Da kanca 2009 hoda vahańni kursu biełaruskaha rubla da košyka valut nie pieravysiać abjaŭlenyja raniej +/‑10%, paviedamiŭ staršynia praŭleńnia Nacbanka Piotr Prakapovič na pres‑kanfierencyi 29 lipienia.
Jon adznačyŭ, što ciapier kurs da košyka valut zastajecca stabilnym i mianiajecca ŭ miežach kala 5%. «Jość stabilnaja raŭnavaha. Źmiena kursu adbyvajecca ŭ zaležnaści ad vahańniaŭ kursaŭ zamiežnych valut unutry košyka», — skazaŭ Prakapovič, padkreśliŭšy, što vahańniaŭ kursu pa inicyjatyvie Nacbanka «praktyčna niama».
Kamientujučy čutki ab mahčymaj devalvacyi biełaruskaha rubla, staršynia Nacbanka adznačyŭ, što padstaŭ dla jaje niama.
«Adzin raz my ničoha nie skazali ab devalvacyi rubla — pierad 2 studzienia, i heta było dla vas niečakana. Tak, my vinavatyja», — pryznaŭ Prakapovič.
Adnak heta, pavodle jaho słoŭ, adbyłosia «adzin raz za 11 hadoŭ». «Adzin raz možna sabie takoje dazvolić z ulikam nadzvyčajnaj situacyi. Bolš ža my nikoli nie rabili taho, ab čym nie papiaredžvali», — adznačyŭ kiraŭnik Nacbanka. Pry hetym jon nahadaŭ, što devalvacyja była adnoj z umoŭ vydzialeńnia Biełarusi stabilizacyjnaha kredytu z boku MVF.
Prakapovič paviedamiŭ, što Nacbank maje namier źnizić staŭku refinansavańnia da kanca hoda da 12% hadavych ź ciapierašnich 14%, što praduhledžana Asnoŭnymi kirunkami hrašova‑kredytnaj palityki Biełarusi na 2009 hod. Zachavańnie na praciahu pieršaha paŭhodździa staŭki refinansavańnia było vyklikana «situacyjaj u ekanomicy», patłumačyŭ jon.
Kiraŭnik Nacbanka taksama paviedamiŭ, što da kanca hoda čakajecca źnižeńnie pracentnych stavak pa kredytach i rublovych depazitach. «Heta budzie adbyvacca pastupova, z tym kab vyrašyć hałoŭnuju zadaču — maksimalna pryciahvać srodki nasielnictva i pradpryjemstvaŭ u bankaŭskuju sistemu», — adznačyŭ Prakapovič.
