14 žniŭnia Alaksandr Łukašenka pravioŭ naradu pa pytańniach udaskanalvańnia zakanadaŭstva ŭ śfiery baraćby sa złačynnaściu.
Łukašenka ličyć, što raźmierkavańnie paŭnamoctvaŭ pa rasśledavańni tych ci inšych zabojstvaŭ patrabujuć istotnaj karekciroŭki, paviedamlaje pres-słužba kiraŭnika dziaržavy.
Ciaham apošniaha hodu byli praviedzienyja pravierki KDB, MUS, prakuratury. «Jany vyjavili šerah prablem i adnačasova vyznačyli dalejšyja raboty pa ŭdaskanalvańni hetych orhanaŭ», — zaznačyŭ Łukašenka.
Najbolš dastałasia prakurorskim rabotnikam. Na dumku biełaruskaha lidera, prakurorskija sankcyi vielmi časta nie vyratoŭvajuć ad biezzakońnia, to bok nie vykonvajuć svaje funkcyi. Łukašenka zaznačyŭ, što časta prakurory farmalna padpisvajuć sankcyi. A ŭ svaju čarhu supracoŭniki milicyi i śpiecsłužbaŭ pierakładvajuć adkaznaść nakont abhruntavanaści apieratyŭna‑vyšukovych i pracesualnych dziejańniaŭ na prakuroraŭ.
Pryvioŭ Łukašenka i advarotnyja prykłady, kali prakurory naŭmysna zamarudžvali padpisvańnie sankcyj ci ŭvohule admaŭlalisia ich padpisvać dla svoječasovaha papiaredžańnia złačynstva i pryciahnieńnie da adkaznaści vinavataha.
Kiraŭnik dziaržavy ličyć nieabchodnym unieści źmieny ŭ zakanadaŭstva, jakija b dazvalali pa karupcyjnych złačynstvach vieści papiaredniaje śledstva tym orhanam, jakija kryminalnuju spravu raspačynali, a nie tolki prakuratury.
Paviedamlajecca, što normu, jakaja daje prava ździajśniać apieratyŭna‑vyšukovyja mierapryjemstvy, prymianiać rašeńni pa miery ŭtrymańnia i ździajśniać asobnyja pracesualnyja dziejańni pa pastanovach ministra ŭnutranych spravaŭ, staršyni KDB i dyrektara departamienta finansavych rasśledavańniaŭ, padtrymlivali nie ŭsie.
«Niezrazumieła, što tut takoha nadzvyčajnaha: niaŭžo kiraŭniki takoha vysokaha ŭzroŭniu mienš kampietentnyja, čym prakuror, jaki daje sankcyju?», — zadavaŭsia pytańniem Łukašenka. Na jahony pohlad, matyvacyja adna — vykanańnie zakonnaści.
Łukašenka vystupiŭ za stvareńnie bližejšym časam asobnaha Śledčaha kamitetu. Ni ŭ Vadzima Zajcava, ni ŭ Anatola Kulašova nijakich piarečańniaŭ adnosna pavieličeńnia paŭnamoctvaŭ nie było.
Staršynia Kanstytucyjnaha sudu Piotr Mikłaševič ličyć, što dadzienyja prajekty nijak nie supiarečać Kanstytucyi, a taksama mižnarodnym standartam.
Byŭ dadzieny zahad da 1 studzienia 2010 hodu zaviaršyć pracu nad zakonaprajektam, jaki ŭniasie źmieny ŭ apieratyŭna‑vyšukovuju dziejnaść. Vyhladaje na toje, što robicca heta z prycełam na prezidenckija vybary.
