyja školniki. Dla haspadaroŭ siadziby heta byŭ cikavy, ale ciažkavaty vopyt. «Bolš takoha nie praktykujem, bo dzieci — heta vialikaja adkaznaść» — dzielicca ŭražańniem Julija Buka. A voś dni narodzinaŭ dy inšyja ŭračystaści ŭ ich stali adznačać usio čaściej, zadumvajucca i pra viasielli. «Jość u nas prablemy, šmat što treba davieści da ładu, ale hałoŭnaje toje, što my ŭžo majem stałych klijentaŭ. I heta pry adsutnaści naležnaj rekłamy» — havoryć haspadynia. Chutka na trasie R45 źjavicca rekłamny ščyt z ukazalnikam šlachu da siadziby.
«My zaŭsiody byli nie takija, jak usie, hladzieli na śviet pa-inšamu» — kaža Julija Buka, jakaja žyvie maraj zarablać ź vioski hadoŭ tryccać. Uvieś hety čas jana była ŭpeŭnienaja, što taja pryroda, ciša i spakoj, jakija panujuć ŭ ichnich miaścinach, prosta idealnyja dla adpačynku. «Ciažkaści jość, ale ŭsio ŭ nas budzie dobra» — z aptymizmam zaznačaje haspadynia siadziby.
***
Zamović damok u «Rodnym kucie» možna pa telefonach:
8-02156-3-63-57
8-029-109-51-89
Fota westki.info
