19 žniŭnia na terytoryi hminy Krynki Padlaskaha vajavodstva Polščy projdzie mižnarodny vałanciorski łahier «Adnovim multykulturnuju harmoniju», udzieł u jakim voźmuć aktyvisty hramadzianskaj inicyjatyvy «Homielski demakratyčny forum».
Jak paviedamiŭ BiełaPAN biełaruski kaardynatar prajekta Piotra Kuźniacoŭ, mierapryjemstva stała mahčymym dziakujučy ciesnamu supracoŭnictvu abjadnańnia na karyść ziamli padlaskaj «Drumla» i Homielskaha demakratyčnaha forumu. Abiedźvie arhanizacyi ŭžo byli ŭdzielnicami anałahičnaha prajekta letaś, i ŭ suviazi ź jaho pośpiecham było pryniata rašeńnie ab praciahu prahramy.
Pavodle słoŭ Kuźniacova, na praciahu dvuch tydniaŭ vałanciory ź Biełarusi, Hiermanii i Polščy buduć zajmacca adnaŭleńniem kulturnych i architekturnych pomnikaŭ na terytoryi hminy Krynki Padlaskaha vajavodstva.
Hałoŭnaj metaj prajekta źjaŭlajecca farmiravańnie razumieńnia ŭ sučasnaj moładzi Jeŭropy kaštoŭnaści ahulnaj historyi, ciarpimaści da pradstaŭnikoŭ inšych nacyjanalnaściej i kultur, pavahi da pradstaŭnikom inšych narodaŭ i ich historyi. «Z hetaha punktu hledžańnia Krynki, jakija ciapier znachodziacca pad polskaj jurysdykcyjaj, źjaŭlajucca ledźvie ci nie idealnym miescam. Hetaja miascovaść — histaryčna šmatkulturny i šmatnacyjanalny rehijon. Na praciahu stahodździaŭ tut kampaktna pražyvała biełaruskaje, polskaje, litoŭskaje i jaŭrejskaje nasielnictva», — rastłumačyŭ biełaruski kaardynatar.
Pavodle jaho słoŭ, padčas Druhoj suśvietnaj vajny bolšaść miascovych žycharoŭ‑iaŭrejaŭ byli źniščany ŭ hieta, i na hety čas u Krynkach niama jaŭrejskaha nasielnictva. Tamu adnaŭlać multykulturnuju historyju miascovaści vałancioram daviadziecca pa krupinkach uspaminaŭ niešmatlikich vidavočcaŭ i materyjalnych śviedčańniaŭ, što zachavalisia.
Padčas prajekta płanujecca apytać miascovych žycharoŭ, sistematyzavać atrymanyja źviestki, pravieści adnaŭlenčyja i kansiervacyjnyja raboty na miascovych jaŭrejskich mohiłkach (kirkucie) i ŭ budynku miascovaj sinahohi.
