16 žniŭnia, u dzień Nierukatvornaha abraza Haspodniaha, probašč parafii Śviatoha i Praviednaha Jazepa, protapreźbiter Centralna-Zachodniaha dekanatu Biełaruskaj Hreka-Katalickaj Carkvy a. Andrej Abłamiejka adsłužyŭ raźvitalnuju liturhiju.
Ajciec Andrej, jaki ŭžo bolš jak 10 hadoŭ słužyć śviatarom, skončyŭ Lublinski katalicki univiersitet i maje stupień mahistra bahasłoŭja. Ciapier jon pa błasłavieńni carkoŭnych uładaŭ nakiroŭvajecca na dalejšuju vučobu ŭ Aŭstryju, dzie maje namier atrymać stupień doktara. Vučycca i pisać dysiertacyju a. Andrej Abłamiejka budzie ŭ Mižnarodnym bahasłoŭskim instytucie vyvučeńnia šlubu i siamji ŭ Haminhu, jaki zasnavany ź inicyjatyvy papy Jana Paŭła II.
Razam z ajcom Andrejem Abłamiejkam na vučobu ŭ Haminh nakiroŭvajecca i jaho žonka – matuška Śviatłana. Jana maje namier pisać mahisterskuju pracu z teałohii siamji. Syn śviatara, Bahdan, ŭvosień pačnie vučycca ŭ Katalickim univiersitecie ŭ Lublinie, a dočki – niepaŭnaletnija Alžbieta i Anastasija – buduć žyć razam z baćkami ŭ Aŭstryi.
Novym probaščam parafii Śviatoha i Praviednaha Jazepa budzie Apostalski Vizitatar dla hreka-katolikaŭ Biełarusi archimandryt Siarhiej (Hajek).Dapamahać jamu budzie kuryjalny śviatar Aleś Aŭdziajuk.
Vypusknik Katalickaha ŭniviersitetu ŭ Ajchštecie (Niamieččyna), ajciec Aleś Aŭdziajuk słužyć ciapier u parafii dyjakanam. Čakajecca, što jaho ŭźviaduć u san śviatara 23 žniŭnia padčas archirejskaj słužby, jakuju budzie adpraŭlać Apostalski Administratar Mukačaŭskaj hreka-katalickaj jeparchii (Ukrajina) Uładyka Miłan Šašyk. Liturhija pačniecca a 10-j hadzinie ranicy ŭ carkvie śviatoj Paraskievy Połackaj (h. Połack).
