U minskim Parku Čaluskincaŭ 16 žniŭnia Hramadskaje abjadnańnie pa abaronie žyviołaŭ «Ehida» praviało akcyju, pryśviečanuju Mižnarodnamu dniu biazdomnych žyviołaŭ.
Padčas akcyi vałanciory razdavali biesprytulnych sabak i katoŭ, raskazvali pra los vychavancaŭ, jakija trapili ŭ hadavalnik «Faŭna horada», a taksama źbirali korm, ašyjniki, posud dy inšuju materyjalnuju dapamohu.
Akcyja prachodziła šumna i viesieła.
Dziesiatki ludziej padychodzili i cikavilisia, čym možna dapamahčy žyviołam i jak ich uziać dadomu. Śpievaki Alaksandra Kirsanava i Kanstancin Drapieza raspaviadali pra svaich sabak‑dvarniakoŭ, jakich uziali padčas minułych akcyj. Baćka Maksima Mirnaha Mikałaj Mirny vybiraŭ sabie čatyrochłapaha siabra. Arhanizatary tolki paśpiavali tłumačyć novym haspadaram los i asablivaści haduncoŭ.
Byli ślozy radaści i rospačy.
Płakała vałancior, kali addavała svaju lubimuju dvarniačku Lusiu novym haspadaram. Płakaŭ chłopčyk, jakomu baćki nie dazvalali ŭziać sabaku dadomu, a jon abdymaŭ biesprytulnaha dy nie chacieŭ adpuskać. Adno sabaki dy katy hladzieli razumnymi vačyma na ludziej i čakali na svajho novaha haspadara.
Staršynia Hramadskaha abjadnańnia abarony žyviołaŭ «Ehida» Natalla Bielanova raskazvaje dla «NN»:
U Biełarusi pra isnavańnie Mižnarodnaha dnia biazdomnych žyviołaŭ daviedalisia, napeŭna, hod tamu. Kali našaje abjadnańnie «Ehida» vyrašyła adznačyć hety dzień vychadam u horad. My vyjšli nie prosta pahutaryć ab prablemach, ale i pryvieźli kala 40 sabak, kab znajści im haspadaroŭ. Sieńnia takija vychady ŭ horad stali ŭžo sistematyčnymi.
Pravodzić akcyi vielmi składana. Ciažka ŭsio arhanizavać: žyvioły abaviazkova musiać być z pavadkom, mieć daviedki, addavać ich možna tolki pavodle rejestru i z pašpartami, a taksama ciažka pryvieści ŭ miesca praviadzieńnia akcyi sabak, ludziej, kletki, vadu i ježu. Tamu zvyčajna my pačynajem rychtavacca za miesiac i štodzień majem pracu: jeździm, uzhadniajem, pišam, prosim, pieravozim.
Kali chto‑niebudź vyrašyŭ, što jon hatovy ŭziać sabie žyviołu ŭ kvateru, pačnicie z katehoryi biazdomnych. Na sajcie jość katałohi žyviołaŭ, dzie možna vybrać sabie kata, sabaku ci maleńkaha ščania, a taksama zadać luboje pytańnie pra ich. Usie žyvioły absalutna sacyjalizavanyja: sabaki pryvučany da pavadka i vyhuła, katy chodziać u łatok. Da taho ž, dvarniaki — samyja nadziejnyja siabry.
Hetamu ščaniuku siońnia pašancavała - jon znajšoŭ haspadaroŭ
"Zabiary mianie damoŭ"
