Kiraŭnik Rasiejskaha imperatarskaha doma kniahinia Maryja Ramanava 16‑18 lipienia naviedaje Homielskuju vobłaść.
Pra heta BIEŁTA paviedamili ŭ pres-słužbie Homielskaha abłvykankamu. Tam adznačyli, što kniahinia pryjaždžaje ŭ Biełaruś, kab «sustrecca z suajčyńnikami, pakłanicca śviatyniam biełaruskaj ziamli i ŭšanavać pamiać abaroncaŭ Ajčyny».
Kamentujučy hetaje paviedamleńnie pieršy namieśnik staršyni Partyi BNF Vincuk Viačorka adznačyŭ:
«Ramanavy — zavajoŭniki našaj Baćkaŭščyny. Kryvavyja. Na rukach Ramanavych kroŭ vajaroŭ Kaściuški, Kastusia Kalinoŭskaha j Zyhmunta Sierakoŭskaha, pałamanyja losy Bahryma j Bahuševiča dy miljonaŭ, miljonaŭ biełaruskich sialanaŭ i šlachty, śviataroŭ, miaščanaŭ, kniazioŭ…
Rekrutčyna j niabačany raniej pryhon. Hvałtoŭny razryŭ haspadarčych suviaziaŭ z Eŭropaj i spynieńnie raźvićcia volnaha rynku. Pieraśled usich vieravyznańniaŭ, akramia «dziaržaŭnaha». Urešcie, zabarona ŭžyvańnia samoha imia našaj movy i našaha narodu, zabarona druku pa‑biełarusku — voś što takoje Rasiejskaja imperyja dla biełarusaŭ, u jakich akupantam nie ŭdałosia amputavać pamiać».
Pavodle spadara Viačorki, Ramanavy ličać siabie pierajemnikami rasiejskaha manaršaha pasadu.
«Tamu tolki paśla publičnaha prabačeńnia pierad narodam Biełarusi za ahresiŭnyja zachopnickija vojny, za 145 hod kalanijalnaha paniavoleńnia,za etnacyd i pieraśled biełaruskaj movy im moža być dazvolena pierasiekčy miažu niezaležnaj Biełarusi»
Pavodle načalnika ŭpravy idealohii homielskaha abłvykankamu Anatola Kaciły, heta «kulturny» vizyt.
«Viačorka maje prava pisać usio, što jamu zachočacca.
Ja liču, što luby vizyt, kali jon pryniasie dabro krainie, pavinien adbycca. Tym bolš, što dzieci za svaich baćkoŭ nie adkazvajuć.
Kulturny vizyt i jość kulturnym, i nie pieraśleduje nijakich palityčnych metaŭ. Naviedaje pałac Rumiancavych, pahladzić słavutaści, čamu b i nie?Davoli ŭpłyvovaja asoba ŭ svajoj sfery i kali jana raskaža pra Homiel heta ž tolki plus. Nia vyklučana, što pryciahnie turystaŭ, jakim zachočacca daviedacca bolš pra našu krainu. Što tut drennaha?» — zadajecca pytańniem Kaciła.
