Novym staršynioj łajalnaha ŭładam Sajuza palakaŭ u Biełarusi na biezalternatyŭnaj asnovie abrany 57-hadovy hrodzienski pradprymalnik Stanisłaŭ Siamaška.
Z 143 delehataŭ ź`iezda arhanizacyi, jaki prajšoŭ u Hrodnie, «za» prahałasavali 130, «suprać» — piać, jašče vosiem čałaviek ustrymalisia.
Delehatam ź`iezda byŭ razdadzieny numar haziety SPB «Glos znad Niemna» ad 11 vieraśnia, dzie na pieršaj pałasie apublikavana interv`iu ź Siamaškam.
Novy kiraŭnik arhanizacyi naradziŭsia ŭ Ščučynskim rajonie ŭ 1952 hodzie. Maje hateli ŭ Ščučynie i Hrodnie. Hazieta adznačaje spahadlivy i enierhičny charaktar hetaha čałavieka, vychadca z rabočaj siam`i.
Siarod zadač Siamaška nazvaŭ uznaŭleńnie struktur i stračanaha aŭtarytetu ab`iadnańnia. Nieabchodna taksama navučycca zarablać hrošy, budavać dziciačyja sadki, škoły i damy dla sastarełych. Pavodle mierkavańnia Siamaški, ludzi pavinny ŭbačyć,
što palak — heta bahaty i ŭpeŭnieny ŭ sabie čałaviek, jaki ŭmieje damaŭlacca, pracavać i adpačyvać, a taksama trymać słova.
«Dla mianie vielmi važna, kab vakoł byli bahatyja, spahadlivyja i zadavolenyja ludzi. Z takim sajuzam hramadstva budzie kvitnieć i stanie prykładam dla pierajmańnia», — ličyć Siamaška.
Raniej SPB na praciahu čatyroch hadoŭ uznačalvaŭ 73-hadovy Juzef Łučnik. U 2005 hodzie ŭłady nie pryznali vyniki V ź`iezda SPB, na jakim staršynioj ab`iadnańnia była abrana Anžalika Borys.
Pavodle infarmacyi žurnalista Andreja Pačobuta, da minułaha hoda Siamaška nie ŭvachodziŭ u Sajuz palakaŭ i nijak nie byŭ źviazany z polskim rucham. Zatoje jon uznačalvaŭ haradzienski adździeł łukašysckaj Respublikanskaj partyi pracy i spraviadlivaści.
