33-hadovy Alaksiej Janukievič atrymaŭ 174 hałasy delehataŭ. Lavonu Barščeŭskamu nie dapamahli apielacyi da padtrymki Paźniaka.
Usiaho na XII źjezd Partyi BNF u Dom kultury MTZ źjechałasia 326 čałavieki. Nad scenaj znoŭ, jak i na Kanhresie Mikoły Statkieviča, visieŭ čyrvona‑zialony ściah. Zdymać jaho stroha zabaranili. Ale beenefaŭcy vyjšli z honaram sa stanovišča — skrucili pałotnišča tak, što jaho navat i bačna nie było.
Napačatku pracy delehaty zasłuchali vitalnaje słova Narodnaha paeta Ryhora Baradulina. Potym z pasłańniami vystupali palityki z partniorskich partyj i ruchaŭ. Pieršym byŭ Stanisłaŭ Šuškievič, pieršy śpikier niezaležnaj Biełarusi, dziela hetaha vystupu jon admianiŭ pajezdku ŭ Varšavu.
Paśla jaho słova ŭziaŭ Alaksandr Milinkievič z Ruchu «Za svabodu». Heta było pieršaje źjaŭleńnie eks‑kandydata na pasadu prezidenta na publicy paśla apieracyi. Milinkieviča vitali hučna.
Palityk zaznačyŭ, što ciapier patrebnaje abjadnańnie na idejnym hruncie — niezaležnaści, jeŭrapiejskaha vybaru. Jon vykazaŭ skiepsis adnosna pracedury abrańnia kandydata ADS, uzhadaŭšy, što adzinym moža stać kamunist Siarhiej Kalakin. «Ruch «Za svabodu» nie kankurent, a najbližejšy partnior dla BNF», — zaznačyŭ A.Milinkievič.
Architektar Lavon Zdanievič, jaki byŭ niekali ŭ Viarchoŭnym Saviecie ŭ frakcyi BNF, prapanavaŭ Lavona Barščeŭskaha na miesca kandydata na pasadu prezidenta. Zdanieviča padtrymaŭ kaleha Barščeŭskaha pa Humanitarnym licei Uładzimir Kołas.
Sam Lavon Piatrovič svaju dziejnaść na pasadzie staršyni BNF acaniŭ jak «zdavalniajučuju». Siarod svaich niedapracovak Barščeŭski nazvaŭ toje, što jon tak i nie razabraŭsia z «padvojnymi ahientami» ŭnutry partyi. Jasna, što mielisia na ŭvazie siabry Ruchu «Za svabodu».
Barščeŭski nasamreč chacieŭ być vyłučany na prezidenctva. Jon havaryŭ pra toje, što patrebien kandydat, jaki budzie zdolny adstajać svaju pieramohu, a taksama nie pryznać spraviadlivymi sfalšavanyja vybary — i jon moh by stać takim.
Namieśniki staršyni ŭ svaich spravazdačach byli vielmi padobnyja adzin na adnaho. Raskazvali pra svaje dasiahnieńni, padličvali kolki razoŭ ich uzhadała jakoje ŚMI, jakija akcyi jany arhanizavali, a taksama jak dapamahali ŭ Minsku i rehijonach z apłataj arendy za ofisy.
Padčas vystupu Ivaškieviča hrupa «Moładzi BNF» padniała raściažku ź jahonym proźviščam.
Adrazu paśla spravazdačaŭ Lavon Barščeŭski prapanoŭvaŭ abmierkavać pytańnie budučaha ŭdziełu ŭ prezidenckich vybarach. Z kontrprapanovaj vystupiŭ Ihar Lalkoŭ — spačatku abrać kiraŭnictva partyi. Tak by mović pieršaja repietycyja boju. Lalkoŭ pieramoh. Pytańnie ab kandydacie adnieśli na potym.
Padčas sprečak užo ŭ druhim vystupie Viktara Ivaškievič paviedamiŭ, što nie źbirajecca vyłučacca na pasadu staršyni, a vyłučyŭ Lavona Barščeskaha. Takaja voś chitraja taktyka daśviedčanych partyjcaŭ.
Kandydaturu Barščeŭskaha padtrymlivała staraja hvardyja BNF — Jury Chadyka, Valancin Hołubieŭ, Valancina Śviackaja, Piatro Sadoŭski, amal uvieś minski aktyŭ.
Za Janukieviča vystupili tyja, chto na minułym źjeździe hałasavaŭ za Alesia Michaleviča, blizkija da Ruchu «Za svabodu», padtrymała jaho i «Moładź BNF».
Barščeŭski apraŭdvaŭ svajo rašeńnie bałatavacca tym, što napiaredadni zrabić heta jaho ŭhavorvaŭ Zianon Paźniak. «Ja nie prajhravaŭ nivodnych vybaraŭ, pačynajučy ad vybaraŭ starasty kłasa», — skazaŭ Ł.Barščeŭski.
I ŭsio ž hetyja vybary jamu daviałosia prajhrać. Staršynia padlikovaj kamisii Źmicier Dryhajła abviaściŭ, što
za Lavona Barščeŭskaha prahałasavała 144 čałavieki, a za Alaksieja Janukieviča — 174. Adrazu paśla hetych ličbaŭ Vincuk Viačorka, schapiŭšy sumku, vylecieŭ z zali. Barščeŭski i Ivaškievič pavinšavali novaha staršyniu.
Demarš starejšaha pakaleńnia praciahnuŭsia ŭ tym, što Valancin Hołubieŭ i Piatro Sadoŭski admovilisia ŭvachodzić u skład novaha Sojmu. Tolki prafiesar Chadyka staična maŭčaŭ. Zdajecca, Barščeŭskaha paraza nie padkasiła, jon praciahvaŭ rabić zaŭvahi adnosna dalejšaj pracy, byŭ adnym z najbolš aktyŭnych u zale.
A voś z prezidenckimi vybarami vyrašyli pačakać. Adkłali vyrašeńnie hetaha pytańnia na viasnu.
Namieśnikami Alaksieja Janukieviča abranyja mahiloviec Ryhor Kastusioŭ i minčuk Ihar Lalkoŭ. Sakratarom upravy stanie juryst Uładzimir Łabkovič.
Źmiena pakaleńniaŭ na čale Partyi BNF nie aznačaje źmieny ideałohii. Janukievič byŭ hadavancam i lubimcam Viačorki i Barščeŭskaha až da taho času, pakul nie schiliŭsia da aljansu ź Milinkievičam.
Mocny bok Janukieviča — dobraja BDEUšnaja adukacyja, jakaja daje jamu lepšaje razumieńnie ekanamičnych pracesaŭ.
Vystup Alaksieja Janukieviča (zdymki BiełaPAN) možna pabačyć pa hetaj spasyłcy.
A tut - padviadzieńnie vynikaŭ hałasavańnia i vystup Lavona Barščeŭskaha.
