Fota z sajta Salidarnaści
30 lipienia na 56‑ym hodzie žyćcia nie stała lehiendarnaha biełaruskaha futbalista Juryja Kurnienina. Čempijona Savieckaha Sajuzu 1982 hodu ŭ składzie minskaha «Dynama». Jak paviedamlajecca, jon pamior prosta ŭ śnie.
Jury Kurnienin naradziŭsia 14 červienia 1954 hodu ŭ rasijskim Arechavie‑Zujevie, dzie i pačaŭ zajmacca futbołam. Potym talenavitaha junaka zaŭvažyli ŭ rasijskaj stalicy, i jon pierabraŭsia ŭ tamtejšaje «Dynama». Zrešty, zamacavacca ŭ asnoŭnym składzie kamandy Kurnienin tak i nie zmoh. Było pryniataje rašeńnie adpravić jaho, a taksama Juryja Pudyšava, na padmohu minskim adnakłubnikam.
Heta było ŭ 1976 hodzie. Praz dva hady ŭ kamandu pryjšoŭ trenier Eduard Małafiejeŭ, i ŭ Minsku pačałosia stvareńnie zusim novaj kamandy. Kurnieninu advodziłasia ŭ joj adno z klučavych miescaŭ.
U 1982 hodzie małady minski kłub niečakana staŭ pieršym u SSSR. Kurnienin taksama ŭvajšoŭ u toj hod u historyju. U adnoj z hulniaŭ pieršynstva z ałmaacinskim «Kajratam» abaronca minčan zabiŭ try hały. Heta byŭ pieršy chiet‑tryk abaroncy ŭ čempijanatach Savieckaha Sajuzu! Da Kurnienina padobnym nie adznačaŭsia nichto.
Byŭ aŭtaram pieršaha biełaruskaha hołu ŭ jeŭrakubkach. Zabiŭ jaho sa štrafnoha ŭ varoty šviejcarskaha «Hraschopiersa».
U 1983 hodzie Kurnienina zrabili kapitanam «Dynama», tady kłub zavajavaŭ bronzavyja miedali. Karjeru futbalist skončyŭ u 1987 hodzie. Za čas vystupleńnia ŭ vyšejšaj lizie SSSR Kunienin pravioŭ 265 matčaŭ i zabiŭ 19 hałoŭ, trojčy traplaŭ u skład 33 najlepšych hulcoŭ pieršynstva.
Trenierskuju karjeru Kurnienin pačynaŭ u bresckim «Dynama». U pieršym čempijanacie niezaležnaj krainy bieraściejcy zavajavali bronzavyja miedali. Bolej kamanda z horada nad Buham na podyum nikoli nie padymałasia.
Adnak praź niejki čas trenier źjechaŭ z krainy, pracavaŭ u Rasii.
Taksama ŭ jahonaj bijahrafii prysutničaje nadzvyčaj ekzatyčnaja staronka — u 1996 hodzie ŭznačalvaŭ nacyjanalnuju zbornuju Siryi.
Zrešty, u 1999 hodzie Kurnienin znoŭ viarnuŭsia ŭ Biełaruś. Treniravaŭ minskaje «Dynama», dapamahaŭ u salihorskim «Šachciory».
U 2005 hodzie Kurnienin pryniaŭ prapanovu svajho kolišniaha partniora pa minskim i maskoŭskim «Dynama» Anatola Bajdačnaha dapamahać jamu ŭ nacyjanalnaj zbornaj Biełarusi.
Ad lutaha 2006 hodu Kurnienin uznačaliŭ moładzievuju zbornuju krainy. Kamanda pad jahonym kiraŭnictvam vyjšła na čempijanat Jeŭropy, jaki prajšoŭ miesiac tamu. Tam, praŭda, hulnia nie vielmi atrymałasia. Kurnienin vielmi pieražyvaŭ praz hetuju niaŭdaču.
Jury Kurnienin treci futbalist załatoha składu minskaha «Dynama», jaki syšoŭ z žyćcia. U 1989 hodzie nie stała Alaksandra Prakapienki, jamu było 36 hadoŭ. U 1992 hodzie ŭ Bierlinie va ŭzroście 32 hadoŭ pamior Viktar Janušeŭski. Sychodziać lehiendy.
