Što za ludzi znachodziacca na kiroŭnych pasadach u Biełarusi? Dzie jany naradzilisia? Kolki im hadoŭ? Dzie vučylisia? Chto słužyŭ u armii? Kaho bolš u najvyšejšych ešałonach — homielskich ci mahiloŭskich?
Kab adkazać na hetyja pytańni, my ŭziali bijahrafii premjer‑ministra i jahonych namieśnikaŭ, supracoŭnikaŭ Administracyi prezidenta, dvuch śpikieraŭ vierchniaj i nižniaj pałataŭ parłamientu, staršyniaŭ asnoŭnych sudoŭ, hienprakurora, kiraŭnikoŭ Rady biaśpieki i Nacbanku, ministraŭ, staršyniaŭ dziaržaŭnych i nacyjanalnych kamitetaŭ, a taksama kiraŭnikoŭ abłaściej. Ahułam pavinna było atrymacca 60 čałaviek, adnak vakantnymi na siońnia źjaŭlajucca miescy ministra pracy i sacyjalnaj abarony (paśla pavyšeńnia Patupčyka) i mera Minsku (paśla chvaroby Paŭłava), tamu vyjšła 58 piersanalijaŭ.
Najbolš barysaŭskich i babrujskich
Kali brać miescy naradžeńnia čynoŭnikaŭ, to dosyć pradkazalna pieršym idzie Minsk. U stalicy naradziłasia šeść čałaviek. Heta staršynia Viarchoŭnaha Sudu Valancin Sukała, hienprakuror Ryhor Vasilevič, staršynia Dziaržaŭnaha kamitetu pa navucy i technałohijach Ihar Vojtaŭ, pieršy namieśnik kiraŭnika Administracyi prezidenta Natalla Piatkievič, ministr finansaŭ Andrej Charkaviec i ministr kultury Pavieł Łatuška. Troje apošnich — siarod najmaładziejšych u atačeńni Łukašenki.
Čatyry čałavieki naradzilisia ŭ Barysavie i rajonie. Adtul adrazu try ministry — suviazi i infarmatyzacyi (Mikałaj Pancialej), justycyi (Viktar Hałavanaŭ), transpartu i kamunikacyj (Ivan Ščerba). Taksama na Barysaŭščynie naradziŭsia staršynia Dziaržkamitetu pa majomaści Hieorhij Kuźniacoŭ.
Try čałavieki va ŭładzie byli sa Słonimščyny. Adnak paśla zvalnieńnia ministra pryrodnych resursaŭ Lavoncija Charužyka słonimskich pamienieła. Zastałosia dvoje. Zatoje jakich!
Najpierš heta kiraŭnik Administracyi prezidenta Uładzimir Makiej. Darečy, nidzie ŭ aficyjnych krynicach nie značycca dakładnaje miesca naradžeńnia Uładzimira Uładzimiraviča. Pišuć prosta «Hrodzienskaja vobłaść». Bolš padobnych vypadkaŭ niama.
Taksama sa słonimskich ziemlaŭ ministr abarony Leanid Malcaŭ. Cikavaja akaličnaść, abodva «słonimkija» ministry da niadaŭniaha času znachodzilisia na svajoj pasadzie najbolš z čalcoŭ Saŭminu. Charužyk — ź lutaha 2001 hoda, Malcaŭ — z sakavika taho ž hoda. Taksama pryznačencam vaśmihadovaj daŭniny byŭ były kiraŭnik MUS Uładzimir Navumaŭ.
Z Babrujsku pachodziać ministr handlu Valancin Čekanaŭ, ministr enerhietyki Alaksandr Aziarec, a taksama staršynia Mytnaha kamitetu Alaksandr Špileŭski.
Premjer‑ministr Siarhiej Sidorski i staršynia Homielskaha abłvykankamu Alaksandr Jakabson — z Homiela.
Staršynia Vyšejšaha haspadarčaha suda Viktar Kamiankoŭ i ministr ŽCHH Uładzimir Biełachvostaŭ — ź Białynickaha rajonu. Z Smarhonščyny — staršynia pamiežnaha kamitetu Ihar Račkoŭski i ministr pramysłovaści Alaksandr Radzievič.
Bolš paŭtareńniaŭ niama. Pa adnym čynoŭniku naradziłasia ŭ nastupnych rajonach: Vaŭkavyski, Loźnienski, Vilejski, Miadzielski, Pružanski, Žytkavicki, Kalinkavicki, Pietrykaŭski, Śvietłahorski, Mahiloŭski, Lidski, Drahičynski, Ivacevicki, Smalavicki, Bychaŭski, Vałožynski, Lubanski, Iŭjeŭski, Asipovicki, Łuniniecki, Aršanski, Kaściukovicki, Niaśvižski, Brahinski, Mazyrski, Červienski.
Adzinym škłoŭskim pa naradžeńni byŭ Michaił Paŭłaŭ, jaki niadaŭna pakinuŭ pasadu načalnika stalicy.
Kadebisty — ź inšych krainaŭ
11 čałaviek z kiraŭnictva krainy naradzilisia za jaje miežami. Rasija jak miesca naradžeńnia značycca ŭ pašpartach 6 čynoŭnikaŭ, Ukraina — 2, Azierbajdžan — 2, Armienija — 1.
U Naŭharodskaj vobłaści pryjšoŭ na śviet vice‑premjer Viktar Bura, jahony kaleha Andrej Kabiakoŭ — u Maskvie. Praŭda, apošni niadaŭna raskazvaŭ, što ŭ Biełarusi žyvie ad trochhadovaha ŭzrostu.
Ź siała Sima Jurjeŭ‑Polskaha rajonu Uładzimiraŭskaj vobłaści — namieśnik kiraŭnika Administracyi prezidenta Leanid Anfimaŭ. Radzima ministra ekanomiki Mikałaja Zajčanki — Prymorski kraj. Z uschodniaj susiedki taksama ministry architektury Alaksandr Sielaźnioŭ i staršynia Vajenna‑pramysłovaha kamitetu Mikałaj Azamataŭ.
Va Ukrainie naradzilisia tolki dvoje vysokich słužboŭcaŭ, ale chto — były i siońniašni staršyni KDB. Z Dnieprapiatroŭsku pachodzić kiraŭnik Rady biaśpieki Jury Žadobin, z Žytomirskaj vobłaści — hałoŭny čekist krainy Vadzim Zajcaŭ.
Ziemlakami źjaŭlajucca ministry pa nadzvyčajnych situacyjach i ŭnutranych spravaŭ Envier Baryjeŭ i Anatol Kulašoŭ adpaviedna. Jany naradzilisia ŭ nievialičkim 68‑tysiačnym azierbajdžanskim haradku Ali‑Bajramły, jaki niadaŭna byŭ pierajmienavany ŭ Šyrvan.
U armianskim Leninakanie naradziŭsia budučy ministr zamiežnych spravaŭ Biełarusi Siarhiej Martynaŭ.
Zrešty, staleńnie amal usich vyšejpieraličanych čynoŭnikaŭ adbyvałasia ŭ Biełarusi. Vyklučeńniem źjaŭlajucca chiba što Žadobin i Zajcaŭ.
Najmienš viciebskich
Takim čynam, praporcyi va ŭładzie vyhladajuć nastupnym čynam: krainy SND i Minskaja vobłaść — pa 11 čałaviek (19% ad ahulnaj kolkaści), Mahiloŭskaja vobłaść — 9 (15,5%), Homielskaja vobłaść — 8 (13,8%), Hrodzienskaja vobłaść — 7 (12%), Minsk — 6 (10,3%), Bresckaja vobłaść — 4 (6,9%), Viciebskaja vobłaść — 2 (3,4%).
Adnak źviestki pra miesca naradžeńnia mała značać u razumieńni palityčnych poviaziaŭ. Važniej toje, u jakim miescy čałaviek rabiŭ pracoŭnuju karjeru.
Dyk voś, niahledziačy na nie samaje vialikaje pradstaŭnictva ŭradžencaŭ Mahiloŭščyny, tamtejšy abłvykankam i rajkamy źjaŭlajucca sapraŭdnaj kuźniaj kadraŭ na pavyšeńnie. Adtul vyjšli Viktar Kamiankoŭ, namieśnik kiraŭnika Administracyi prezidenta Mikałaj Snapkoŭ, Alaksandr Sielaźnioŭ, Uładzimir Biełachvostaŭ, ministr adukacyi Alaksandr Radźkoŭ, Valancin Čekanaŭ, Viktar Hałavanaŭ, staršynia Hrodzienskaha abłvykankamu Uładzimir Saŭčanka. Choć jany nie ŭsie naradzilisia na Mahiloŭščynie, ale ŭsie tam pracavali.
Z Homielskaj vobłaści vyjšaŭ ceły šerah «krepkich chaziajstvieńnikaŭ», ludziej, jakija siońnia rasparadžajucca nadzionnymi pytańniami biełaruskaj ekanomiki — Siarhiej Sidorski, a taksama adrazu čatyry vice‑premjery: Uładzimir Siamaška, Andrej Kabiakoŭ, Ivan Bambiza i Uładzimir Patupčyk.
Čverć piensijanieraŭ
Vyvučeńnie dataŭ naradžeńnia čynoŭnikaŭ pakazała, što siarod biełaruskaha kiraŭnictva ažno 15 čałaviek (25,9%) — ludzi piensijnaha ŭzrostu. Maładym kadram Łukašenka nie daviaraje.
Na piensii pavinny ŭžo siadzieć śpikiery abiedźviuch pałataŭ parłamientu Barys Batura i Uładzimir Andrejčanka, hałoŭny sudździa Valancin Sukała, staršynia Kamitetu dziaržkantrolu Zianon Łomać, staršynia Nacbanku Piotr Prakapovič, kiraŭnik spravaŭ Alaksandra Łukašenki Mikałaj Damaškievič, a taksama Uładzimir Siamaška, Mikałaj Zajčanka, Uładzimir Biełachvostaŭ, — ministry infarmacyi — Uładzimir Rusakievič, lasnoj haspadarki — Piotr Siamaška, abarony — Leanid Malcaŭ, pa padatkach i zborach — Hanna Dziejka, kiraŭnik VPK Mikałaj Azamataŭ, staršynia Bresckaha abłvykankamu Kanstancin Sumar.
Duajen Azamataŭ
Darečy, samym stałym u hetym śpisie źjaŭlajecca staršynia Vajenna‑pramysłovaha kamitetu Mikałaj Azamataŭ. Jamu ažno 71 hod.
Jašče siemnaccaci čynoŭnikam 55 i bolš hadoŭ. Ludzi piensijnaha i pieradpiensijnaha ŭzrostu składajuć najbolšuju častku ŭ najvyšejšych ešałonach ułady. Takim čynam, dalejšyja kadravyja pierastanoŭki prosta niepaźbiežnyja.
Najmałodšy — Łatuška
Tytułam samaha maładoha čynoŭnika moža pachvalicca novaśpiečany ministr kultury — 36‑hadovy Pavieł Łatuška. Tolki na hod za jaho starejšaja Natalla Piatkievič. Bolš 30‑hadovych va ŭładzie niama.
Za imi iduć Mikałaj Snapkoŭ (40 hadoŭ), staršynia pamiežnaha kamitetu Ihar Račkoŭski, ministr sportu i turyzmu Aleh Kačan (abodvum pa 41 hodzie), namieśnik kiraŭnika Administracyi prezidenta Valeryj Mickievič, Envier Baryjeŭ, Vadzim Zajcaŭ (usim pa 45).
Siaredni ŭzrost biełaruskaha čynoŭnika najvyšejšaha ranhu składaje 54,2 hadoŭ. Cikava, što da niadaŭnich kadravych źmienaŭ u čatyroch ministerskich fatelach i ŭ adnym dziažaŭnym kamitecie siaredni ŭzrost skaładaŭ 54,9 hadoŭ — roŭnieńka stolki, kolki maje i Alaksandr Łukašenka (nar. 30 žniŭnia 1954 h.). Ciapier lider dziaržavy staŭ kryšku starejšym za ludziej z svajho atačeńnia, ci nie ŭpieršyniu za čas svajho kiravańnia.
Chočaš kiravać — pastupaj u Narhas
Najbolšaj papularnaściu siarod čynoŭnikaŭ karystajecca Narhas. Tam atrymali chto jak pieršuju, chto jak druhuju adukacyju Łomać, Kabiakoŭ, Charkaviec, Anfimaŭ, Piotr Siamaška, ministr sielskaj haspadarki Siamion Šapira, Čekanaŭ, Račkoŭski, staršynia Nacyjanalnaha statystyčnaha kamitetu Uładzimir Zinoŭski, Całko, Ščerba.
Choć jašče niadaŭna liderstvam vałodała politechničnaja adukacyja, jaje majuć 10 čałaviek. Minski BNTU skončyli Batura, Uładzimir Siamaška, Bura, Patupčyk, Zajčanka, Anfimaŭ, Aziarec, Vojtaŭ. Dypłom Navapołackaha palitechu maje Sielaźnioŭ, a Mazyrskaha — ministr pryrodnych resursaŭ Uładzimir Całko.
Stolki ž skončyła i BDU. Ale pieravahu hetaja VNU mieła najpierš u jurystaŭ — staršynia Kanstytucyjna sudu Mikłaševič, Sukała, Kamiankoŭ, Vasilevič, Piatkievič, Mickievič, Hałavanaŭ.
Sielskahaspadarčuju adukacyju majuć Snapkoŭ, Dziejka, Kuźniacoŭ, Saŭčanka, Rusakievič, Sumar, Andrejčanka, Bambiza.
Praz Vyšejšuju partyjnuju škołu prajšli ŭ svoj čas Andrejčanka, Łomać, Damaškievič, Bambiza, Hałavanaŭ, Sumar. Užo za časami niezaležnaści Akademiju kiravańnia skončyli Charkaviec, Snapkoŭ, Baryjeŭ, Čekanaŭ, Zinoŭski, Ščerba, Vojtaŭ i staršynia Mahiloŭskaha abłvykankamu Piotr Rudnik.
Čatyry čałavieki majuć piedahahičnuju adukacyju (Łomać, Kačan, Rusakievič i Radźkoŭ). Tolki adzin Uładzimir Makiej skončyŭ injaz. Dadatkovy dypłom Linhvistyčnaha maje i Pavieł Łatuška, ale ŭ aficyjnych bijahrafijach heta nie adznačana.
Varta adznačyć jašče toje, što Makiej i Rudnik — adzinyja z čynoŭnikaŭ, chto vučyŭsia ŭ krainach tak zvanaha dalokaha zamiežža. U 1992—1993 hadach pieršy prachodziŭ navučańnie ŭ Dypłamatyčnaj akademii MZS Aŭstryi, a druhi ŭ svoj čas pa abmienie pabyvaŭ u HDR, u Drezdenie.
Zatoje absalutna nijakaj biełaruskaj adukacyi nie maje kadebist Vadzim Zajcaŭ. Za jahonymi plačyma Maskoŭskaje vyšejšaje pahraničnaje kamandnaje vučylišča (1986), Akademija fiederalnaj pahraničnaj słužby RF (1997), Vajennaja akademija Hienieralnaha štabu Uzbrojenych siłaŭ RF (2004).
Siarod ekzatyčnaha možna źviarnuć uvahu na toje, što Andrej Kabiakoŭ skončyŭ Maskoŭski avijacyjny instytut.
Sidorski ŭ vojsku nie słužyŭ
Ź bijahrafij, što źmieščanyja na sajcie dziaržaŭnaha ahienctva BIEŁTA, vynikaje, što słužbu ŭ vojsku prachodzili Andrejčanka, Mikłaševič, Makiej, Uładzimir Siamaška, Bura, staršynia Minskaha abłvykankamu Uładzimir Krupiec. I, naturalna, usie siłaviki.
Ale, naprykład, bijahrafija Sidorskaha havoryć pra toje, što słužbu ŭ vojsku premjer‑ministr nie prachodziŭ. Jak i Prakapovič, Charkaviec, Snapkoŭ.
Chto dakładna ŭ vojsku nie słužyŭ, dyk heta biełaruskija čynoŭnicy. Adnak ich u Alaksandra Łukašenki tolki dźvie (3,4%) — Piatkievič i Dziejka.
Idealny čynoŭnik — Leanid Anfimaŭ
Takim čynam, siaredni biełaruski čynoŭnik — mužčyna, jaki naradziŭsia za miežami krainy ci ŭ Minskaj vobłaści, maje 54 hady i skončyŭ narhas. Pad hetaje apisańnie najlepš padychodzić namieśnik kiraŭnika Administracyi prezidenta Leanid Anfimaŭ. Čałaviek absalutna niepubličny, navat šery, ale ŭpłyvovy.
