15 vieraśnia Narodnamu mastaku Biełarusi Arlenu Kaškureviču spaŭniajecca 80 hod. «Tvorcam surovym, paŭnočnym» nazyvaŭ jaho Uładzimier Karatkievič.
My datelefanavalisia da mastaka, kab zapytacca, jak jon sustrakaje dzień naradžeńnia.
— Ja ciapier nie ŭ Minsku, ale niedaloka. My z žonkaj znachodzimsia ŭ lesie ŭ sanatoryi, — kaža mastak. — Pryjechaŭ naš syn Todar. Na stale staić butelka kalifarnijskaha vina. Viadziom hutarku. Voś tak prachodzić śviata. Siamiejnym kołam. Na žal, nie zmoh ź Bierlina pryjechać naš starejšy syn.
Todar zrabiŭ mnie cudoŭny padarunak — staradaŭniuju biełaruskuju hraviuru. Heta ŭnijacki abraz śviatoj Maryi ChVIII stahodździa. Jon znajšoŭ hraviuru ŭ Vilni. Mnie nadta pryjemna. Ja ŭ zachapleńni, što maja kalekcyja ŭzbahaciłasia hetym tvoram mastactva.
Tvorčaja bijahrafija Arlena Kaškureviča achoplivaje cełuju epochu. Mienavita ŭ afarmleńni hetaha hienijalnaha mastaka my viedajem sotni knih biełaruskich i jeŭrapiejskich piśmieńnikaŭ. Vybitnuju charaktarystyku tvorčaści hetaha mastaka daŭ jahony siabra Ŭładzimir Karatkievič: «Daŭno, jašče z samaha pačatku, kali jon zrabiŭ ilustracyi da Chałdoŭra Łakśniesa, — ja zrazumieŭ, što pierad nami mastak surovy, paŭnočny. I, adnačasova, biełaruski, miakki, — kali možna havaryć pra miakkaść našaha narodu, — dobry, naš».
Arlen Kaškurevič — siabra kolišniaha Sajuzu mastakoŭ SSSR, łaŭreat Dziaržaŭnaj premii Biełarusi za 1972 hod, zasłužany dziajač mastactvaŭ Respubliki Biełaruś. Jon — ŭładalnik dziesiatkaŭ mižnarodnych i nacyjanalnych premij za knižnaje afarmleńnie. I pry tym jon, karenny minčuk, nia byŭ ani kamsamolcam, ani kamunistam. Arlen Kaškurevič, žyvaja lehienda biełaruskaje hrafiki, mastak, čyje tvory źbierahajucca ŭ halerejach usiaho śvietu. Praź jahonyja tvory ludzi ŭ roznych krainach daznajucca pra Biełaruś. A my u tvorach Arlena Kaškureviča možam adkryć dla siabie ceły śviet.
«Naša Niva» dałučajecca da vinšavańniaŭ i žadaje mocnaha zdaroŭja šanoŭnamu Arlenu Michajłaviču!
