Kala 20 čałaviek zatrymanyja na Kastryčnickaj płoščy za akcyju pratestu suprać uvodu rasiejskich vojskaŭ. Častku źbili.
18:54. Zatrymanych advoziać u Centralny RUUS. Častku pratestoŭcaŭ mocna źbili. U Źmitra Barodki padazrajuć pierałom nosa.
18:33. Akcyja skončyłasia. Udzielniki praśpiavali «Pahoniu», niekalki razoŭ vyhuknuli «Žyvie Biełaruś!», paśla čaho razyšlisia.
Ahułam zatrymana bolš za 20 čałaviek. Pakul jašče nieviadoma, dzie jany ciapier znachodziacca.
18:20. Taksama zatrymanyja Viktar Ivaškievič i Alaksandr Atroščankaŭ. Nijakich raściažak i ściahoŭ ciapier na Płoščy niama.
18:11. Usiaho jašče da pačatku akcyi było zatrymana 7 čałaviek. Zatrymany pradprymalnik Alaksandr Makajeŭ.
Kaardynatar «Chartyi‑97» Źmicier Bandarenka razharnuŭ raściažku «Russian army, go home!». Śpiecnazaŭcy pačali adbirać raściažku, pry hetym źbivali Bandarenku. Potym pravaabaroncu zaciahnuli ŭ milicejski aŭtobus.
Jašče adzin čałaviek zatrymany paśla taho, jak razharnuŭ bieł‑čyrvona‑bieły ściah. Usiaho zatrymana kala 10 čałaviek.
Ciapier ludzi stajać na Płoščy razroźnienymi hrupkami. Ničoha nie adbyvajecca.
18:05. Na Kastryčnickaj płoščy pačałasia akcyja pratestu suprać uvodu rasiejskich vojskaŭ. Jaje arhanizatarami vystupili staršynia «Maładoha Frontu» Źmicier Daškievič, adzin ź lideraŭ partyi BNF Viktar Ivaškievič, namieśnik staršyni arhkamitetu Narodnaj Hramady Alaksandr Arastovič, lider Ruchu «Razam» Viačasłaŭ Siŭčyk, kaardynatar kampanii «Jeŭrapiejskaja Biełaruś» Źmicier Bandarenka.
Na Płoščy ciapier kala 40 čałaviek. Jašče na padychodach byli zatrymanyja Źmicier Daškievič i Źmicier Kaśpiarovič.
