Kala 900 junakoŭ i dziaŭčat biaruć udzieł u malitoŭnaj sustrečy moładzi Minska-Mahiloŭskaj archidyjacezii, jakaja adkryłasia 25 lipienia ŭ haradskim pasiołku Ivianiec Vałožynskaha rajona Minskaj vobłaści, paviedamiŭ BiełaPAN ksiondz-nataryus archidyjacezii Juryj Sańko.
Pavodle jaho słoŭ, napiaredadni ŭ Iviancy zaviaršyłasia praca «Muzyčnaj majsterni», u jakoj z 20 lipienia brali ŭdzieł prychilniki kaścielnaj muzyki. U kancertnuju prahramu byli ŭklučany śpievy, hulnia na muzyčnych instrumientach i teatralnaja pastanoŭka.
Ranicaj 25 lipienia dvuchdzionnuju sustreču, pryśviečanuju tainstvam chryščeńnia i kanfirmacyi, adkryŭ arcybiskup Tadevuš Kandrusievič, mitrapalit Minska-Mahiloŭski, jaki ŭ hety dzień adznačaŭ 20-hodździe biskupskaha paśviačeńnia.
«Boh abraŭ vas, kab vy išli i nieśli Jevanhielle ŭ śviet!» — źviarnuŭsia arcybiskup da maładych ludzieji paprasiŭ ich z karyściu dla dušy pravieści čas sumiesnaj malitvy. Padčas sustrečy ź mitrapalitam junaki i dziaŭčaty ŭzdymali pytańni chryščeńnia i kanfirmacyi, kachańnia i siamji, a taksama vydańnia katalickaj litaratury, skazaŭ ksiondz Juryj.
Udzielniki sustrečy, jakaja pravodzicca pa inicyjatyvie arcybiskupa Kandrusieviča, pakłoniacca relikvijam błahasłavionaha ksiandza Michała Sapoćki — duchoŭnaha nastaŭnika siastry Fauściny Kavalskaj i abrazu Isusa Miłasernaha. Pierehrynacyja hetaha abraza aŭtarstva biełaruskaha žyvapisca Fieliksa Januškieviča prachodzić u Minska-Mahiloŭskaj archidyjacezii z 19 krasavika pa 23 žniŭnia. U žniŭni abraz zavieršyć vandravańnie pa ŭsich abščynach dyjacezii, miescach pazbaŭleńnia voli i balnicach, kab zaniać svajo miesca ŭ Minskim archikafiedralnym kaściole Najśviaciejšaj Panny Maryi.
