Scena sa śpiektaklu «Psichaanalityk dla psichaanalityka»
Hetymi dniami na scenie Ruskaha teatru prachodziać hastroli Nacyjanalnaha akademičnaha dramatyčnaha teatru imia Jakuba Kołasa ź Viciebsku.
«Heta ŭ Minsku jość i Moładzievy teatr, i dziciačy, i dramatyčny, — kaža Ryd Talipaŭ, mastacki kiraŭnik viciebskaha teatru. — A ŭ nas, u Viciebsku, tolki adna takaja ŭstanova. I tamu my robim śpiektakli jak dla padletkaŭ, tak dla darosłych; śpiektakli dla samaj roznaj publiki».
Hastroli praciahnucca da 26 vieraśnia. Usiaho viciebski teatr padrychtavaŭ dla minskaj publiki vosiem pastanovak, siarod ich čatyry premjery.
«Hastroli — nahoda pamianiać krajavid, publiku, - praciahvaje Ryd Talipaŭ. — Učora na premjery byŭ uvieś minski teatralny bamond. Dla nas minskija adviedki — cudoŭnaja nahoda pakazać krasu ajčynnaj dramaturhii: «Vietrahonaŭ» Uładzisłava Hałubka, «Kryž Jeŭfrasińni» Iryny Maślanicynaj, «Apošnija śviedki» Śviatłany Aleksijevič»».
1926 — hod naradžeńnia viciebskaha teatra. Jon byŭ adkryty na bazie vypusknoha kursa Biełaruskaj dramatyčnaj studyi pry maskoŭskim MCHATu. Imiony vypusknikoŭ studyi ŭvajšli ŭ historyju teatralnaha mastactva: narodnyja artysty SSSR Alaksandr Iljinski, Pavieł Małčanaŭ, Stefanija Staniuta, narodnyja artysty Biełarusi Janina Hlebaŭskaja, Alena Radziałoŭskaja, Luboŭ Mazaleŭskaja, Maryja Bialinskaja, Cimoch Siarhiejčyk. U teatry pracavali takija režysiory jak: Viktar Darvišaŭ, Navum Łojtar, Juryj Ščarbakoŭ, Iosif Papoŭ, Siamion Kazimiroŭski, Barys Eryn, Alaksandr Śmielakoŭ, Valeryj Mazynski, Valeryj Maśluk.
U repiertuary najpierš biełaruskaja i zamiežnaja kłasiki. «Paŭlinka», «Prymaki» Janki Kupały, «Vajna vajnie», «U puščach Paleśsia», «Navalnica budzie» (pa tryłohii «Na rostaniach»), «Symon-muzyka» Jakuba Kołasa, ažeškaŭski «Cham». Z 1941 hoda ŭ repiertuary teatra zachoŭvajecca śpiektakl «Nieściarka», jaki pastaŭleny Łojteram pavodle kamiedyi Volskaha. Ź inšaziemnaha: «Biespasažnica» Astroŭskaha, śpiektakl, jaki byŭ pastaŭleny ŭ 1936 hodzie Darvišavym, zrabiŭsia pieršym ažyćciaŭleńniem dramaturhii Astroŭskaha na biełaruskaj scenie. Mastackimi dasiahnieńniami stali pastanoŭki «Zdaniaŭ» Ibsena, «Hamleta» Šekśpira, «Ułady ciemry» Tałstoha, a taksama «Revizora» M. Hohala.
U 1944 hodzie viciebskamu teatru prysvojena imia narodnaha piśmieńnika Biełarusi Jakuba Kołasa. U 2001 tetru atrymaŭ hodnaść nacyjanalnaha.
Pra ciapierščynu tetra Ryd Talipaŭ dadaje: «Kołasaŭski teatr — nie matornaja łodka, a vialiki karabiel, — jaho nielha rezka razvaročvać. My za źmieny, ale najpierš majem peŭnyja tradycyi. I kali što mianiać, dyk chutčej nie tematyku, a źmiest: nie varta prystasoŭvacca da časovaha, źmienlivaha, treba kiravać u bok, nasustrač ludskoj dušy, jak maha hłybiej raskryvać unutranyja prablemy sučasnaha čałavieka. Pa druhoje, treba bolš pracavać z ajčynnaj dramaturhijaj. Zajmacca pošukam novych imionaŭ, i pažadana biełaruskich: suhučnych nie tolki času, ale i miescu».
Raskład śpiektaklaŭ Nacyjanalnaha akademičnaha dramatyčnaha teatru imia Jakuba Kołasa na bližejšyja dni:
18 vieraśnia śpiektakl pavodle pjesa ŭkrainca Michaiła Staryckaha «Za dvuma zajcami». Pačatak a 19-j.
19 i 20 vieraśnia — muzyčnaja kazka «Nielha nam bieź siabra». Pačatak a 11-j i 14-j, a taksama viečarovy śpiektakl, liryčnaja kamiedyja «Psichaanalityk dla psichaanalityka». Pačatak a 19-j.
21 i 22 vieraśnia — «Vietrahony» Dziejańnie hetaj daścipnaj muzyčnaj kamiedyi Ŭładzisłava Hałubka pieraniesiena ŭ Viciebsk 20-ch hadoŭ: tut i ratuša, i viciebski tramvaj, i haradžanie. Svajaki vybirajuć žanicha dla maładoj pryvabnaj dziaŭčyny z dobrym pasaham. Pačatak a 19-j.
23 — «Kryž Jeŭfrasińni».Histaryčny śpiektakl pavodle pjesy Iryny Maślanicynaj. Pačatak a 19-j.
