RUP «Biełpošta» admoviłasia ŭklučyć u padpisny katałoh na 2‑ie paŭhodździe 2009 hoda niedziaržaŭnuju hramadska‑palityčnuju hazietu «SNplus. Svobodnyje novosti plus».
Pra heta 11 žniŭnia hałoŭny redaktar haziety Vasil Zdaniuk daviedaŭsia ź lista za podpisam hiendyrektara «Biełpošty» Juryja Komara, jaki pryjšoŭ u adkaz na prośbu viarnuć vydańnie ŭ padpisku.
«Pakolki abaviazak pa ŭklučeńni drukavanaha vydańnia ŭ katałoh nie praduhledžany zakanadaŭstvam, vybar drukavanych vydańniaŭ dla farmavańnia katałoha z metaj nastupnaha ich raspaŭsiudu praz padpisku źjaŭlajecca pravam RUP «Biełpošta», — zajaŭlaje tradycyjna kiraŭnik dziaržaŭnaha paštovaha pradpryjemstva‑manapalista. —
Na padstavie vykładzienaha, RUP «Biełpošta» ličyć niemetazhodnym uklučeńnie ŭ padpisny katałoh haziety «SNplus. Svobodnyje novosti plus».
Taki ž adkaz tolki za podpisam kiraŭnicy Bresckaha filijała «Biełpošty» Valanciny Puch na sprobu viarnucca da čytačoŭ praz padpisku atrymała redakcyja haziety «Hancavicki čas».
Jak źviartaje ŭvahu V. Zdaniuk, «Biełpošta» admoviła viarnuć «SN» u padpisku niahledziačy na adpaviednuju rekamiendacyju hramadskaj kaardynacyjnaj Rady pa ŚMI.
«Na pačatku lipienia redakcyja «SN» atrymała list za podpisam staršyni Rady Paŭła Jakuboviča, dzie rekamiendavałasia ŭznavić supracoŭnictva z RUP «Biełpošta». My tut ža nakiravali zvarot na imia kiraŭnika paštovaha pradpryjemstva, ale atrymali čarhovuju admovu. Z hetaha vynikaje, što na siońnia nijakija hramadskija rady pakul nie ŭpłyvajuć na situacyju ŭ krainie. A vyrašeńnia prablemy ź viartańniem niedziaržaŭnych haziet u raspasiud treba, mabyć, čakać na bolš vysokim uzroŭni», — zaznačaje Vasil Zdaniuk.
Nahadajem: na siońnia tolki adna hazieta («Bobrujskij kuŕjer») sa «śpisu 13‑i» adnaviła supracoŭnictva ź dziaržaŭnym raspaŭsiudnikam paśla rekamiendacyi hramadskaj Rady pa ŚMI.
