Stalicu znoŭ zaliło. Najbolej dastałosia šmatpakutnaj Niamizie. Zatapiła i stancyju mietro Park Čaluskincaŭ, Kamaroŭku, rajony Finskaj zapraŭki, Maniežu, Partyzanski praśpiekt, dziesiatki inšych nizinaŭ u roznych rajonach. Tolki za paŭhadziny ŭ stalicy vypała amal pałova miesiačnaj normy apadkaŭ.
Niamiha pad vadoj. Sprava — najstarejšaja ŭ Miensku Pietrapaŭłaŭskaja carkva.
Dom Modaŭ na hadzinu niby apynuŭsia ŭ Vieniecyi.
Pažarniki evakuujuć, fatohrafy zdymajuć.
La Handlovaha doma na Niamizie.
Mietro pierastała być biaśpiečnym.
Praśpiekt u rajonie Paru Čaluskincaŭ.
A heta - Park Čaluskincaŭ sa stancyjaj mietro.
Kamaroŭka.
Niebiaśpiečnaja situacyja na prypynku «Druhoje kołca». Rajon byłoj finskaj zapraŭki.
Na Niamizie a 15-j na chodnikach vady było pa kalena, na prajezžaj častcy — pa pojas, a to i pa šyju.
Tak, pad mastom na praśpiekcie Pieramožcaŭ patop spyniŭ maršrutku, što jechała ź mikrarajona Sucharava. Uzrovień vady ŭ joj siahnuŭ voknaŭ, i supracoŭniki MNS vyzvalali ludziej z mašyny, vynosiačy dziaŭčat i dziaciej na rukach.
Spynilisia taksama tralejbusy, z dvuch tralejbusaŭ taksama idzie evakuacyja.
Supracoŭniki Ministerstva pa nadzvyčajnych situacyjach ratujuć ludziej na śpiecyjalnych płytach. Niekalkim piensijanieram stała kiepska.
Vialikahruznyja mašyny, što jeduć Niamihaj, padymajuć vielizarnyja vodnyja chvali.
* * *
Vada pratačyłasia na stancyju mietro Park Čaluskincaŭ. Na stancyjach mietro «Uschod» i «Park Čaluskincaŭ» minskaha mietro z pryčyny zalevy pa adnym vychadzie, paviedamili «Interfaksu» ŭ adździele unutranych spraŭ mietrapalitenu.
* * *
Jak paviedamiŭ NN pres‑sakratar MNS Vital Navicki, pakul niama źviestak pra kolkaść achviar stychii. Usie siły skinutyja na toje, kab evakujavać ludziej z transpartu. U dziažurnuju słužbu pastajanna pastupajuć zvanki ź miescaŭ zdareńnia. Samyja vialikija pastupstvy zalevy, pavodle jahonych słoŭ, nazirajucca ŭ rajonie Niamihi.
* * *
Nahadajem, što ŭčora mocnaja zaleva taksama pryviała da mahutnaha zatapleńnia Niamihi.
Siońnia jana znoŭ paralizavała ruch transpartu pa ŭsim horadzie.
* * *
Pres-słužba MNS: Achviar stychii niama
«Bolš za 300 čałaviek evakujavanyja i vyratavanyja z hramadskaha transpartu dy padvalnych pamiaškańniaŭ», — takuju infarmacyju ahučyŭ pres-sakratar MNS Vital Navicki. U vyratavańni ludziej zadziejničana kala 40 adzinak techniki i vadałaznaja hrupa.
Miescy, jakija akazalisia najbolš niebiaśpiečnymi padčas zalevy: Kaścioł śviatych Symona i Aleny, 1-ja i 3-ja haradskija kliničnyja balnicy, VTB Bank, stancyi mietro «Uschod» i «Park Čaluskincaŭ», TC «Pierachod».
Infarmacyju pra zahinułych MNS abviarhaje. Infarmacyja pra patanułaha čałavieka, zdymak jakoha byŭ źmieščany u supołcy minsk_by, pakul nie paćvierdziłasia. Navicki patłumačyŭ heta tym, što aŭtar zdymka nie nazvaŭ miesca zdareńnia, a pa zdymku jaho niemahčyma identyfikavać.
* * *
Ctancyi mietro «Uschod» i «Park Čeluskincaŭ» byli časova začynienyja
Dziela padtapleńnia byli časova začynienyja stancyi mietro «Uschod» i «Park Čeluskincaŭ» u Minsku. Pra heta BiełaPAN paviedamiŭ staršy inśpiektar hrupy infarmacyi i hramadskich suviaziaŭ UUS pa achovie mietrapalitena Arciom Haraševič.
Pavodle źviestak inśpiektara, stancyja «Uschod» była začynienaja na ŭvachod i vychad z 15.20 da 15.35, stancyja «Park Čeluskincaŭ — z 15.37 da 16.00. U hety čas ciahniki prachodzili hetyja stancyi biez spynieńnia.
Pahroza padtapleńnia ŭźnikła praz patoki daždžavoj vady, jakija rynuli ŭ padziemnyja pierachody i ŭ viestybiuli stancyj. Kab vada nie trapiła na płatformy i na rejki, stancyi i byli začynienyja, patłumačyŭ Haraševič.
Ciapier minskaje mietro pracuje ŭ zvyčajnym režymie.
* * *
Pavodle prahnozu Biełhidramieta, u subotu pa krainie budzie vobłačna z prajaśnieńniami. Nočču pa ŭschodniaj pałovie daždžy, navalnicy,
u asobnych rajonach mocnyja liŭni.
Dniom na bolšaj častcy terytoryi krainy karotkačasovyja daždžy, pa poŭdni miescami mocnyja daždžy. U asobnych rajonach navalnicy. Viecier zachodni 4—9 m/s, pry navalnicach miescami paryvy da 15—20 m/s. Tempieratura pavietra nočču plus 15—21°C, dniom plus 19—25°C, pa Homielskaj vobłaści da plus 29°C.