Były partyzan Liviencaŭ doŭhi čas kiravaŭ Sportkamitetam BSSR. Pry im byli pabudavanyja Pałac sportu i sportkompleks «Raŭbičy».
Liviencaŭ naradziŭsia 21 krasavika 1918 hoda ŭ Varoniežskaj vobłaści. Zakončyŭ vajenna‑palityčnaje vučylišča, vyšejšuju partyjnuju škołu i Minski piedinstytut. U hady vajny na terytoryi Biełarusi arhanizoŭvaŭ partyzanskija atrady i dyviersijnyja hrupy [Kamandzir Pieršaj Babrujskaj partyzanskaj bryhady -- «NN»]. U 1958—1978 hadach uznačalvaŭ Sportkamitet BSSR pry Saviecie ministraŭ, u 1978—1986 hadach byŭ kiraŭnikom spraŭ CK KPB.
Za hady pracy Liviencava ŭ Sportkamitecie byli pabudavanyja alimpijskija spartkompleksy
«Stajki», «Raŭbičy», minski vodna‑spratyŭny kompleks (zaraz SAK «Alimpijski»), minski Pałac sportu, konna‑spartyŭnaja baza ŭ Ratamcy.
Alaksandr Łukašenka vykazaŭ spačuvańni rodnym i blizkim Liviencava. «Hety vydatny čałaviek prajšoŭ vialiki i słaŭny šlach abaroncy Ajčyny i stvaralnika budučyni svajoj krainy, — havorycca ŭ spačuvańni, jakoje cytuje pres‑słužba prezidenta. — Viktar Iljič vałodaŭ vialikaj siłaj duchu i ćviordaj hramadzianskaj pazicyjaj, aktyŭna ŭdzielničaŭ u hramadskim žyćci, praviadzieńni vychavaŭčaj pracy z moładździu. Jaho vydatnyja zasłuhi pierad Radzimaj adznačany mnohimi vysokimi ŭznaharodami».
«Heta byŭ čałaviek‑epocha, jakich zastałosia vielmi mała, — adznačyŭ u intervju BiełaPAN były ministr sportu i turyzmu Alaksandr Hryharaŭ. —
Kali uzhadać, kolki na jaho dolu vypała bied i vyprabavańniaŭ — heta na tuzin stojkich mužykoŭ. A jon — adzin. Jon vynies usio z honaram i hodnaściu.
I pry hetym zastaŭsia vielmi dobrym čałaviekam. Liviencaŭ byŭ lideram va ŭsie časy. U nas ź im było niamała tvorčych razmoŭ. Ja hanarusia tym, što źjaŭlajusia jaho vučniem».
Hramadzianskaja panichida projdzie 30 vieraśnia ŭ Domie aficeraŭ. Liviencaŭ budzie pachavany na Uschodnich mohiłkach.
Słovy Liviencava pra trahiedyju spalenaj partyzanami vioski Dražna cytavaŭ krajaznaŭca Viktar Chursik, aŭtar knihi «Kroŭ i popieł Dražna»
U svoj čas ja sustrakaŭsia z byłym partyzanskim kambryham Viktaram Liviencavym i raspytvaŭ u jaho pra partyzanskija sutyčki z palicajami. I jon tłumačyŭ, što, sapraŭdy, časam zdarałasia roznaje. I kali abstrelvali viosku, mahła niejkaja chata zaharecca.
Ale Liviencaŭ padkreśliŭ: «Toje, što zdaryłasia ŭ Dražnie, — zahadzia splanavanaje j śviadoma ažyćcioŭlenaje złačynstva».
Ja dakładna pryvodžu jaho słovy ŭ svajoj knizie «Kroŭ i popieł Dražna». I jašče Liviencaŭ zaznačyŭ, što staŭleńnie partyzanskich kambryhaŭ toj zony, dzie dziejničała Druhaja Mienskaja bryhada, da jaje kambryha Ivanova, było admoŭnym. I jašče raz były partyzanski kambryh padkreśliŭ, što Dražna i niekatoryja druhija vioski byli spalenyja kambryham Ivanovym».
Liviencaŭ adyšoŭ 28 vieraśnia.