Vyhladaje na toje, što Rasija na niefarmalnym samicie ADKB pralacieła jak faniera nad Čałpon-Atoj. Łukašenka nie śpiašajecca pryniać staršynstva ŭ arhanizacyi.
Pra heta ŭskosna, z dypłamatyčnaj vytančanaściu daŭ zrazumieć rasijski ministr zamiežnych spraŭ Łaŭroŭ. Ź jaho słoŭ, Rasija pradoŭžyć techničnaje staršynstva ŭ ADKB, čakajučy taho momantu, kali Biełaruś budzie hatova ŭziać na siabie adpaviednyja funkcyi.
Kali naŭprost, heta aznačaje, što rasijcy dzie sieli, tam i źleźli. Nahadaju: Biełarusi naležała pieraniać hetyja funkcyi ŭ Armienii jašče na červieńskim samicie ŭ Maskvie. Na tym samym, jaki Łukašenka pastaviŭ u ihnor praz małočnuju vajnu. U vyniku techničnaje staršynstva z kisłaj minaj uziała na siabie Maskva.
Słovy Łaŭrova mohuć śviedčyć pra toje, što na bierazie Isyk-Kula ŭłamać naravistaha biełaruskaha partniora nie pašenciła. Chacia napiaredadni pamočnik Miadźviedzieva Prychodźka vykazaŭ spadzieŭ, što Łukašenka ŭsio padpiša, inačaj, maŭlaŭ, našto jechać.
Ab aficyjnych vynikach pratakolnaj častki samita dakłaŭ presie ŭ piatnicu ŭviečary haspadar placoŭki. Pavodle Bakijeva, lidery vyrašyli, što kaardynacyja ŭ miežach ADKB musić stać bolej efiektyŭnaj. U pierakładzie na zvyčajnuju movu: nie vyrašyli ničoha.
Sam Łukašenka nie mieniej dypłamatyčna zajaviŭ 31 lipienia, što pytańnie ab staršynstvie razhladajecca i ŭsie rašeńni buduć pryniaty svoječasova. Prykładna takimi ž farmuloŭkami ŭžo amal što hod Minsk adbivajecca ad pryznańnia Abchazii z Paŭdniovaj Asiecijaj.
Što ž da ADKB, to prablema, naturalna, nie ŭ tym, kamu być śpikieram na pasiadžeńniach, a ŭ tym, što praciahvaje visieć u pavietry pahadnieńnie ab farmavańni Kalektyŭnych sił apieratyŭnaha reahavańnia. Adpaviednyja rašeńni maskoŭskaha samita ADKB biełaruski bok abviaściŭ nielehitymnymi. I heta hałaŭny bol najpierš dla Maskvy, dla katoraj ADKB — instrumient upłyvu na postsavieckim absiahu.
Minsk ža siońnia zarablaje ački akurat na dystancyjavańni ad vialikadziaržaŭnaj palityki ŭschodniaj susiedki. Admietna, što «SB» u spravazdačy z samita ŭ Čałpon-Acie padkreślivaje: Biełaruś jak adzinaja całkam jeŭrapiejskaja dziaržava ŭ ADKB zacikaŭlena ščylna supracoŭničać ź ES, a nie stvarać niejkaje «antyNATA». Pa sutnaści heta pikiroŭka z maskoŭskimi stratehami.
Karaciej, hetym razam Kreml musić zadavolicca chiba tym, što ŭdałosia ŭhavaryć haspadara samita na stvareńnie ŭ Kirhizii druhoj rasijskaj vajskovaj bazy. Zrešty, navat siarod rasijskich analitykaŭ niama adzinadušnaści ŭ pytańni, ci treba tak vyłuzvacca sa skury i palić niebahatyja resursy dziela takich efiemiernych farpostaŭ na ŭskrainach byłoha «saŭka». Dy i nakolki nadziejny chaŭruśnik Bakijeŭ? Vuń jak pradynamiŭ z bazaj «Manas», katoruju paśla piernikaŭ z Maskvy znoŭ zdaŭ amierykancam, tolki za bolšyja hrošy.
Na momant, kali pišucca hetyja radki, prezidenty jašče nie raźlacielisia z kazačnaj rezidencyi na vysakahornym voziery, ale kazačnych dzivosaŭ, to bok praryŭnych damoŭlenaściaŭ, badaj što nie budzie.
Nu a biełaruski hość dobra prabaviŭ čas: pakataŭsia z małodšym synam na rovary ŭzdoŭž Isyk-Kula dy pakaštavaŭ biešbarmaku na jubilei Bakijeva. Imianiny serca!
Pavodle maskoŭskich krynic, Łukašenka nie vyjaviŭ inicyjatyvy nakont dvuchbakovaj sustrečy ź Miadźviedzievym. Pakul što niama sihnałaŭ i ab hatoŭnaści Biełarusi ŭdzielničać u pieršych manieŭrach KSAR uvosień.
Łukašenku niama sensu śpiašacca z padpisańniem damovy ab KSAR dy zhodaj na staršynstva ŭ ADKB. Čas ciapier prahmatyčny. Kryzis i ŭsio takoje. Tak što chaj robiać pieradapłatu. A tak mohuć staršyniavać kolki ŭlezie.
P.S. Ahienctvy paviedamili, što Łukašenka vylecieŭ u Minsk. Ni pra jakija damoŭlenaści z Maskvoj havorki niama.
