U rabocie ajčynnaj pramysłovaści nastupiła stabilizacyja. Ab hetym na pasiadžeńni Savieta ministraŭ 28 lipienia zajaviŭ pieršy vice‑premjer Uładzimir Siamaška.
Padvodziačy vyniki raboty pramysłovaści za šeść miesiacaŭ, jon adznačyŭ, što ŭ bolšaści halin «namieciłasia stabilizacyja, spyniłasia padzieńnie abjomaŭ pramysłovaj vytvorčaści». Pavodle słoŭ Siamaški, za pieršaje paŭhodździe stvorany realnyja pieradumovy dla pierachodu ŭ jakasna novy stan.
Namiečana, što da kanca 2009 hoda pradpryjemstvy pavinny vyjści na letašni ŭzrovień abjomaŭ pramysłovaj vytvorčaści. «Abjom pramysłovaj vytvorčaści z 96,4% pa vynikach pieršaha paŭhodździa pavinien vyraści da 99—100% da kanca hoda», — zajaviŭ pieršy vice‑premjer. Razam z tym pry naroščvańni «ad miesiaca da miesiaca abjomaŭ pramysłovaj vytvorčaści źjaviłasia mahčymaść dla skaračeńnia składskich zapasaŭ», skazaŭ jon.
«Bolšaść pradpryjemstvaŭ pryjšła ŭ paŭnavažki stan, kali ŭsia vyrablenaja na praciahu miesiaca pradukcyja realizujecca. U suviazi z čym zapavoliŭsia temp rostu składskich zapasaŭ», — padkreśliŭ Siamaška.
Pavodle źviestak Biełstata, na 1 lipienia hetaha hoda na składach sabrałasia pramysłovaj pradukcyi na sumu 7,4 trłn. rubloŭ. Suadnosiny zapasaŭ hatovaj pradukcyi da siaredniamiesiačnaha abjomu vytvorčaści skłali 94,6% (u pieršym paŭhodździ 2008 hoda — 49,9%). Razam z tym kali za maj składskija zapasy vyraśli amal na 184 młrd. rubloŭ, to za červień — usiaho na 91 młrd. rubloŭ.
Jak zajaviŭ Uładzimir Siamaška, da kanca hoda suadnosiny zapasaŭ hatovaj pradukcyi da siaredniamiesiačnaha abjomu vytvorčaści pavinny źnizicca da 75%. Taki aptymizm, pavodle słoŭ pieršaha vice‑premjera, hruntujecca na tym, što «pradpryjemstvy pradajuć amal usio, što vyrablajuć».
