Zdajecca, Minsk pačynaje słać sałomku da listapadaŭskaj Rady ES.
Na joj, nahadaju, budzie vyrašacca los zamarožanych vizavych sankcyj suprać biełaruskaha kiraŭnictva. 8 kastryčnika ministr justycyi Viktar Hałavanaŭ zajaviŭ, što jaho viedamstva prapracoŭvaje pytańnie ab admienie prasłavutaha kryminalnaha artykuła 193‑1.
Kali vieryć ministru, pytańnie navat dyskutujecca z pradstaŭnikami partyj i treciaha siektara. Voś, maŭlaŭ, jaki ŭ nas šyroki dyjałoh!
Možna padumać, što ludzi ź Miniusta pahražajuć «skasujem artykuł!», a bityja‑pierabityja ajčynnyja demakraty ŭpirajucca roham: nie, treba pakinuć, a to žyćcio stanie presnym i nudnym!
Nahadaju: hetaja firmavaja vynachodka ajčynnaj narmatvorčaści, uviedzienaja pierad prezidenckimi vybarami 2006 hoda, praduhledžvaje da dvuch hadoŭ turmy za dziejnaść ad imia niezarehistravanaj arhanizacyi. Za heta, u pryvatnaści, adsiedzieli maładyja ludzi z hrupy «Partniorstva», jakija źbiralisia nazirać za vybarami‑2006, lider «Maładoha frontu» Źmicier Daškievič (šerahu jaho paplečnikaŭ «pašancavała»: abyšlisia vialikimi štrafami). Na dumku Jeŭropy, artykuł 193‑1 absalutna nie adpaviadaje pryncypu svabody abjadnańniaŭ.
Apošnija miesiacy Minsk reahavaŭ na zakliki hetaj samaj Jeŭropy (čas, maŭlaŭ, zrabić novyja kroki pa šlachu libieralizacyi i ŭsio takoje) pavodle pryncypu «A Vaśka słuchaje dy jeść». Ale da listapadaŭskaj pieraekzamienoŭki (viasnoj Brusiel tolki prałanhavaŭ zamarozku sankcyj) treba zrabić niejki žest.
Pa vialikim rachunku skandalny artykuł KK na siońnia i tak schavany ŭ zahašnik. Akazałasia, što jość šmat inšych prydatnych u sensie ŭtajmavańnia apazicyi narmatyŭnych dubinak.
I nie abaviazkova — za kraty. Štraf, šmatkroć bolšy za siaredni zarobak biełarusa, taksama niakiepska navučaje.
Kali ž u dadatak da takoj voś humanizacyi baraćby z dysidentami ŭłady zrobiać jašče paru sastupak, jakija nie pahražajuć asnovam sistemy (kštałtu: uklučać u paštovyja katałohi niekalki małanakładnych niezaležnych haziet), to, jak minimum, novaja prałanhacyja zamarozki sankcyj (vo jakija dypłamatyčnyja vykrutasy vykarystoŭvaje Brusiel!) u tutejšaha načalstva ŭ kišeni.
Mroicca, kaniečnie, poŭnaje skasavańnie, ale jość u ES para‑trojka «škodnych» dziejačaŭ kštałtu hałandskaha ministra zamiežnych spraŭ Fierchahiena, jakija ličać, što «apošniuju dyktaturu Jeŭropy» hładzić pa hałoŭcy niama čaho. Rada ž ES vyrašaje spravy kansiensusam. Tak što, mabyć, syducca na kampramisie, padviesiać pytańnie jašče na niejki termin.
Uvohule ž u ES pieravažvaje prahmatyčny padychod da adnosinaŭ z Łukašenkam. Brusiel napeŭna acenić, naprykład, toje, što biełaruski kiraŭnik znoŭ advajavaŭ siabie prastoru dla manieŭra ŭ pavisłaj spravie ab pryznańni Abchazii i Paŭnočnaj Asiecii.
Eskapady Łukašenki na adras Maskvy (i najpierš Pucina piersanalna) na pres‑kanfierencyi 2 kastryčnika niekatoryja ahladalniki paličyli zryvam, niekantralavaym vykidam emocyj. Ale jak skazać! Lepšaja abarona — napad. U vyniku pasoł Rasii Surykaŭ byŭ vymušany, apraŭdvajučy svajo načalstva, publična zajavić, što Maskva ŭ pytańni ab kaŭkazskich respublikach Minsku ruki nie vykručvaje. Nu a kali tak, to — jakija pretenzii, chłopcy, što my ŭ paradak dnia vosieńskaj siesii Pałaty hetaje pytańnie nie ŭklučyli? Nu pavyvučajem jašče, chutka tolki kotki naradžajucca.
Kaniečnie, Maskva adhulałasia, admoviŭšysia vusnami Kudryna vydavać 500 miljonaŭ dalaraŭ kredytu. Dy i kiraŭnik «Hazproma» zajaviŭ, što paturańniaŭ u sensie cany na haz u 2010 hodzie nie budzie.
Emacyjnyja kamientatary stali pradkazvać hazavuju vajnu. Tyja ž ekśpierty, što razvažajuć bolš racyjanalna, miarkujuć: Maskva ŭ takim abvastreńni nie zacikaŭlena. Pa‑pieršaje, naśpiavaje kanflikt ź pieradvybarnaj Ukrainaj, a na dva fronty vajavać — nierazvažliva. Pa‑druhoje, Rasija abvieściła z novaha hoda mytny sajuz ź Biełaruśsiu i Kazachstanam, i tapić hety prajekt svaimi ž rukami — niedarečna.
Tak što pieramovy pa hazie majuć šansy zakončycca prymalnym dla biełaruskaha ŭrada kampramisam. Nu a što da kredytaŭ, to na Rasii śviet klinam nie syšoŭsia. MVF amal saśpieŭ da adkryćcia novaj linii dla Biełarusi, kali skončycca termin ciapierašniaha stend‑baja.
I samaja śviežaja navina: skupavaty Brusiel, kali vieryć biełaruskim čynoŭnikam, taksama saśpiavaje dla makrafinansavaj dapamohi Biełarusi.
Nahadaju: «makra‑», pavodle Brakhaŭza dy Efrona, «čaścica, jakaja prystaŭlajecca da słoŭ dla paznačeńnia istotnaj vieličyni». Namieśnik ministra zamiežnych spraŭ Siarhiej Alejnik paviedamiŭ 8 kastryčnika, što havorka idzie ab sotniach miljonaŭ jeŭra.
Hladziš, akurat šukanyja paŭmiljarda i abłamajucca. Pryčym, mahčyma, jašče sioleta. Što vielmi aktualna dla biełaruskaha ŭrada, jaki dziejničaje ŭ kryzisnym fors‑mažory pad niemudrahielistym devizam Chłapčyša‑Kibalčyša: nam by tolki dzień prastajać dy noč pratrymacca! Voś tolki, adrozna ad hajdaraŭskaj kazki, dapamahajuć jakraz «praklatyja buržuiny».
