Kala tysiačy maładych ludziej sabralisia 8 vieraśnia ŭ stalicy na «bitvu paduškami» ŭ honar Aršanskaj bitvy.
Bolšaść mieli z saboj daskanałuju zbroju: paduški, spalniki, miakkija cacki. Akramia vajaroŭ «bitvy paduškami», pryjšło niamała žurnalistaŭ, fatohrafaŭ i prostych hledačoŭ. Pahladzieć nasamreč było na što.
Na pačatku akcyi arhanizatary ledź strymlivali natoŭp: udzielniki hatovyja byli kinucca ŭ bojku jašče da taho, jak daviedalisia praviły hulni i patrapili na pole bitvy. Pakolki ŭsie chacieli być lićvinami, adzin z arhanizataraŭ akcyi Andrej Kim prapanavaŭ tym, chto naradziŭsia ŭ niacotny miesiac, stać pad biełym ściaham lićvinaŭ, a chto ŭ cotnym — pazmahacca pad čyrvonym štandaram na baku Maskoŭskaha kniastva. Pa darozie na pole bitvy adzin z pradstaŭnikoŭ «maskoŭskaha vojska» impravizavanaj bitvy Alaksiej padzialiŭsia ŭražańniami:
— Nie chočacca vajavać za maskaloŭ. Ja nie mahu sabie dazvolić pieramahčy lićvinaŭ i parušyć histaryčnuju spraviadlivaść.
Padčas bitvy nacyjanalnyja sprečki byli zabytyja. Kožny chacieŭ pieramahčy. Vojska litoŭskaje ź miakkaj zbrojaj kinułasia na vojska maskoŭskaje — za Radzimu. «Maskoŭskija» vajary taksama lićvinam panadavali paduškami pa hałavie. Zdavacca nichto nie žadaŭ. Adnak z historyjaj nie paspračaješsia: jak i ŭ 1514 hodzie pieramahło vojska Vialikaha Kniastva Litoŭskaha.
Za pieršaj bojkaj była druhaja i treciaja. Vajary bilisia, padali, ustavali i znoŭku biehli ŭ bojku. Bitva ciahnułasia, pakul nie ściamnieła. Kali ŭdzielniki stomlenyja i zadavolenyja razyšlisia, pole bitvy zastałosia ažno biełaje ad pierja i sinteponu. Dobry dziesiatak padušak byŭ parvany ŭ Dzień vajskovaj słavy.
Pierad pačatkam mierapryjemstva Kim raskazaŭ prysutnym pra historyju bitvy pad Oršaj. 8 vieraśnia 1514 hoda vojska VKŁ razhramiła ŭtraja bolšaje vojska Maskoŭskaha kniastva. Kiravaŭ hetaj bitvaj biełaruski pałkavodziec Kanstancin Astrožski. Bitva ŭvajšła ŭ historyju biełaruskaj vajennaj słavy.
Supracoŭniki milicyi Centralnaha rajonu nazirali za akcyjaj zboku. U arhanizataraŭ byŭ dazvoł ad Minharvykankamu na praviadzieńnie «Bitvy paduškami». Adzinaja prośba ad supracoŭnikaŭ była — nie ŭžyvać nacyjanalnuju simvoliku. Niahledziačy na toje, što bitva prajšła biez nacyjanalnych ściahoŭ na poli nieadnarazova hučała «Žyvie Biełaruś».
Mnohija junaki, u tym liku arhanizatary, byli adzietyja ŭ sakołki z nadpisami «Atrymaj, maskal, paduškaj».Pra padzieju niejtralna abo pabłažliva paviedamili mnohija łukašenkaŭskija ŚMI, u tym liku ahienctva «Interfaks».
Heta ŭžo druhi taki performans u hetym hodzie ŭ Biełarusi. Pieršy byŭ pryśviečany padziejam Hrunvaldskaj bitvy.
Boj paduškami — heta mižnarodny ruch, jaki maje dziesiatki tysiač bajcoŭ va ŭsim śviecie. Samaja maštabnaja bitva adbyłasia va ŭniviersitecie Ołbani ŭ Ńju‑Jorku, dzie 3648 čałaviek bilisia za mir va ŭsim śviecie. Deviz mižnarodnaha boju paduškami — Pillow fight «Make feathers, not war!» u volnym pierakładzie na biełaruskuju movu hučyć jak «Puchavy boj: Pierarobim miačy na paduški!»
