Učora va ŭročyščy Krasny Bieražok na Vilejčyšnie byli źniščany kryžy ŭ honar Raścisłava Łapickaha i inšych achviar savieckich represij. Zrabili heta za dzień da pryjezdu tudy rodnaj siastry kiraŭnika paślavajennaha antykamunistyčnaha padpolla na Smarhonščynie i Miadzielščynie 92-hadovaj Aleny (Volhi) Šarepa-Łapickaj. Supravadžaŭ sp. Alenu na Vilejščynie inicyjatar ušanavańnia pamiaci represavanych Alaksiej Siudak.
«Naša Niva»: Alaksiej, Alena Šarepa-Łapickaja viedała pra kryž Raściłava?
Alaksiej Siudak: Nie, my joj nie kazali. Jana viedała tolki pra kamień, jaki sioleta źniščyli. I pry našaj papiaredniaj sustrečy vykazałasia za toje, kab zrabić niešta novaje na miescy rasstrełu brata. I voś my rychtavali dla jaje siurpryz. Ale, na žal, ničoha nie atrymałasia.
«NN»: Zaraz vy joj raskazali pra źniščanyja kryžy?
AS: Tak.
«NN»: Jakaja była jaje reakcyja?
AS: Jana skazała, što razumieje, čamu Raścisłava i zaraz bajacca navat miortvaha. Bo jon zmahaŭsia suprać kryŭdy. A kryŭdy šmat i siońnia. Tamu tyja, chto rušyŭ, bajacca, što moładź voźmie prykład ź jaje brata.
Taksama jana ŭskłała kvietki da miesca, dzie stajali kryžy.
«NN»: Ci viadoma, chto spryčyniŭsia da akta vandalizmu va ŭročyščy Krasny Bieražok?
AS: Učora miascovyja žychary nam paviedamili, što staršynia Asipavickaha sielsavieta Mikałaj Hil razam z učastkovym milicyjanieram u SVK uziali transpart, na jakim pajechali rušyć kryžy. Kali my tudy pryjechali, kryžoŭ užo nie było.
«NN»: Što kaža staršynia sielsavieta?
AS: Kaža, što nie viedaŭ, chto staviŭ kryžy, chto ich źniščyŭ. Maŭlaŭ, heta nie jaho sprava. Jašče, jon skazaŭ, što u kožnaj vioscy stajać kryžy, i pra ŭsie ź ich staršynia nie moža viedać.
«NN»: Za dzień na źniščeńnia byŭ pastaŭleny i treci kryž «Hierojam Biełarusi». Kryžy byli aśviečany.
AS: Tak, razam stajali try kryžy. 9 vieraśnia jany byli aśviečany pravasłaŭnym śviatarom. A 10 vieraśnia ich nie stała. Ale my ich abaviazkova adnovim. Mnie ŭžo telefanujuć ludzi z pytańniem: «Što treba zrabić?»