Łukašenkaŭskija ideołahi hetaj arhanizacyi bajacca jak ahniu. A dla socień maładych ludziej jana była žyvym ramanam «Jak hartavałasia stal». 6 vieraśnia «Maładomu frontu» spoŭniłasia 12 hadoŭ.
Fota Julii Daraškievič.
Ludzi idei, jakija pa žyćci razmaŭlajuć pa-biełarusku. To Dzień śviatoha Valancina praviaduć, to MTS biełarusizujuć, to ŭ škołach z kursami «Dy-džejaŭ Adradžeńnia» źjaviacca, to BT pra ich film pakaža. Adny chvalać maładafrontaŭcaŭ za čałaviečuju niazłomnaść i nacyjanalny patryjatyzm, inšyja haniać za praźmiernuju relihijnaść.
12 maładafrontaŭcaŭ prajšli praz sudy za ŭdzieł u niezarehistravanaj arhanizacyi. A da ich prychodziać novyja ludzi.
U 1997 hodzie na źjeździe ŭ pałacy «Sukno» razam z Paŭłam Sieviaryncam pieršymi sustaršyniami stali haradzieniec Siarhiej Paŭlenka i mahiloviec Aleś Asipcoŭ. Jak by toje ni było, ale «Małady front» praisnavaŭ užo 12 hadoŭ. Za hety čas praz arhanizacyju prajšło niekalki tysiač maładzionaŭ. Z arhanizacyi vyjšli viadomyja palityki, hramadskija dziejačy, žurnalisty, biźniesmieny, muzyki. Jość i tyja, chto padaŭsia z MF u BRSM, upraŭleńni ideałohii harvykankamaŭ.
Ci chto ŭzhadaje pra členstva ŭ BRSM jak pra važny fakt svajoj bijahrafii? Ci zachavaje fota sa schodu BRSM? A voś siabroŭstva ŭ «Maładym froncie» — heta oho-ho jaki vybar. Mienavita tamu «Małady front» tak elektryzuje siabroŭ i praciŭnikaŭ.
***
Čamu vy adyšli ad «Maładoha frontu»?
Alaksiej Janušeŭski, prahramist: «Ja pieraklučyŭsia z palityčnaha ŭdziełu na kulturnicki. Bo pabačyŭ, što dziejnaść u palityčnym kirunku nie daje vynikaŭ».
Michaił Paškievič, lider Moładzi Abjadnanaj hramadzianskaj partyi: «MF» — heta jak hohaleŭski «Šyniel», ź jaho vyjšła bolšaść siońniašnich maładych palitykaŭ. Heta startavaja placoŭka. Potym u kožnaha pa-roznamu. Chtości razumieje, što palityka — heta nie jahonaje. Niechta, naadvarot, pačynaje šukać samarealizacyi ŭ hetaj śfiery. Niemahčyma być zaŭsiody maładymi, u palityčnym sensie taksama».
Kasia Halickaja, pierakładčyca: «Mnie nie spadabałasia, jak kiraŭnictva paviało siabie ŭ kanflikcie ź Fińkievičam».
Čamu vy ŭstupili ŭ «Małady front»?
Taćciana Šapućka, studentka BDU: «Pryjšła ja na chvali vybaraŭ 2006 hoda. Naviedvała praktyčna ŭsie pieradvybarčyja sustrečy, bačyła šmatlikuju aktyŭnuju moładź, jakaja prahnie pieramien. I maryła dałučycca da ich šerahaŭ. Bolš za ŭsich mnie spadabalisia junaki z MF. Urazili mianie samaachviarnaściu i mužnaściu. Na sudzie nad Daškievičam ja paznajomiłasia sa Źmitrom Chviedarukom i Maŭludoj Atakułavaj i z taho momantu nie prapuskała nivodnaj MFaŭskaj akcyi. Ale aficyjna ja zapisałasia ŭ MF tolki na Dzień Voli 2007 hoda, pierad hetym vyvučyŭšy kreda i ŭsie statutnyja dakumienty MF».
Ryhor Astapienia, Salihorsk, student Prahramy Kalinoŭskaha, Lublin: «Mnie było 15 hadoŭ, i mnie prosta chaciełasia pazmahacca. Napisaŭ list u «Zubr», ale stul nie adkazali. A z MF adkaz pryjšoŭ. Potym ja zahitavaŭ svajho adnakłaśnika Ivana Šyłu, tak i ŭtvaryŭsia salihorski MF. Ciapier ža ŭ MF u mianie mnostva siabroŭ, dyj samarealizacyja prysutničaje».
Hladzi taksama:
Źmicier Daškievič: Jość kamu pieradać kiraŭnictva
Nasta Pałažanka: «Kaliści heta pieramienicca»
Artur Fińkievič: Ci my apazicyjnyja, ci prosta chryścijanskija
