U Viciebskaj vobłaści na treniroŭcy zahinuła 38-hadovaja biełaruskaja viełahonščyca Zinaida Stahurskaja.
Fota prosto-free.livejournal.com.
Jak paviedamili BiełaPAN u DAI MUS, DTZ adbyłosia 25 červienia ŭ 13.45 na 93-m kiłamietry aŭtadarohi miaža Rasijskaj Fiederacyi — Viciebsk — Homiel, dzie spartsmienka pravodziła treniroŭku. Aŭtamabil "Chonda CR-V" z rasijskimi numarami, jakim kiravała žycharka Sankt-Pieciarburha 1967 hoda naradžeńnia, ruchajučysia ŭ bok Oršy, pačaŭ pieramiaščacca na pałasu sustrečnaha ruchu, nie źmianiajučy chutkaści.
Pa sustrečnaj pałasie na aŭtamabili "VAZ-2104" jechaŭ trenier, a za im na adlehłaści 10 mietraŭ Zinaida Stahurskaja. Aŭtamabili raźminulisia, a viełasipiedystka trapiła pad koły "Chondy", jakaja zatym ź`iechała ŭ kiuviet. Ad atrymanych traŭmaŭ spartsmienka pamierła na miescy,
a vadziciel dastaŭlena ŭ reanimacyju Viciebskaj abłasnoj kliničnaj balnicy.
Nacyjanalny alimpijski kamitet Biełarusi "hłyboka smutkuje z nahody trahičnaj hibieli zasłužanaha majstra sportu Respubliki Biełaruś, čempijonki śvietu 2000 hoda, pieramožcy ahulnaha zaliku žanočaj mnahadnieŭki Tour de France u 2002 hodzie, čempijonki i pryziora najbujniejšych mižnarodnych spabornictvaŭ pa viełasporcie Stahurskaj Zinaidy Uładzimiraŭny i vykazvaje hłybokaje spačuvańnie svajakam niabožčycy".
"Heta vialikaja trahiedyja, — zajaviŭ BiełaPAN ministr sportu i turyzmu Alaksandr Hryharaŭ. — Heta trahičnaja vypadkovaść, jakaja zabrała žyćcio adnoj z najbolš jarkich zorak biełaruskaha viełasportu i lepšaj pradstaŭnicy krainy ŭ šašejnych honkach".
