Novy vid ptušak adkryty ŭ Łaosie. Adbyłosia hetaje adkryćcio va ŭnikalnym bijatopie: u lasach na vapniakovych harach, daloka ad pasialeńniaŭ čałavieka. Mahčyma mienavita tamu hetyja ptuški tak doŭha nie traplali na vočy navukoŭcam. Nazvali ž novy vid hołatvary biulbiul (Pycnonotus hualon).
Łysahałovuju pihalicu adšukali navukoŭcy z Wildlife Conservation Society (WCS) i ŭniviersitetu Mielburna (Aŭstralija).
Novy vid pamieram z našaha drazda i pieralataje z dreva na dreva z vyraznymi karotkimi krykami.
«Adkryćcio novaha vidu – zaŭsiody niečakanaja i zachaplalnaja padzieja. Adnak jana zaŭsiody prymušaje źviarnuć dadatkovuju ŭvahu na achovu pryrody», – tak prakamientavaŭ adkryćcio d‑r Piter Kłajn (Dr Peter Clyne), asistent dyrektara azijackaha pradstaŭnictva WCS.
Na ščaście, novy vid byŭ znojdzieny na achoŭvanaj terytoryi ŭ centralnaj častcy Łaosu i pakul jamu ničoha nie pahražaje. Ale ciapier treba budzie atrymać bolš źviestak nakont taho, ci nie pryniasie budučaja dziejnaść čałavieka na hetaj terytoryi niebiaśpieku dla zachavańnia vidu.
Paśla rehistracyi i zapisu hałasoŭ nieviadomych ptušak 3 śniežnia 2008 hodu ŭ Pha Lom, na vapniakovych absypach, daśledčyki Iejn Uoksuołd (Iain Woxvold) i Ŭiłł Dakuorf (Will Duckworth) pastavili sietku, u jakuju praź niekalki dzion paśla prajhravańnia zapisanych raniej hałasoŭ i trapili ptuški nieviadomaha vidu.
Daśledavańni finansavalisia kampanijaj Minerals and Metals Group, jakaja zdabyvaje miedź i zołata ŭ hetym rehijonie.
Navukoŭcy zakalekcyjanavali adnu ź dźviuch asobin novaha vidu dla muzieju Naturalnaj historyi ŭ Trynhu (Vialikabrytanija), z druhoj ža ptuški (pierad tym jak jana zdoleła ŭciačy) byŭ uziaty ŭzor kryvi.
Artykuł pra novy vid ptušak źjaviŭsia ŭ apošnim numary časopisa Forktail, jaki vypuskaje Oriental Bird Club.
