Sojm Partyi BNF na svaim pasiadžeńni 26 vieraśnia padtrymaŭ ideju stvareńnia ŭ Biełarusi nacyjanalna‑demakratyčnaha błoka.
Jak paviedamiŭ staršynia partyi Alaksiej Janukievič, prezientacyja met i zadač takoha błoka moža adbycca ŭžo praź niekalki tydniaŭ.
«Ja viadu pieramovy ab stvareńni hetaha błoka ź lideram ruchu «Za Svabodu» Alaksandram Milinkievičam, a taksama liderami arhkamitetaŭ pa stvareńni partyi «Biełaruskaja chryścijanskaja demakratyja» Paŭłam Sieviaryncam i Vitalem Rymašeŭskim.
Dumaju, dzieści praz dva tydni my zmožam zajavić pra mety i zadačy błoka, formy sumiesnaj pracy partyj i arhanizacyj, jakija ŭ jaho ŭvojduć», — skazaŭ Janukievič.
Jon ličyć, što da budučaha błoka moža taksama dałučycca mižnarodnaja arhanizacyja «Małady front», Biełaruskaja sacyjał‑demakratyčnaja Hramada i arhkamitet pa stvareńni Partyi svabody i prahresu.
Pavodle słoŭ lidera Partyi BNF, nacyjanalna‑demakratyčny błok budzie imknucca paźbiehnuć pamyłak Abjadnanych demakratyčnych sił — u im, u pryvatnaści, budzie vysokaja stupień aŭtanomii subjektaŭ.
Janukievič taksama paviedamiŭ, što błok stvarajecca nie pad prezidenckija vybary, «a na pierśpiektyvu». «Nie tolki da taho momantu, jak prezidentam stanie demakratyčny palityk, ale i nadalej, dla kaardynacyi pracy palityčnych sił, abjadnanych ahulnymi palityčnymi kaštoŭnaściami», — padkreśliŭ Janukievič.
Upieršyniu ideja stvareńnia nacyjanalna‑demakratyčnaha błoka była ahučana na źjeździe Partyi BNF 5 vieraśnia. Hetuju ideju padtrymaŭ lider ruchu «Za Svabodu» Alaksandr Milinkievič.
***
Partyja BNF admoviłasia ad sustaršynstva ŭ Abjadnanych demakratyčnych siłach (ADS). Takoje rašeńnie pryniata 26 vieraśnia na pasiadžeńni sojma.
U toj ža čas partyja vyrašyła zachavać svajo pradstaŭnictva ŭ prezidyumie ADS. U jaho skład uklučany člen sojma Uładzimir Łabkovič. Jon nadzieleny pravam udzielničać tolki ŭ tych mierapryjemstvach ADS, jakija padtrymlivajucca sojmam abo palityčnaj kamisijaj Partyi BNF.
Akramia taho, pavodle rašeńnia cojma pradstaŭniki Partyi BNF u rehijanalnych kaalicyjach ADS pavinny sami vyznačać svajo pradstaŭnictva. Pry hetym farmat ich udziełu ŭ kaalicyjach ADS nie pavinien supiarečyć rašeńniam źjezda abo sojma Partyi BNF.
Jak zajaviŭ staršynia partyi Alaksiej Janukievič, źmiena farmatu ŭdziełu ŭ ADS źviazana z tym, što struktury, jakija ŭvachodziać u kaalicyju demsił,
nie mohuć płanavać sumiesnuju dziejnaść z‑za najaŭnaści surjoznych palityčnych supiarečnaściaŭ.
Siońnia, ličyć Janukievič, ADS mohuć isnavać u formie kaardynacyjnaha orhana, jaki budzie abmiarkoŭvać asobnyja pytańni — naprykład, pravaabarončuju tematyku abo źmieny ŭ vybarčaje zakanadaŭstva.
Sojm Partyi BNF 26 vieraśnia padtrymaŭ inicyjatyvu praviadzieńnia Biełaruskaha jeŭrapiejskaha forumu.
Pavodle mierkavańnia členaŭ sojma, forum pavinien pryciahnuć uvahu biełaruskaha hramadstva da pytańnia intehracyi Biełarusi ŭ Jeŭrasajuz.
Sojm delehavaŭ u skład arhkamiteta pa praviadzieńni forumu svajho pradstaŭnika, a taksama daručyŭ płanava‑analityčnaj kamisii partyi padrychtavać prapanovy pa prajektach rezalucyj, jakija rychtujucca.
Sojm taksama rekamiendavaŭ členam Partyi BNF uziać udzieł u rehijanalnych schodach pa vyłučeńni delehataŭ na Biełaruski jeŭrapiejski forum.
Jak paviedamlałasia raniej, forum płanujecca pravieści ŭ Minsku 14 listapada. Jaho meta — sadziejničać dyjałohu Biełarusi ź Jeŭrasajuzam i ŭzmacnić jeŭrapiejski viektar raźvićcia krainy.
Inicyjatarami praviadzieńnia Biełaruskaha jeŭrapiejskaha forumu i zasnavalnikami arhkamiteta vystupili ruch «Za Svabodu», arhkamitety pa stvareńni partyi «Biełaruskaja chryścijanskaja demakratyja» i Partyi svabody i prahresu, mižnarodnaja maładziožnaja arhanizacyja «Małady front» (Čechija), a taksama inšyja demakratyčnyja arhanizacyi. Staršynioj arhkamiteta pa praviadzieńni forumu abrany lider ruchu «Za Svabodu» Alaksandr Milinkievič.
