23 lipienia palitpryzyŭniku Franaku Viačorku aficyjna vyniesiena adno z najbolš žorstkich dyscyplinarnych spahnańniaŭ, praduhledžanych art. 49 Dyscyplinarnaha statutu Uzbrojenych siłaŭ: źmianšeńnie adpačynku za ŭvieś pieryjad vajskovaj słužby da 5 sutak (nastupnaje i najbolš žorstkaje pakarańnie — haŭptvachta). F.Viačorka pakarany za ŭžyvańnie kamandy «Zvažaj!» zamiest «Śmirno!».
Inicyjatyva pakarańnia naležyć psichołahu v/č № 48694 staršamu lejtenantu Dzianisu Kazaku. Adkaznaść za pakarańnie niasie namieśnik kamandzira bataljonu pa ideałohii major Uładzimir Ihnacik. Takim čynam, upieršyniu ŭ historyi niezaležnaj Respubliki Biełarusi biełaruski sałdat pakarany za ŭžyvańnie biełaruskaj movy ŭ vojsku.
Baćka palityčnaha pryzyŭnika Vincuk Viačorka sprabavaŭ spynić biezzakońnie: «Pieraśledavać Franaka z-za biełaruskaj movy st. lejtenant Kazak i praparščyk Piskun pačali ź miesiac tamu. Na žal, i kamandzir bataljonu ŭ Mazyry, i kamandzir bryhady ŭ Baranavičach syšli ŭ adpačynak. Napiaredadni ja telefanavaŭ u Baranavičy padpałkoŭniku Siarhieju Hrysiuku, namieśniku kamandzira bryhady pa ideałohii, jaki ciapier vykonvaje abaviazki kamandzira. Ja papiaredziŭ jaho pra parušeńni Kanstytucyi i Kryminalnaha kodeksu, jakija ŭhladaju ŭ moŭnym pieraśledzie majho syna, i prasiŭ spynić moŭny teror i dyskryminacyju ŭ Mazyry. Ale, jak baču, zvarot marny. Značyć, i S.Hrysiuk niasie svaju dolu adkaznaści za hety niečuvany ŭ jeŭrapiejskaj krainie XXI stahodździa aparteid.
My budziem źviartacca ŭ prakuraturu ŭ suviazi z prykmietami złačynstva, praduhledžanaha art. 130 Kryminalnaha kodeksu: «Naŭmysnyja dziejańni, nakiravanyja na raspalvańnie rasavaj, nacyjanalnaj, relihijnaj varožaści albo niazhody, na prynižeńnie nacyjanalnaha honaru i hodnaści, (...) učynienyja słužbovaj asobaj z vykarystańniem svaich słužbovych paŭnamoctvaŭ, - karajucca pazbaŭleńniem voli na termin ad troch da dziesiaci hadoŭ». Źvierniemsia taksama ŭ mižnarodnyja pravaabarončyja arhanizacyi».
