Našy antykamunisty mohuć śviatkavać: 3 lipienia Parłamienckaja asambleja Arhanizcyi biaśpieki i supracoŭnictva ŭ Jeŭropie pryniała rezalucyju: «Abjadnańnie padzielenaj Jeŭropy: abarona pravoŭ čałavieka i hramadzianskich svabod u XXI stahodździ ŭ rehijonie ABSIE». U hetym dakumiencie ABSIE asudziła nacyzm i stalinizm za hienacyd i złačynstvy suprać čałaviečnaści, pryznała ich vinavatymi ŭ raźviazvańni Druhoj suśvietnaj vajny i abviaściła 23 žniŭnia – dzień padpisańnia paktu Rybientropa–Mołatava – Dniom pamiaci achviaraŭ nacyzmu i stalinizmu. Piša Anatol Sidarevič.
Z hledzišča farmalnaj łohiki i prava PA ABSIE pryniała pravilnaje rašeńnie.
Jość dźvie krajnija palityčnyja płyni: kamunizm (levaja) i fašyzm (pravaja). Ale kamunizm jak płyń u sacyjaliźmie isnavaŭ ź pieršaje pałovy XIX st. Mielisia navat relihijnyja formy kamunizmu, i ŭ duchu Jevanhiella tahačasnyja kamunisty abviaščali ŭsich ludziej bratami. Jak samastojnaja levaja płyń kamunizm aformiŭsia ŭ 1919 hodzie, kali byŭ zasnavany Kamunistyčny Internacyjanał. Tady ž, u 1919‑m, u Italii uźnikajuć i pieršyja fašysckija arhanizacyi.
U kamuniźmie XX st. šmat płyniaŭ. Adna ź ich – balšavizm. U balšaviźmie vyłučajecca stalinizm.
U fašyźmie taksama šmat raznavidnaściaŭ: ułasna italjanski fašyzm, fašyzm ibieryjski (partuhalski i ispanski), nacyjanał‑sacyjalizm (byŭ navat biełaruski) i h.d.
PA ABSIE zrabiła słušna, nie asudziŭšy kamunizm jak płyń, bo ŭ lik asudžanych mahli b trapić kamunisty – achviary nacyzmu i stalinizmu, kamunisty, jakija zahinuli, zmahajučysia suprać, fašyzmu (Italija, Partuhalija, Ispanija), nacyzmu i stalinizmu.
Kali razvažać łahična, to, asudžajučy nacyzm jak adnu z raznavidnaściaŭ fašyzmu, PA ABSIE pavinna była b asudzić i balšavizm jak adnu z raznavidnaściaŭ kamunizmu. Adnak hetaha nie adbyłosia. PA ABSIE asudziła tolki stalinizm, h. zn. balšavizm stalinskaj epochi (1930–1953 hh.).
PA ABSIE nie asudziła balšavizm. Choć stalinizm arhanična vyras z balšavickaj nieciarpimaści, z balšavickaha ekstremizmu, ź leninizmu, pravavaja dumka Jeŭropy, mabyć, zvažajučy na achviary, paniesienyja ŭ epochu stalinizmu balšavikami i kamunistami šmat jakich krain, ustrymałasia ad asudžeńnia balšavizmu.
Suprać rašeńnia PA ABSIE vielmi vajaŭniča zmahałasia delehacyja Rasii – pravapierajemnicy SSSR. Jano i zrazumieła: kali prava na kampiensacyju daŭno ŭžo majuć achviary nacyzmu, ciapier zajavić svaje pretenzii mohuć i achviary stalinizmu. Niamieččyna ŭžo daŭno płacić za złačynstvy nacyzmu. Ci budzie płacić achviaram stalinizmu Rasija – pytańnie ŭžo nie tearetyčnaje, pustaparožniaje, a kankretnaje i złabadzionnaje.
