Hihancki skandał na błohach LiveJournal.com razhareŭsia vakoł publikacyi Taciany Jełavoj, što piša pad nikam Zmagarka.
Taciana Jełavaja nie źniała dopisu, niahledziačy na pahrozy.
Jana vystaviła post, što nadoŭha zavis u topie Jandeks-rejtynhu i nabraŭ 2000 kamientaroŭ. Reakcyja na hety zapis z boku rasijskaje aŭdytoryi pieraŭzyšła ŭsie miežy.
Zmagarka raźmiaściła videa, źniataje čačenskimi partyzanami ŭ 1999 hodzie, na pačatku Druhoj čačenskaj vajny.Na im biaźlitasny apieratar fiksuje, jak pierarazajuć horła junym rasijskim pałonnym. Videa mieła na mecie zapałochać fiederalnyja vojski. Hety rolik fihuravaŭ u Necie i raniej. Jaho vykarystoŭvaŭ u adnym sa svaich filmaŭ biełaruski režysior Jury Chaščavacki. Adnak dla maładoha pakaleńnia rasiejcaŭ, jakija vyraśli na sterylna-pieramožnych relacyjach TV pucinskaha času, videa stałasia šokam. Da taho ž, Zmagarka dała admysłova pravakacyjny zahałovak: «Russkich sołdat čiečiency riežut, kak śviniej». Rasijskaja aŭdytoryja ŭspryniała jaho jak abrazu.
Choć Zmagarka supravadziła zapis strymanym kamientarom: «Kryj Boža, naturalna, nie uchvalaju hetkaha kštałtu hvałtoŭnych dziejańniaŭ datyčna jakoha-kolviek čałavieka, navat najluciejšaha voraha, jakim jość impierskaja Rasieja dla čačencaŭ, ale dakul akupacyjnyja vojski stojać u Čačenii, jany buduć praciahvacca», — heta nie dapamahło.
Reakcyja rasiejskaha ŽŽ była lutaj. Rasiejskija karystalniki zapatrabavali ad maderataraŭ LiveJournal.com ścierci dopis. Tyja admovilisia — jon nie parušaŭ praviłaŭ płatformy, adno pieraviali jaho pad kant «Dla karystalnikaŭ, starejšych za 18».
Adzin z błohieraŭ nakiravaŭ zajavu na imia Hienieralnaha prakurora Biełarusi z zaklikam pryciahnuć Tacianu Jełavuju da adkaznaści za raspalvańnie varožaści da rasiejcaŭ. «Połkovnik Budanov pridiot za toboj, suka!» — napisaŭ jon u kamientarach Zmaharcy niepasredna[pałkoŭnik rasijskaj armii, jaki zhvałciŭ i zabiŭ 18-hadovuju čačenku — fakt staŭ viadomy, pryčym adnaviaskoŭcam udałosia sabrać dokazy. Pałkoŭnika paśla marudnaha trochhadovaha pracesu zasudzili. Advakata siamji zamučanaj čačenki zastrelili ŭ Maskvie ŭ 2009 hodzie].
«Pryjdzie i tvaja čarha», — abiacaje Zmaharcy inšy. «Pajavicca videa, dzie hetaj […] buduć pavoli adrazać hałavu tupym nažom», — zajaŭlaje treci. I heta jašče samaje strymanaje, što abiacajuć rasijskija ŽŽysty Zmaharcy.
Rasiejskija błohiery ŭ «adkaz» taksama raźmiaścili na błohu Zmaharki foty zabitaha Maschadava, kadry masavaha pachavańnia rasstralanych partyzanaŭ z nahami, skručanymi drotam — «voś što my ź imi zrabili», a taksama zabitych hruzinskich vajskoŭcaŭ u Asiecii.Adbyŭsia sapraŭdny vybuch nianaviści: maładyja i staryja, chłopcy i dziaŭčaty pastavilisia da Zmaharki adnolkava. Bolšaść dopisaŭ nie nadajecca na cytavańnie. Jany poŭniacca kazarmiennym matam i sadyzmam, roŭnym tamu, što vyjaŭleny na videa. Jany adrasavanyja nie tolki Zmaharcy, utrymlivajuć zakliki zakatać u bieton usie ŭschodniejeŭrapiejskija narody.
«Kapaj sabie mahiłu, suka padkałodnaja! My ciabie paviesim!» — piša niejki skinchied. «Raniej ja sustrakaŭ bulbašoŭ, usie śmirnyja byli, a hetaja niejki vyradak», — ustupaje jahony adnadumiec. Starejšyja abiacajuć joj los rasijskich žurnalistak, zabitych ci zhvałčanych za toje, što pisali pra Čačeniju.«Najchutčej, jaje voźmuć u dziarždep ZŠA na pasadu hałoŭnaha kansultanta pa rasiejskim pytańni!» — žartuje inšy.
Rasiejcy taksama raźmieścili spasyłku na kaardynaty Jełavoj na sajcie-supolnaści Vkontakte.ru.
Tolki asobnyja rasiejskija kamientatary asudžajuć najpierš vajnu ŭ Čačni jak takuju. U joj zahinuła kala 12 tys. rasiejskich vajskoŭcaŭ i da 100 tys. čačencaŭ. Pieršaja faza kanfliktu skončyłasia parazaj rasiejskaha ekśpiedycyjnaha kantynhientu ŭ 1996-m. Maskva sabrałasia ź siłami, i ŭ druhoj fazie, pry Pucinu, Čačenija była ściorta daščentu, a ŭ Hroznym sieŭ prarasiejski režym Kadyrava.
Kamientaroŭ ź Biełarusi, Ukrainy ci samoj Čačni vobmal — jak vidna, tema začapiła ŭnutryrasiejskija rany. Biełaruskija kamientatary pieravažna nie ŭchvalajuć kroku Zmaharki.
«Sadysckaje zabojstva, pahatoŭ biazzbrojnaha vajennapałonnaha, dy pierad kamieraj — sprava ŭ lubym vypadku podłaja i niemužčynskaja. Hetki nacyscka-nkvdšny styl charaktaryzuje čačenskich bajevikoŭ jak nie vajakaŭ vyzvalenčaj armii, a truślivych bandytaŭ-ekstremistaŭ», — piša błohier czalex.
Inšy papularny biełaruski błohier b0rmann dapuskaje rasisckija vypady na adras čačencaŭ i praciahvaje: «Pacyfikacyja Čačenii — adzin z kirunkaŭ źniešniaje palityki Rasiei, jaki nie pabajusia publična padtrymać».
«Ničoha nie maju suprać čačenskaj niezaležnaści. Kateharyčna niazhodny z rasiejskaj vonkavaj palitykaj (darečy, videarolik - heta jaje adlustravańnie, adbitak u čačenskim kantekście), ale kadry zabojstvaŭ — pa-za miežami ŭsiaho čałaviečaha», — hidzicca alehmackievic.
Jość i biełaruskija dzieńnikary, što naŭprost salidaryzujucca z rasiejcami: «Tierpieť nie mohu [bieło-]krasno-biełych mraziej u nas v riespublikie», — padtrymlivaje svaich rasiejskich frendaŭ błohier dzichenka.
Sama Taciana Jełavaja pra svoj dopis nie škaduje. «Ja chacieła stvaryć rezanans vakoł Čačni jak takoj, — skazała jana «Našaj Nivie». — Možna chadzić u ružovych akularach i rabić vyhlad, što prablemy nie isnuje. Pa vialikim rachunku, usio žyćcio ŭ sučasnaj Rasiei — heta hvałt ułady nad narodam. Škada rasiejskich chłopcaŭ, jakich zabivajuć u Čačni. Ale vinoj tamu jość kiraŭnictva Rasiei. Nie razumieć hetaha fakta i ničoha nie rabić z hetym raŭnasilna padtrymcy praciahu padobnaha rodu zabojstvaŭ. Jak skazała ŭ intervju «Echu Moskvy» Valeryja Navadvorskaja, Rasiei nie patrebnyja ni braty i siostry, ni siabry i kalehi, ale tolki raby. Kaŭkaz ža — heta nie toje miesca, dzie jany vodziacca. U vyniku — uzbrojeny kanflikt, jaki ciahniecca nie pieršy hod».
Što Jełavaja dumaje ab prapanovach mnohich błohieraŭ zabaranić publikacyju aktaŭ hvałtu ŭ LJ? «Ja suprać cenzury. Siońnia zabaraniajem videa, na jakich režuć rasiejskich sałdat, zaŭtra zabaraniajem videa, na jakim AMAPaviec źbivaje babulu na «Maršy niazhodnych». Bo navošta — heta moža parušyć jaho pryhožy utulny śviet, dzie ŭsie dumki ab rečcy i šašłykach».Ci jana baicca pahrozaŭ? «Bajacca — nie ŭ maim charaktary i nie ŭ majoj bijahrafii. Darečy, pryjšło niamała pryvatnych paviedamleńniaŭ ad znajomych i nieznajomych ludziej, jakija prapanujuć dapamohu ŭ vypadku niebiaśpieki. Što bolš za ŭsio raduje: bolšaja pałova ź ich — mienavita rasiejcy. Što prymušaje vieryć u toje, što šlach Rasiei da demakratyi nie źjaŭlajecca kazkaju».
A što pra ŭsio heta dumaje mama Taciany? «Mama nie čytaje ŽŽ, ale maju pazicyju nakont Rasiei całkam padzialaje. Kamu, jak nie biełarusam, viedać ab hetym».