Skački na pryz prezidenta Rasii sabrali 18 lipienia, miakka kažučy, ścipłuju kampaniju hanarovych haściej. I choć hetym razam zboru nie nadavaŭsia status samitu SND biez halštukaŭ, kožny z zaprošanych Miadźviedzievym pa-svojmu adkazaŭ na firmavaje rasijskaje pytańnie: «Ty mianie pavažaješ?». Łukašenka skački praihnaravaŭ.
Vyjhraŭ spabornictva rasijski žarabok Manamach. Uvohule ž hetaje mierapryjemstva adlustravała pravał rasijskaj palityki na absiahu SND, miarkujuć naziralniki.
Pakazalna, chto pryjechaŭ, a chto nie pryjechaŭ na skački. Inačaj kažučy, chto zakusiŭ cuhli.
Na zaprašeńnie Miadźviedzieva adhuknulisia prezidenty Armienii, Azierbajdžana, Kazachstana, Małdovy, Tadžykistana. Pieršyja dvoje abmierkavali pry pasiarednictvie rasijskaha kalehi karabachskuju prablemu. Nazarbajeŭ nie praminuŭ znoŭ pakazać siabie najlepšym intehrataram (chacia nasamreč i ŭ jaho z Maskvoj nie ŭsio hładka). Kišynioŭ i Dušanbe całkam zaležać ad kramloŭskaj ekanamičnaj łaski.
U toj ža čas Juščanka, jaki tolki što abvieściŭ namier znoŭ bałatavacca ŭ prezidenty, demanstratyŭna vybraŭsia ŭ Karpaty.
Pamiž Turkmienistanam i Kramlom — surjoznyja supiarečnaści na hazavaj hlebie. Pakryŭdžany Ašchabad, zdajecca, daśpiavaje da ŭvachodžańnia ŭ prajekt «Nabuka», jaki dazvolić pampavać haz u Jeŭropu ŭ abychod Rasii.
Znajšoŭ adhavorku kirhizski kiraŭnik. Biškiek niadaŭna pradynamiŭ Maskvu, znoŭ daŭšy bazu amierykanskim letunam.
Dalej: uźbiekski aŭtakrat Karymaŭ daŭno adyšoŭ ad šoku andyžanskaj bojni, kali daviałosia prytulicca da Kramla, i znoŭ viadzie svaju hulniu, u pryvatnaści z tymi samymi Štatami. Pakazalna, što Uźbiekistan, jak i Minsk, nie padpisaŭ pahadnieńnie ab KSAR ADKB (pry tym što mienavita Karymaŭ łabijavaŭ hetuju ideju paśla padziej u Andyžanie ŭ 2005 hodzie).
A voś małdaŭski prezident Varonin, naadvarot, łaviŭ na skačkach svoj šaniec pierad vyrašalnymi dla jaho paŭtornymi parłamienckimi vybarami, pryznačanymi na 29 lipienia. Lider kamunistaŭ prahnie davieści, što zdolny prabić u Maskvie finansava-ekanamičnuju padtrymku.
Z łaski Pucina Małdovie zaśviaciŭ kredyt na paŭmiljarda dołaraŭ (akurat stolki ž «niedadali» Biełarusi z abiacanych dvuch miljardaŭ, što Łukašenka ŭ intervju Die Presse paabiacaŭ nadoŭha zapomnić). Simptomam paciapleńnia ŭ stasunkach miž Kišyniovam i Maskvoj stała i toje, što raptam padabreŭ hałoŭny sanitarny doktar Aniščanka, jaki raniej vajavaŭ suprać małdaŭskaha vina. Ciapier jaho dazvolena hnać u Rasiju cysternami.
Biełarusaŭ ža toj samy Aniščanka praciahvaje strašyć druhoj małočnaj vajnoj. U piatnicu Łukašenka admysłova papiaredziŭ svaich čynoŭnikaŭ, kab da 1 žniŭnia ŭtreśli ŭsie pytańni z techrehłamientam na tyja syry-tvarahi. Ambasadar Surykaŭ nasupierak zajavam Łukašenki praciahvaje ćvierdzić, što biełarusy sami prapanavali śpis małakazavodaŭ na prodaž.
Zrešty, małočnaja vajna — tolki adna z prajaŭ sistemnaha kryzisu dvuchbakovych dačynieńniaŭ. I pačaŭsia jon nie ŭčora. Simvaličnaja fraza Pucina pra much i katlety pahučała ŭ 2002 hodzie. Tady ž Łukašenka zajaviŭ: Biełaruś nikoli nie stanie 90-m subjektam RF.
Darečy, letapis skačak na pryz prezidenta Rasii jaskrava ilustruje, nakolki pakručastymi byli dačynieńni Kramla ź biełaruskim partnioram usie hetyja hady.
Kalizija ŭźnikła ŭžo ŭ źviazku ź pieršymi takimi skačkami ŭ 2004 hodzie (zaŭvažcie: nieŭzabavie paśla pieršaj ža hazavaj vajny). Pucin zaprasiŭ biełaruskaha kalehu na 3 lipienia, vydatna viedajučy, što ŭ toj samy dzień — parad u Minsku.
Naturalna, Łukašenka vybraŭ rolu pieršaj asoby na aficyjnym Dni niezaležnaści, a nie rolu statysta na čužym ipadromie.
U 2005 hodzie skački, da jakich pryviazali niefarmalny samit SND, ładzilisia ŭ Kazani. Voś tam Łukašenka i naviedaŭ ipadrom. Pakazalna, što dvuchbakovaja sustreča tady ŭ jaho była nie z Pucinym, a ź Juščankam.
U 2006 hodzie skački-samit znoŭ adbylisia ŭ Maskvie. Tut užo Łukašenka ŭžyŭ pryncyp «muchi asobna, katlety asobna». To bok pabyŭ na samicie, a na konskija spabornictvy nie zastaŭsia. Maŭlaŭ, siabra Čavies prylataje ŭ Minsk — niama kali tut bavicca.
Cikava, što cieraz hod na skačkach u Rastovie-na-Donie prysutničaŭ usiudyisny Čavies :) — a voś jahony minski amiha nie prylacieŭ.
Narešcie, letaś skački akazalisia skamiečanymi praz vajnu na Kaŭkazie. Mierapryjemstva prajšło ŭ Piacihorsku ŭvohule biez prezidentaŭ, vyklučna dziela ptušački.
Takim čynam, za ŭsiu historyju hetych skačak Łukašenka prysutničaŭ na ich tolki adnojčy, dy i toje było nie ŭ Maskvie, a ŭ tatarskaj stalicy. Ale kali raniej adhavorki prymalisia rasijcami strymana, to ciapier teza «nie lubić koniej» vyklikaje sarkazm.
Dačynieńni miž Łukašenkam i rasijskim kiraŭnictvam jak nikoli kiepskija. Tolki što adhrymieła małočnaja vajna (i Aniščanka namiakaje na praciah). U červieni Łukašenka bajkatavaŭ samit ADKB, i jaho rašeńni dasiul visiać u pavietry.
Narešcie, na skački hetym razam naroŭni ź liderami krain SND byli zaprošany Bahapš z Kakojty. A vy ž viedajecie, što dla biełaruskaha načalstva pytańnie ab pryznańni dźviuch maleńkich, ale hordych kaŭkazskich respublik — jak horkaja redźka. Chapiła ŭžo taho, što ŭ Sočy Łukašenku ładzili vočnuju staŭku z tymi kaŭkazskimi liderami. Peŭna ž i ŭ Maskvie sastykavali b. Karaciej, viedajem my vašy skački: koś-koś — dy ŭ ahłobli!
Užo adna tolki telekarcinka takoj «stykoŭki» — minus u vačach Jeŭropy. I potym, heta vyhladała b jak dresiroŭka biełaruskaha kiraŭnika z prycełam na budučyja samity sajuznaj dziaržavy, u jakuju marać ustupić Abchazija z Paŭdniovaj Asiecijaj.
Kali ž hladzieć hłabalna — ni ŭ Minska, ni ŭ Maskvy niama realnaj, pracoŭnaj stratehii dvuchbakovych dačynieńniaŭ. U biełaruskaha načalstva stratehija zaŭždy była adna — brać na durnicu. Siońnia z Kramla kažuć: abłamajciesia! Tam pierakanalisia, kažučy ipadromnaj movaj, što nie ŭ kania korm. Ale i Kreml, u svaju čarhu, nie ŭjaŭlaje, što rabić z hetaj Biełaruśsiu. Tamu to najazdžaje ŭ duchu bratkoŭ, to znoŭ dastaje piernik.
Maskoŭskaja presa, kivajučy na kurtaty skład hanarovych haściej skačak, havoryć ab pravale palityki Kramla na postsavieckaj prastory. Miž inšym, letaś Miadźviedzieŭ abjaviŭ stasunki z krainami SND pryjarytetam zamiežnaj palityki. Ale ŭ žniŭni hrymnuła vajna z Hruzijaj, i ŭsio pajšło napierakasiak.
Minsk ža ŭ vyniku toj vajny atrymaŭ niečakany padarunak — novuju, prahmatyčnuju liniju ES u biełaruskim pytańni. Hod tamu ciažka było ŭjavić sabie Biełaruś u takim prajekcie, jak «Uschodniaje partniorstva». Paciapleńnie stasunkaŭ z Zachadam daje Łukašenku novyja karty ŭ ruki.
I jašče štrych. Na niadaŭnich pieramovach u Maskvie «haspadary placoŭki» sprabavali vycisnuć z Abamy pryznańnie «asablivych intaresaŭ» Rasii u tak zvanym blizkim zamiežžy. Nakolki možna mierkavać, Abama postsavieckuju prastoru nie «zdaŭ». I heta taksama plus dla Biełarusi.
Što ž da intryhi vakoł skačak, to Łukašenku padkazali aryhinalny pijar-chod. U vyniku jon mała taho što praihnaravaŭ zaprašeńnie Miadźviedzieva, dyk jašče i sustreŭsia 18 lipienia z bajkierami, što vybralisia u Minsk na fiestyval z roznych krain Jeŭropy i navat ZŠA.
Heta vam nie banalnyja «Dažynki» i nie prapachły naftalinam «Słavianski bazar»! Krutyja maładziony padaryli aficyjnamu kiraŭniku kurtku z bajkierskaj simvolikaj i prapanavali ŭznačalić ichni parad. Što jon i zrabiŭ, praimčaŭšysia sa svaim Kolem na lehiendarnym «Charlei-Devidsanie».
Raniej Łukašenka nie zaŭvažaŭsia ŭ padhulvańni subkulturam zachodniaha pachodžańnia. Ale tut, musić, važna było davieści kramloŭcam: vašy siaredniaviečnyja ŭciechi mianie nie hrejuć — ja addaju pieravahu sapraŭdnamu drajvu na žaleznym kani!
