U apublikavanaj na sajcie nn.by 28 vieraśnia infarmacyi zbłytana ŭsio, što tolki možna było pierabłytać.
Nahadaju, u paviedamleńni, hutarka idzie ab tym, jak «demakratyčna abrany» Andrej Kazakievič nie byŭ zaćvierdžany kiraŭnictvam EHU na pasadu dyrektara departamienta, a zamiest jaho pryznačyli čałavieka novaha i niespraktykavanaha.
Zaŭvažu, najpierš, što mova naohuł nie idzie ab pazicyi dyrektara departamienta. Takim źjaŭlajusia ja — Navumava Śviatłana Andrejeŭna, i, nakolki ja razumieju, hety fakt nie asprečvajecca ŭ tym liku i maimi kalehami, što pratestujuć.
Andrej Kazakievič nikoli nie abiraŭsia dyrektaram departamienta.
Na praciahu apošnich hadoŭ jon sapraŭdy kiravaŭ bakałaŭrskaj prahramaj pa palitałohii. Uviesnu hetaha hoda Andrej abaraniŭ dysiertacyju i, niahledziačy na ŭsie maje prośby, vyrašyŭ pakinuć hetuju pasadu. Siarod inšych arhumientaŭ byŭ i toj, što jaho ciapierašni status doktara palitałohii nie adpaviadaje takoj pazicyi. Dumaju, jaho možna zrazumieć. Razmova išła ab siaredniaj administracyjnaj pasadzie, jakaja nie źjaŭlajecca vybarnaj, a ŭ maładoha daśledčyka mohuć być svaje ambicyi i płany.
Ja publična padziakavała Andreju Kazakieviču za praviedzienuju pracu i pradstaviła novuju kandydaturu kiraŭnika bakałaŭrskaj prahramy, što, vidać, nie zadavoliła častku vykładčykaŭ.
Jany bačyli na hetaj pasadzie inšaha «pierajemnika». Što ž, tak byvaje. Novyja pryznačeńni nam padabajucca nie zaŭsiody. Adnak, kali pracedura vykananaja, a praviły nie parušanyja — davodzicca padparadkoŭvacca. U hetaj kanfliktnaj situacyi ja prapanavała kaleham inicyjavać abmierkavańnie pytańnia ŭ Sienacie univiersiteta, kudy ad departamienta abranyja 2 čałavieki. Adnak, jany vyrašyli «lasnuć dźviaryma».
I naprykancy ab hałoŭnym. U navinie paviedamlajecca, što svoj pratest vykazali «biełaruskamoŭnyja» vykładčyki.
Składajecca ŭražańnie, što tym samym biełaruskaja mova vykaraniajecca z aŭdytoryj EHU. Chaču zapeŭnić čytačoŭ pavažanaj haziety: kiraŭnictva ŭniviersiteta nie dzielić vykładčykaŭ na «ruskamoŭnych» i «biełaruskamoŭnych». U pryncypie vykładčyki padzialajucca na dobrych i drennych, razumnych i nie vielmi.
Razmachvać ściaham «biełaruskasci» tam, dzie hutarka pavinna iści ab prafiesijanaliźmie — prosta niesumlenna.
