Stali viadomyja abaviazacielstvy, pryniatyja Biełaruśsiu ŭ miežach pahadnieńnia z MVF ab kredycie stend‑baj. Adpaviedny list za podpisam premjer‑ministra Siarhieja Sidorskaha i staršyni praŭleńnia Nacbanka Piatra Prakapoviča apublikavany na aficyjnym sajcie MVF. Adnačasova Makiej z Belkam abmierkavali mahčymaści novaje kredytnaje prahramy dla Biełarusi ad 2010 hoda.
«Urad vykanaŭ strukturny kantrolny pakazčyk na kaniec sakavika 2009 hoda pa libieralizacyi cen, pavysiŭ ceny na žyllova‑kamunalnyja pasłuhi, źniziŭ zarabotnuju płatu ŭ dziaržaŭnym siektary, admoviŭsia ad praktyki raźmiaščeńnia depazitaŭ centralnych i miascovych orhanaŭ kiravańnia ŭ kamiercyjnych bankach, admianiŭ hraničny vierchni pakazčyk pracentnaj staŭki dla kredytaŭ u biełaruskich rublach, što vydajucca karparatyŭnamu siektaru», — havorycca ŭ liście.
Adznačajecca taksama, što «zhodna z rehijanalnaj ekanamičnaj tendencyjaj, rost biełaruskaj ekanomiki ŭ pieršym kvartale hetaha hoda istotna zapavoliŭsia».
«Razam z tym pry zachavańni ekanamičnaj kanjunktury, jakaja skłałasia, čakajecca źnižeńnie VUP u 2009 hodzie prykładna na 3%, — havorycca ŭ dakumiencie. — Spažyvieckija ceny vyraśli ŭ studzieni paśla adnarazovaj devalvacyi. U adpaviednaści z žorstkaj padatkova‑biudžetnaj i hrašova‑kredytnaj palitykaj, jakaja pravodzicca nami, za pieryjad, što prajšoŭ z taho času, miesiačny ŭzrovień inflacyi źniziŭsia, pryčym ciapier čakajecca, što ŭ 2009 hodzie inflacyja na kaniec pieryjadu składzie amal 11 pracentaŭ».
Dla padtrymańnia kursavoha režymu i zachavańnia nizkaj inflacyi hrašova‑kredytnuju palityku nieabchodna zrabić bolš žorstkaj, adznačajecca ŭ liście.
«U suviazi z hetym my prapanujem na astatniuju častku hoda ŭstanavić hraničnyja vierchnija pakazčyki čystych unutranych aktyvaŭ, jakija adpaviadali b mecie abmiežavać inflacyju na kaniec hoda 11%, — havorycca ŭ liście. — My taksama ličym, što nieabchodna pavysić pracentnyja staŭki pa rublovych depazitach, kab stymulavać źmienu tendencyi značnaha pieratoku rublovych depazitaŭ u valutnyja, jaki naziraŭsia ŭ studzieni i lutym, na procilehłuju».
Kamiercyjnym bankam, adznačajecca ŭ liście, rekamiendavana padtrymlivać siarednija pracentnyja staŭki pa novych terminovych depazitach fizičnych asob na ŭzroŭni nie mienš za 21,6% (na 2% vyšej za siaredni ŭzrovień sakavika 2009 hoda).
«My praktyčna spynili akazańnie padtrymki likvidnaści bankaŭ, nie zabiaśpiečanaj załoham. My pryznajom, što takaja padtrymka pavinna zastavacca sapraŭdy vyklučnaj, i ŭ cełym budziem imknucca nie karystacca hetym instrumientam», — havorycca ŭ dakumiencie.
Paviedamlajecca taksama, što ŭ budučym urad maje namier admianić dva metavyja padatki i miascovy padatak z roźničnych prodaž i
źnizić staŭku padatku na prybytak z 24% da 20%.
«Kab kampiensavać stratu dachodaŭ u vyniku takich mier, my taksama pavysim staŭku PDK z 18 da 22%», — havorycca ŭ liście.
Jaho aŭtary taksama paviedamlajuć ab namiery ŭrada zachavać žorstkuju palityku ŭ śfiery zarabotnaj płaty. «Pryniata rašeńnie nie pravodzić pavyšeńnie zarpłaty ŭ dziaržaŭnym siektary da vieraśnia 2009 hoda», — havorycca ŭ liście.
Adznačajecca taksama, što ŭrad maje namier pryniać dadatkovyja miery pa skaračeńni subsidavańnia žyllova‑kamunalnych pasłuh dla nasielnictva za košt biudžetu.
Kali paźniej na praciahu hoda budzie zaćvierdžana pavyšeńnie zarpłaty, taryfy na ŽKP buduć znoŭ pavyšany (apošniaje pavyšeńnie było ŭ studzieni 2009 hoda. — BiełaPAN.).
U 2010 hodzie buduć pryniaty dadatkovyja miery dla pavyšeńnia stupieni viartańnia strat.
Taryfy na transpartnyja pasłuhi buduć taksama pavyšany z ulikam inflacyi, havorycca ŭ liście.
Pry hetym płanujecca pavialičyć raschody na adrasnuju sacyjalnuju dapamohu, kab abmiežavać źviazanyja z karekciroŭkaj ekanamičnaj palityki vydatki dla najbolš adčuvalnych słajoŭ nasielnictva.
Akramia taho, płanujecca vychad Nacbanka «z udziełu ŭ dziejnaści, jakaja nie adnosicca da jaho klučavych funkcyj».
«Pramoje finansavańnie ci ŭdzieł u kapitale niefinansavych arhanizacyj z boku NBRB nie pieravysić u 2009 hodzie vierchni hraničny pakazčyk 350 młrd. biełaruskich rubloŭ. My nie budziem vydzialać novyja kredyty ci rabić układańni ŭ akcyjanierny kapitał niefinansavych arhanizacyj u 2010 hodzie», — havorycca ŭ dakumiencie.
Paviedamlajecca, što da kanca śniežnia 2009 hoda budzie raspracavany płan dziejańniaŭ pa prodažy zamiežnym inviestaram usich niefinansavych daččynych i asacyiravanych kampanij Nacbanka.
Urad šukaje stratehičnaha inviestara, jaki kupić kantrolny pakiet akcyj dvuch dziaržaŭnych bankaŭ (AAT «Biełprambudbank» i AAT «Bielinviestbank») i minarytarnyja pakiety ŭ ASB «Biełarusbank» i AAT «Biełahraprambank», jak tolki rynačnyja ŭmovy dazvolać heta zrabić, adznačajecca ŭ liście.
Urad taksama płanuje da 30 vieraśnia ŭnieści ŭ parłamient zakonaprajekt «Ab pryvatyzacyi».
Akramia taho, płanujecca vyzvalić usie kampanii, u jakich dziaržava nie źjaŭlajecca asnoŭnym ułaśnikam, ad zachavańnia ŭsich kolkasnych metavych pakazčykaŭ, uklučajučy pakazčyki abjomaŭ vytvorčaści i zaniataści. Pravy dziaržavy ŭ takich kampanijach nie buduć šyrejšyja za pravy ŭsich minarytarnych akcyjanieraŭ.
***
U studzieni 2009 hoda kiraŭnictva MVF uchvaliła vydzialeńnie Biełarusi kredytu stend‑baj u abjomie kala 2,46 młrd. dalaraŭ pad prahramu ekanamičnych reformaŭ, raźličanuju na 15 miesiacaŭ (da krasavika 2010 hoda).
Pieršy tranš kredytu ŭ 788 młn. dalaraŭ pastupiŭ 14 studzienia.
29 červienia saviet dyrektaraŭ MVF zaviaršyŭ pieršy ahlad u miežach pahadnieńnia ab kredycie, a taksama pryniaŭ rašeńnie pavialičyć abjom finansavaj padtrymki Biełarusi na 1 młrd. dalaraŭ — da 3,52 młrd.
25 žniŭnia na sustrečy kiraŭnika Administracyi prezidenta Uładzimira Makieja z dyrektaram Jeŭrapiejskaha departamienta MVF Marakam Belkam, jaki znachodzicca ŭ Minsku, abmiarkoŭvałasia mahčymaść pryniaćcia novaj prahramy kredytavańnia dla Biełarusi ŭ 2010 hodzie.
