Naziralniki adznačyli: u Vilni Łukašenka pavodziŭ siabie z apłombam, navat z dolaj ahresiŭnaści. Psichołahi dadaduć: heta simptom niaŭpeŭnienaści.
Zadzirysty ton śviedčyć, što jon usio ž trochi nie roŭna dychaje napiaredadni listapadaŭskaha ispytu — razhladu kiraŭnictvam ES pytańnia ab losie zamarožanych vizavych sankcyj. Faktyčna havorka idzie pra los ciapierašniaha dvuchbakovaha paciapleńnia.
Kaskad nastupalnych vykazvańniaŭ (nas nie nahnuć i h.d.) — heta probny šar, puščany ŭ bok Brusiela, miarkuje palitołah Andrej Fiodaraŭ. Kab potym navat drobnyja sastupki tam uspryniali jak atrakcyjon niabačanaj ščodraści.
Siarod mahčymych sastupak — reabilitacyja jašče niekalkich haziet, źmiakčeńnie adkaznaści za ŭdzieł u niezarehistravanych arhanizacyjach, kaśmietyčnyja źmieny ŭ vybarčym zakanadaŭstvie, maratoryj na śmiarotnaje pakarańnie.
U pryncypie luby z hetych krokaŭ nie stvaraje nijakaj niebiaśpieki režymu. Razam z tym, heta stanie sihnałam, što Minsk maje patrebu ŭ zachodniaj dapamozie, kaža Fiodaraŭ.
Nu i druhi test — Abchazija z Paŭdniovaj Asiecijaj. Łukašenka musiŭ adkazać litoŭskim žurnalistam, što ŭ kastryčniku Pałata razhledzić pytańnie. I dadaŭ, što treba jašče vyvučyć dumku narodu na hety kont. Dumka narodu u nas, jak viadoma, paniaćcie ełastyčnaje. Dobra viadomaja i stupień samastojnaści parłamienta.
Tak što i heta test dla Łukašenki. Niešta padkazvaje, što jak minimum da listapadaŭskaha pasiadžeńnia Rady ES u biełaruskim pytańni Bahapš z Kakojty svojho nie dačakajucca. A mo' nie dačakajucca i nikoli.
Va ŭsiakim razie, prysłuchajemsia da psichołahaŭ: bravadaj moža maskavacca niaŭpeŭnienaść, pačućcio zaležnaści. Usio ž hetaja hulnia z anhažavańniem «apošniaha dyktatara» nie jość hulnioj u adny varoty.
