Paśla dvuch demaršaŭ (apošni: tusoŭka z bajkierami doma zamiest tusoŭki prezidentaŭ na skačkach u Maskvie) Łukašenka narešcie vypraŭlajecca 30 lipienia na samit, dzie sustreniecca ź Miadźviedzievym. Z adnaho boku, heta prymirenčy žest, ź inšaha — usio pradumana, kab zachavać tvar.
Nu, najpierš — sustreča ŭ miežach ADKB hetym razam niefarmalnaja i adbyvajecca nie ŭ pychlivaj biełakamiennaj, a ŭ čorta na rahach, u harach Kirhizii. Tut važna, što na niejtralnaj terytoryi. Potym: u Bakijeva akurat jubilej. Siužet možna traktavać i tak, što Łukašenka najpierš vyrašyŭ pavinšavać z 60-hodździem kirhizskaha kalehu (jaki za časami SSSR taksama vyšej dyrektara nie ŭźniaŭsia).
Darečy, vinšavańnie Bakijevu sa śviežaj pieramohaj na vybarach, skrytykavanych misijaj naziralnikaŭ ABSIE, ź Minska pajšło pa haračych śladach.
A voś pra zamireńnie Łukašenki z Maskvoj kazać pakul nie vypadaje. Što paćvierdziŭ 29 lipienia chutkaciečny fiechtavalny boj miž pamočnikami biełaruskaha dy rasijskaha prezidentaŭ.
Spačatku pradstaŭnik Kramla Prychodźka zajaviŭ: «Raz Łukašenka tudy jedzie, značyć, pavinien padpisać dakumienty». Havorka, naturalna, najpierš pra padviešanuju im padčas małočnaj vajny damovu ab stvareńni Kalektyŭnych sił apieratyŭnaha reahavańnia.
Prahučała z padtekstam kštałtu: padpiša jak hałubok, kudy ž jon dzieniecca z padvodnaj łodki (u hetym vypadku: ad stała, za jakim haspadar sustrečy budzie častavać biešbarmakam dy miascovym kańjakom 30-hadovaj vytrymki).
Karaciej, zajava vyhladała jak vyklik. Tym bolej što pierad hetym ambasadarka Kirhizii vyrazna zaśviedčyła: pakolki pryznačanaje na 31 lipienia — 1 žniŭnia mierapryjemstva jość niefarmalnym, to nijakich papier padpisvać nie płanujecca.
I Łukašenkaŭ pamočnik Valancin Rybakoŭ imhnienna daŭ Prychodźku adłup.
Pa-pieršaje, jon źjedliva pachvaliŭ Maskvu za toje, što taja narešcie pierastała skarystoŭvać pasłuhi «ananimnych» krynic u administracyi prezidenta Rasii. Tut treba patłumačyć: u Minsku ŭpeŭnieny, što mienavita staražył Kramla Prychodźka pad maskaj ananima pastajanna źlivaje ŭ presu roznyja niepryjemnyja dla biełaruskaha načalstva zajavy. Apošniaja plucha ad kramloŭskaha mistera Ch była akurat padčas małočnaj vajny. Pamiatajecie, z napusknoj lanotaj: musić, niekamu nadakučyła być prezidentam Biełarusi… Takoha Łukašenka nie zabyvaje.
Pa-druhoje, vusnami Rybakova zajaŭlena: Biełaruś jak suvierennaja niezaležnaja dziaržava sama budzie vyznačać, jakija mienavita dakumienty ADKB i ŭ jakija terminy padpisvać.
I sapraŭdy, z hetaj damovaj ab KSAR Maskva trapiła jak ščupak u nierat. U Łukašenki i tak nijakaj zacikaŭlenaści padpisvać hetuju papieru nie było.
Naprykład, pad adzinuju sistemu supraćpavietranaj abarony (jakaja de-fakta, ličy, i tak isnuje) možna choć vybić na durnicu roznych militarnych cacak. A tut — adny straty, u tym liku i imidžavyja. Bo taja ž Maskva vusnami ambasadara Surykava ŭžo namiakała, što biełaruskim vajakam tady ciažka budzie adkrucicca ad, tak by mović, «internacyjanalnaha abaviazku».
Dy i ŭvohule demakraty na postsavieckim absiahu majuć mocnyja padazreńni, što KSAR najpierš zatočać pad zdušeńnie roznych tam kalarovych revalucyj. Ci vypadkova ideju piedalavaŭ u svoj čas (a mienavita — paśla andyžanskaj bojni) uźbiekski kiraŭnik Karymaŭ? Ale strach, musić, prajšoŭ, Taškient znoŭ pačaŭ hulać z Amierykaj, i ŭ minułym miesiacy mienavita Karymaŭ na paru z Łukašenkam pradynamili Maskvu z pahadnieńniem ab KSAR.
Dadamo, što rasijskaje kiraŭnictva zusim nie padumaŭšy vypuściła na scenu doktara Aniščanku akurat pierad tym złaščasnym červieńskim samitam ADKB. Horšaj preludyi nie prydumać. Łukašenku tolki dali karty ŭ ruki. U vyniku — dvajny projhryš rasijcaŭ. Mała taho što nasupierak ultymatumu znoŭ puścili da siabie małako dy kiefir. Dyk ciapier biełaruskaha kiraŭnika treba jašče i ŭłomvać nakont paŭnafarmatnaha ŭdziełu ŭ ADKB.
Hetaje ž «antyNATA» bieź Biełarusi — adzinaha apiryšča na zachodnim kirunku — zusim niesurjozna vyhladaje. Chiba što na biešbarmak źbiracca :)
Uvohule ž Łukašenka moža vielikadušna zhadzicca na padpisańnie ŭ pierśpiektyvie damovy ab KSAR. Kali Maskva apieratyŭna prapłacić, naprykład apošniaj tranšoj abiacanaha kredytu. Bo hrošy pryduć čysta kankretna. A voś pahadnieńnie — tolki papiera, jakuju možna cicha sabatavać i pastfaktum.
ZY. Tym časam kirhizskaja apazicyja raspačała vuličnyja pratesty suprać sfalšavanych, na jaje dumku, vybaraŭ. Apazicyjnyja lidery zaklikali prezidentaŭ bajkatavać samit na Isyk-Kuli. Ale zaklik, kaniečnie, u pustatu. Niekatoryja vysokija hości i sami kavali elektaralnyja pieramohi nie ŭ biełych palčatkach.
Naŭrad ci realistyčny i namier tamtejšaj apazicyi zładzić marš na Isyk-Kul. Prezident Bakijeŭ, uźniesieny «revalucyjaj ciulpanaŭ», kiruje žaleznaj rukoj (skinuty Akajeŭ padajecca ciapier libierałam) i sapsavać biešbarmak nie dazvolić.
