Film zdymaje aŭtar «Akupacyi» Andrej Kudzinienka.
Praź zialonyja hołki prabivajecca sonca. Śviatar-uciakač tumannaju ranicaj kročyć pa lasnoj darozie. Nasustrač jamu vychodziać italjanskija partyzany-harybaldzijcy (na fota). Śviatar padsadžvajecca na vazok, zmahary ŭračysta ruchajucca pa darozie.
Heta finalnyja kadry filma «Masakra», zdymki jakoha pačalisia 14 vieraśnia. Italjanskim lesam stałasia aleja tuj u Bataničnym sadzie, zuchavataha śviatara syhraŭ aktor Alaksandr Kołbyšaŭ. Kaniom kiravaŭ režysior Andrej Kudzinienka ŭ kaściumie kučara, a partyzanami vystupili inšyja ŭdzielniki zdymačnaj hrupy: apieratar Alaksiej Ubiejvoŭk, mantažnik Alaksandr Debaluk, mastaki Artur Klinaŭ i Anton Hvoździkaŭ. Muzyka Siarhiej Pukst hraŭ na mandalinie Vierdzi.
Novaja stužka «Masakra» pavodle matyvaŭ «Łokisa» Praśpiera Meryme — hatyčnaja trahikamiedyja žachaŭ. Jak kaža sam režysior — bulba-chorar, kali i strašna, i śmiešna. Dziejańnie filma adbyvajecca ŭ Biełarusi paśla paŭstańnia Kalinoŭskaha. Ale vajna nie zavieršanaja. Akupanty sutyknucca ź miadźvie¬dziami-piarevaratniami.
Žurnalisty atakujuć režysiora: «A kroŭ kali budzie? A admysłovyja efiekty? A kipciury i zuby čałavieka-miadźviedzia?»
«Miadźviedź Ściapan budzie», — nie žadaje raskryvać karty tvorca.
U novaj karcinie hrajuć Alaksandr Kołbyšaŭ, Śviatłana Zielankoŭskaja, Siarhiej Žuraviel.
Zaprošany ŭ karcinu i mały śpiavak Jury Dziemidovič. Jak paviedamiŭ Andrej Kudzinienka, u karcinie vakantnaja rola chłopčyka, jakoha pa scenary taksama kličuć Juram. Chłopčyku ideja źniacca ŭ kino spadabałasia, adno pratestujuć kuratary z BT — bajacca, kab śpiavak nie prastyŭ pierad «Jeŭrabačańniem».
Na «Masakru» vydzielena 5 młrd rubloŭ. Zdymki musiać zaviaršycca 27 śniežnia, a zdača karciny zapłanavanaja na 2 lipienia naleta.
Fota Alesia Kudryckaha.
